Read Kambera DIHA 11 Bible Online

DIHA 11 - Kambera bible

DIHA 11

¹La hau na lodu pakiringu-nanyaka na banjaru papeka ura dedida lai MIRI, rukuna na harui handuka-da. Ba narongu-yaka nu na pekada uru dedi, ka mbeni-nanyaka i MIRI hi na-patàka-nja epi. Ka làmbatu-nanyaka na epi la hongada hi na-pakehi-ha hawiangu da ngia pa-pamaüngu.

²Ka kala - ladaku-danyaka da tau pakarai pa-ndulangu lai Muha. Hi na-hamayangu i Muha lai MIRI, ka mbàda-nanyaka na epi.

³Rukuna nuna na matumbu, Tambera,[2] wàda-nyaka na pangia lai nu, ba lai nudu na-kandulangu ningu na epina i MIRI la hongada nyuda.

⁴Nu ba dalaku da tau Ihirailu ningumbu tau hangàdangu ma-kikungu. Nyuda nu dira mangàbangu-ha pangangu tolungu, tàka da tau Ihirailu pakiringu-mbudanyai duda papeka ura dedi. “Ai kaningu làti tolungu ndumanda! wàda ba dapanii.

⁵Tanamu biahaka da iyangu pangaa juanda la Mehiru ba nda pajàra-a pakei, da kariri, da kariri jawa, da bawa raungu, da bawa rara dàngu da bawa kawaü!

⁶Tàka nàhu tawàngu pa-maluputu biaka. Nda nggàra-mapa pangaa haunda hinggilu-da da màna-maaka da paita-nda,” wàda.

⁷Nuda da màna hama tuna wua dalu ma-màraku-ha da bara kakomba.

⁸Nuda da màna da puru pa-kariangu wai hamburungu la rudungu la ngia pa-pamaüngu. La mba - mbaru njadangu-danyaka da tau palua pa-pauhi-nja, hi danggihu-ha jàka ndia dawàngu pabai pa-kanguta-nja, hàlaka nu hi da-pandoi-ha panjadi roti kawori ma-mbelaru. Hama roti pa-handara pa-korungu mina haitungu-ha ba pàdanja.

¹⁰Narongu-ha ba mbu - mbunguda da tau Ihirailu i Muha ba dawàngu pa-ndolaku kangu - nguhuru la hangga maüda. Ka mbumbaru-nanyaka na hànggana i MIRI hi na-hawina i Muha.

¹¹Ka panii-nanyaka nyuna lai MIRI, “Ka nggikina MIRI hi tuna yia na-pahanduka-mungga? Nda mbuha-mungga ihu nyungga? Ka nggikina MIRI hiu pa-hanobaku ndàba-nggaha da tau yiada?

¹²Ka nyunggaka nu maworu ihinja jàka ndia ma-paana-nja? Ka nggikina hiu karaika panjadi hama tuna nganggu ina ma-kalunggu anakeda kuduka, hi lupangu-maika bàdi ku-kabida mànunja nàhu la ànda ngarangia ma-hanggangu la tana panjanji-munja da boku la mangilu-da?

¹³Tàngaru-ha nutakungu-madanya pa-kareji pakarai tolungu. Ka ngginika bàdi kuhimbu ninja tolungu nduma ndàbada da tau yiada?

¹⁴Nda kumàka-a pa-hanobaku mehaya yiana na manda najaru; lalu làmburu-mana mbotuna nuna lai nyungga!

¹⁵Jàka tu pangala-màmungga nu napa MIRI, mila àru-kingga eti; rihi hàmupa kau pameti parengga biangga, ka àmbu kuhili pàdanya yiana na mayila,” wana.

¹⁶Ka panii-naka i MIRI lai Muha, “Pa-uhingu-wa pihu kambulu ama bokulu da pa-kataku ba liku uru banjaru-maha. Karia-njawa lai Nyungga daa la Maünggu ka mangu pa-paràha-nja pa-ndolaku lai nu la peramu nyumu.

¹⁷Napa Nyungga kupuru papanii dànggau nyumu lai nu, dàngu hawiangu na kuaha na pambàda wua-nggunggau nyumu, hi kuwua-nja nyuda napa. Nu ka ngalangu-danyaka nyuda pa-pambapa dànggau nyumu pa-hanobaku-ya yiana na banjaru, dàngu ka àmbu didi mehakau ma-hanobaku-ya.

¹⁸Nàhu panii-yawa yiana la banjaru yiana: Paili-wa wikimi ndumana haromu; napa nyimi ingangu tolungu. Mbàda rongu-nanyaka i MIRI na padudurungu-mi dàngu na pekami ura dedi, bai mangàbangu pangangu tolungu, dàngu ba narihi hàmupa na ngerami la Mehiru. Nàhu ka wuanja tolungu wàna-nggaika i MIRI, tàka peku-mika la panganya.

