Read Kambera DIHA 15 Bible Online

DIHA 15 - Kambera bible

DIHA 15

¹I MIRI nawua-nyaha i Muha

²da kalaratu yiada ka lupa da pahàra-nja paraï tau Ihirailu la tana na pawua-nanja napa i MIRI.

³Nduma kameti maraku patunu jàka ndia kameti maraku pa-hàrangu wàngu paràkingu jàka ndia kameti maraku pambuha eti wiki jàka ndia kameti maraku la mba - mbabu da pakàli wàngu, pekuna pawotu lai MIRI: hapi mini, mbimbi bumbu, mbimbi jàka ndia kamambi-kai. Na wau hiritu-da nuda da kameti maraku naliya na etina i MIRI.

⁴Jàka nggamu mawotu mbimbi jàka ndia kamàmbi-kai ka kameti maraku patunu-ya lai MIRI, lupangu nangàndi-mbu bàdi karia-da nimbihu-da nuda da banda, hau kilu kanguta pa-haürungu hau litaru mina haitungu ka hunggu maraku mangejingu-ya, dàngu hau litaru wai angguru-mbu.

⁶Jàka heu mbimbi bumbuya nu na kameti maraku lupangu-mbu na wotu bàdi dàmbu kilu kanguta pa-haürungu hau paradua litaru mina haitungu ka hunggu maraku mangejingu-ya,

⁷dàngu hau paradua litaru wai angguru. Na wau hiritu-da nuda da hunggu maraku naliya na etina i MIRI.

⁸Jàka heu hapi miniya nu na pawotu ka kameti maraku patunu-ya jàka ndia kameti maraku pa-pahàrangu wàngu paràkingu-ya jàka ndia kameti maraku papeku-yakai,

⁹lupangu wotumbu bàdi tailu kilu kanguta pa-haürungu dàmbu litaru mina haitungu ka hunggu maraku mangejingu-ya,

¹⁰dàngu dàmbu litaru wai angguru. Na wau hiritu-da nuda da hunggu maraku naliya na etina i MIRI.

¹¹Nuda-duhaka da pawotu pa-kariangu dàngu nimbihu heu hapi mini, mbimbi bumbu, mbimbi jàka ndia kamàmbi-kai.

¹²Jàka narihi welingu la heu banda nu da pawotu, da hunggu maraku kanguta, lonahu dàngu da wai angguru lupangu bonja-mbuha bàdi pa-namatu-nya na lebida.

¹³Na ngerana yiana lupangu-ma na-pahàra-nya paraï nimbihu tau Ihirailu ba naluma pawotu hunggu maraku. Na wau hiritu-da nuda da hunggu maraku naliya na etina i MIRI.

¹⁴Na haàtu tau hangàdangu na ma-ngiangu la pahiku-mi, jàka lu ngiangu-ananya jàka ndia ka pa-daingu-nanya, lupangu-ma na karadaku ndàbanja nuda da kalaratu jàka naluma pawotu hunggu maraku mangejingu na maliiya na etina i MIRI na wau hiritu-na.

¹⁵Mbuu ndàbada da uku dàngu da kalaratu na-pahama, ndumami nyimi dàngu ndumada da tau hangàdangu da ma-ngiangu la pahiku-mi, nadu bai pahama nyimi dàngu nyuda la mbara matana i MIRI. Dàngu tuna nu mànuma lundu nu - nu, wàna.

¹⁷I MIRI na wua-nyaha i Muha

¹⁸da kalaratu yiada ka lupangu da-pahàra-nja paraï da banjaru Ihirailu la tana na pawua-nanja napa i MIRI.

¹⁹Jàka ipakiringu-ka pangangu ngga - nggàra ihina nuna na tana, lupangu-ma ikawàri hawiangu ka hunggu maraku pa-panuda-nya i MIRI-ya.

²⁰Jàka itunu roti welingu la uhu nggàndumu pa-kawunga muti, lupangu-ma iwotuya lai MIRI nuna na roti ka hunggu maraku pa-panuda-nya i MIRI-ya. Na huri wotu-minya na-pahama dàngu na huri wotumi uhu nggàndumu pa-kawunga nggihumi.

