Read Kambera DIHA 12 Bible Online

DIHA 12 - Kambera bible

DIHA 12

¹Mbàda piti-naka papaha-na haàtu kawini Kuhu i Muha, tàka rukuna nuna da-paaka-nya paraï da i Miriyàmu dàngu i Harungu,

²“Ka mbulungu la ngaruna i Muhama-a nu ba napanii i MIRI? Ka nda la ngarunda nyutambu ba napanii?” wàda. Narongu-maya i MIRI nuna na paniida.

³Haàtu tau karàda eti-maya i Muha, narihi ndàbanya pa-karàda eti na ta - tauka na maluri la pinu tana yiana.

⁴Hi jia panii biana i MIRI lai Muha, i Harungu dàngu i Miriyàmu, “Nyimi pa-katailu-mi kai lua la Maünggu,” wanànja. Kalua-danyaka lai nu

⁵hi napuru-ya i MIRI la tandai karumangu. Na-ndolaku i MIRI la pindu Maüna hi napaau-nja i Harungu dàngu i Miriyàmu. Ka hurungu-danyaka nyuda pa-kadua-da,

⁶hi napanii i MIRI, “Patingi-nyawa na papanii-nggu! Jàka ningu haàtu wunangu la pahiku-mi, ku-pawuwangu wikinggu lai nyuda la harii mata, dàngu kupanii dànya la manggadipangu.

⁷Tàka nda tuna nua dàngu na atanggu i Muha. Nyuna-maka na tau tuturu la njonga banjaru-nggu.

⁸Jia-duyaka, hi ma-pahangga nggorungu ba kupanii dànya nyuna, wàngu ma-lohangu-ma dàngu nda kuwàngu pa-pamaü-anya. Jiapa mbàda ita-mbuna-nyaka na matanggu! Ka nggikina nyimi hi itoru mbeni pàku pa-ndubaku-ya i Muha na atanggu?” wànanja.

⁹Kanjupu mbeniya i MIRI lai nyuda nu pa-kadua-da, tàka hi nalaku.

¹⁰Ba na-yilangu-ka na karumangu welingu la Maüna i MIRI, ba itaya nggàna-nanyaka panyaki manula mapahanggàmaru i Miriyàmu; na-pabara kambangu na manula-na. Ba nambaili-nyaka i Miriyàmu nyuna i Harungu dàngu ba naita-yaka nggàna-nanya panyaki nuna,

¹¹panii-nanyaka lai Muha, “Màla pa-ndulangu àru umbu, àmbu màta àruki-nggama ka pa-mayila-kama ruku njala pawunda-ma la ndubama.

¹²Àmbu màta àru-kinya nyuna ka hama ana rara madedi metiya ba dàngu muhungu-na hawiangu na toluna,” wàna.

¹³Ka wara-nanyaka i Muha lai MIRI, “Ou Ala, pahàmu àru-kiya nyuna!” wàna.

¹⁴Nahema i MIRI, “Ngera hama tuna jàka na-panganji-yaka amana na matana, ka nda pihu mbua lodua bàdi mandaina pa-handepa-ya na pa-makia wàngu? Jia ba tuna pamarau-yawa welingu la ngia pa-pamaüngu pihu mbua lodu mandaina, hàla hina-duka la hambeli-na nu hi peku tama belina,” wàna.

¹⁵Ka paluhu-danyaka i Miriyàmu welingu la ngia pa-pamaüngu, pihu mbua lodu mandaina, dàngu nda na-lelingu-a welingu lai nu na banjaru lundu pekuna pabeli i Miriyàmu la ngia pa-pamaüngu.

¹⁶Tunaka nu dunjaku-danyaka na Hahirutu hi da-pamaüngu la maràda telangu Paràngu.