¹⁹Napa inganya nda wàngu pahau dàmbu lodu bia, jàka ndia lima jàka ndia hakambulu, jàka ndia nda wàngu padua kambulu lodu-mbuana,

²⁰tàka hau wula titapu mandaina bai nganya napa, hi lundu ihidu wànya dàngu imuta wànya. Hi kiri njadina nuna napa, rukuna ba mbàda tulaku-minyaka i MIRI na maninya la pahiku-mi. Dàngumbu ba mbàda hiimika la hanggana Nyuna dàngu ba mbàda peka-mika ura dedi ba làpahu dunjaku-minyaka la Mehiru, wàmunja,” wànanya.

²¹Ka panii-naka i Muha lai MIRI, “Tau 600.000-ya yia na pa-kapipi-nggu. Nggiki hamana kuwua-nja tolungu napa tuda hau wulangu hi jia wàmu bia?

²²Ngginiha nu da hapi dàngu da mbimbi dangu paràka parupu ka pambihu-ha nyuda? Jia toma-daka mbuu ndàbada da iyangu la tehiku ka wuanja nyuda ka dangangu?” wàna.

²³Nahema i MIRI, “Ka ningu nu dirana na mbihanggu? Lu ita-mamunya napa jàka na-hàrangu langatàka hi ndia na paninggu!” wànanya.

²⁴Ka luhu-nanyaka i Muha hi na-patàka-nya nu na banjaru na pambàda panii-nanya i MIRI. Pauhi-nanjaka da pihu kambulu liku uru i Muha hi na paràha-nja pa-ndolaku la winggiru-na na Maüna i MIRI.

²⁵Ka puru-nanyaka i MIRI la unu karumangu hi na panii-dànya i Muha. Ka piti-nanyaka hawiangu na kuaha welingu la pambàda wua-nanya i Muha hi nawua-nja nyuda da pihu kambulu liku uru. Ba napuru-ka na Ngahuna i MIRI lai nyuda, pakiringu-danyaka pawara hama tuna wunangu, na nyuna nda damandai-a.

²⁶Da madua welingu la mapihu kambulu-da nuda da liku uru, i Elindàtu dàngu i Mendàtu, da-ndàdiku la ngia pa-pamaüngu, nda dalua karia-anja nyuda hawiangu la Maüna i MIRI. La ngia pa-pamaüngu lai nuduka napuru ningu na Ngahuna i MIRI lai nyuda, ka wa - wara-danyaka pa-kadua-da hama tuna wunangu.

²⁷Ka luhu-nanyaka ba nawàngu papalai na haàtu bidi mini palua papanii-nya i Muha nu na pawunda-da i Elindàtu dàngu i Mendàtu.

²⁸Tunaka nu i Yuhua anana i Nungu, na mambàda pambapa dànya i Muha piti welingu ba bidi miniya, napanii-nya i Muha, “Paràha-nja làti ka da-pànjangu, Umbu!” wàna.

²⁹Nahema i Muha, “Ka nggikina hiu tanggu pangàda-nya na ngeranggu nyungga? Jiapa kumonu-kinyaipa ka nawua-nya Ngahuna i MIRI mbuu ndàbana na banjaru-na, ka na-pawiti-nja nyuda mbuu ndàbada panjadi wunangu!” wànanya.

³⁰Hàla beli-danyaka la ngia pa-pamaüngu i Muha dàngu da mapihu kambulu-da da liku uru Ihirailu.

³¹Hi jia pa-hapuputu bia-nanya na ngilu welingu la tehiku i MIRI; nuna na ngilu nangàndi powa da madira kendaru-ha da hawurungu-da lundu hau metiru-ada welingu la tana. Da hawurungu la ngia pa-pamaüngu lundu nda pira kilu metiru biana la winggiru-na.

³²Ba tuna, la lodu nu, la rudungu dàngu la lodu haromu-na pangala tilangu màdanya payàpa powa da tau. Nimbihu-na na tau wawa-mana-nyaka jàka 1.000 kilu payàpa-na. Da-yàlaru-nja ka dengi pamàdu-ha nuda da ma-hawurungu la winggiru ngia pa-pamaüngu.

³³Nu ba jiapa bia-hapa danguda da tolungu ndumana na nganguda, mbeni-nanyaka nuna na banjaru i MIRI hi na-patàka-nja panyaki pa-nggàbalungu.

³⁴Ka patamu-danyaka “Reti Tau Malumbangu” na pangia nuna, ba lai nudu na ngia patani-nja da tau da mameti paraï pa-malumbangu.

³⁵Welingu lai nu lelingu-nanyaka la ngabana la Hahirutu nuna na banjaru, hi na-pahadangu ngia pa-pamaüngu-na lai nu.