Read Kambera DIHA 13 Bible Online

DIHA 13 - Kambera bible

DIHA 13

¹I MIRI napanii-nya i Muha,

²“Welingu la nimbihu kabihu Ihirailu palewa-wa haàtu welingu la hongada da liku uruda ka dalua pa-kapilitu-ya na tana Kanaàngu na pawua-nggunya napa na banjaru Ihirailu,” wàna.

³Pa-namatu-nya na hupu liina i Ala palewa-nahaka nyuda i Muha welingu la maràda telangu Paràngu. Mbuu ndàbada da tau nuda liku uru-maha la honga tau Ihirailu: [Kabihu] — [Liku Uru] Rumbingu — i Hamua anana i Hakuru Hamiungu — i Hapàtu anana i Hori Yahunda — i Kalipu anana i Yapuni Ihakàru — i Yinggàlu anana i Yuhupu Epuraïmu — i Hohia anana i Nungu Mbanyamingu — i Pàluti anana i Rapu Hembulungu — i Nggandialu anana i Hondi Manahi — i Nggandi anana i Huhi Ndàngu — i Amialu anana i Nggamali Ahiaru — i Heturu anana i Mikayilu Nàputali — i Nàhambi anana i Wòpuhi Nggàtu — i Ngguilu anana i Maki.

¹⁶Nudaha da ma-kapilitu da papalewa-na i Muha palua pa-kapilitu-ya nuna na tana. I Hohia anana i Nungu na-panjilu-nya na tamuna paraïna i Muha, Yuhua wànanya.

¹⁷Ba na-paràha-nja palaku paraïna i Muha, na kamahi-nja, “Hanàhu-miwa la diana la luruna na tana Kanaàngu, kai mangu pa-pangalangu la ngabana na ma-palindingu.

¹⁸Kanuturu-ya jàka nggiki hamana nu na tana, nadangu na mangia-nya hi ndia, da-kapingatu nyuda hi ndia.

¹⁹Kanuturu-ya jàka nahàmu nuna na tana jàka ndia, la ndeha ma-tanelaku-ha da mangia-nya jàka ndia hi la parai - paraingu maningu tindingu-ha.

²⁰Pamàndu-nja da etimi hamata-ya jàka na-kamboka na tanana dàngu jàka nadangu pingi aina lai nu. Àmbi ma-rombangu pangàndi nàmu ana hakudu wua ai matumbu lai nu,” wànanja. La rehi nu, kawunga rehi pàpu angguru-ya.

²¹Ka laku-danyaka hu dia nuda da tau hi da-kanuturu-ya na tana piti welingu la maràda telangu Njingu mbara luru lundu hanggangu la paraingu Rehupu, la lihina na ànda hanggangu la Hamàtu.

²²La kawunga-na dalaku-ha la luruna nuna na tana hi datàka la paraingu Hemburungu, ngia pa-ngiangu-da da tau Ahimàngu, Hehai dàngu Tàlumai ana umbuku tau Enàku. Pihu mbua ndaungu pa-mangilu wàna ba turaya na paraingu Hemburungu welingu la paraingu Huangu la Mehiru.

²³Hàla, tàka-danyaka la lolangu Ehikòlu.[3] Lai nu da-kàtahu halulu wua angguru madira mbotuya, hi lupa tau madua ma-malinggi wànya ai. Da ngàndimbu wua njalima dàngu wua kapilitu ba nda pirada.

²⁴Lolangu Ehikòlu wàdanya na pangia lai nu ba da-kàtahu-du lulu wua angguru lai nu da tau Ihirailu.

²⁵Ba patu kambulu lodu-daka mandaina pa-kanuturu-ya nuna na tana, beli-danyaka nu da tau ma-kapilitu-ya

²⁶hi da-patàka-nya i Muha, i Harungu dàngu mbuu ndàbana na banjaru Ihirailu na ma-pauhi la Kandihu la maràda telangu Paràngu. Da pekaha jàka nggàraha da pambàda itada hi da-paitangu-ha da wua ai pangàndi-da.

²⁷Dapanii-nya i Muha, “Mbàda kanuturu-manyaka nuna na tana, tana wuluya dàngu ma-kamboka-ya, yiada-haka da ana hakudu wua angguru welingu lai nu.

²⁸Na nyuna tau àtalu kapàru-ha da mangia-nya nuna na tana. Parai bokulu-ha da paraingu-da dàngu ningu tindingu kapingatu-da. Dàngumbu, maita-ha da tau da ana umbuku tau bokulu jangga lai nu.

²⁹La luruna nuna na tana da-ngiangu da tau Amaliku; la ngaba ma-palindingu da-ngiangu da tau Heti, Yembuhu dàngu Amori; la lihi tehiku padua dàngu la hingi-naka na Luku Yorundangu da-ngiangu da tau Kanaàngu,” wàda.

³⁰Na nyuna na-pamanda-nja paraïna i Kalipu da tau da mapeka ura dedi lai Muha, “Lupangu nàhu memangu-ma bàdi ba tahada-nya dàngu ka tawàhi-ya nuna na tana, nadu ba natoma-ma na kapingatu-nda la pa-pakàku-ya,” wàna.

³¹Na nyuna dapanii da tau da mambàda beli karia-nya i Kalipu, “Ndia-a, nda ta-duluku-a la pahada-nja nyuda. Darihi-pa pa-kapingatu da tau mangia-nya nuna na tana welingu lai nyuta,” wàda.

³²Ka bobaru-danyaka lii makambàliku la honga tau Ihirailu rukuna na tana pambàda kapilitu-da. Dapanii nyuda, “Kanjupu pa-hanggàmaru wàngu-ya nuna na tana, jiapa da mangia-nya da hanggàmaru wàmbunya. Da tau paita-ma lai nu kanjupu jangga tauha.

³³Jiapa maita-mbuha da tau da mahama milimungga-ha, nu da ana umbuku tau Enàku. Hama kabala-ma-akama ba makaka wikima, dàngu jiangu-ma ba tuna-numbu ba dakaka-kama nyuma,” wàda.