²¹Lundu nu - nu lupangu-ma iwuangu-ha da nimbihu roti welingu la uhu nggàndumu pa-kawunga muti ka hunggu maraku pa-panuda-nya i MIRI-ha.

²²Jàka nda wàngu pa-harawuku-mi pa-màtangu pa-pahàra-nja hawiangu da kalaratu pambàda wuana i MIRI lai Muha, piti welingu la pakiri-na ba na-wuangu-ya i MIRI nuna na kalaratu dàngu na pangalangu-na la ana umbuku, dàngu ba dawunda-ya nuna na manjala rukuna ba nda dapinya na kalaratu, nggubulu-na na banjaru dawotu-maka bàdi heu hapi mini nduma kameti maraku patunu. Karia-na nuna lupangu-ma dawotu hunggu maraku mangejingu dàngu wai angguru hama tuna na pa-kawuku. Na wau hiritu-da nuda da hunggu maraku naliya na etina i MIRI. Hinggilu-da nuda lupangu dawotu-mbu, heu mbimbi bumbu ka kameti maraku jàmangu njalaya.

²⁵Ka namangu pawunda-ya na lii podahu njala ndumana na banjaru paraïna ratu. Ka pa-jàmangu-haka napa da njalada nadu ba nda harawuku-da pa-pandoi-ya nuna na manjala dàngu ba mbàda ngàndi dudaka kameti maraku jàmangu njala dàngu kameti maraku patunu lai MIRI.

²⁶Nggubulu-na na banjaru Ihirailu dàngu na tau hangàdangu na ma-ngiangu la pahiku-da pa-jàmangu-ha napa da njalada, nadu ba pa-awahu ndàbaha nyuda nu la njala nuna na panda harawuku.

²⁷Jàka haàtu-ana na manjala ba nda harawuku-na, lupangu-ma nyuna nawotu maraku heu bai kamàmbi mahau ndauna ka kameti maraku jàmangu njalaya.

²⁸Lupangu-ma nawunda-ya na lii jàmangu njala na ratu la hanggana i MIRI, ka jàmanya na njalana na tau nuna.

²⁹Na kalaratu nuna nanggàna ndàbaya jiapa ka nggamu-yakai na mawunda njala dàngu nda harawuku-na, ka tau Ihirailu-ya jàka ndia ka tau hangàdangu-yakai na ma-padaingu lai nu.

³⁰Na nyuna jàka na harawuku pawunda njala na haàtu tau Ihirailu jàka ndia na haàtu tau hangàdangu, pa-kalana-nanya i MIRI. Lupangu-ma pa-hukungu metiya na tau nuna,

³¹rukuna ba na-ndubaku-ya i MIRI, dàngu ba harawuku-na papangga-ya na hupu liina i MIRI. Na tau nuna meti-nanya ruku njala wiki-mana duna.

³²Ba la maràda telangu-yapa na tau Ihirailu, ninya na haàtu tau mini na pa-tomangu ba talànga ohuna ai pa-mutungu la lodu Hangahu.

³³Da-karia-nya nuna na tau la hanggada Muha, i Harungu dàngu nggubulu-na na banjaru,

³⁴ka pàtu-danyaka ba ndedi da pii hàmunya jàka wàngu panggiki-danya bàdi.

³⁵Napanii i MIRI lai Muha, “Lupangu-ma na tau nuna pa-hukungu metiya. Lupangu ngàndi-maya bàdi la hambeli ngia pa-pamaüngu tàka lai nu lupangu-ma nggubulu-na na banjaru da-nàhaku-nya watu nyuna ka lundu nameti,” wàna.

³⁶Ka ngàndi-danyaka la hambeli ngia pa-pamaüngu paraïna mbuu ndàbana na banjaru, hi da-nàhaku-nya watu lundu nameti, hama tuna na pambàda paniina i MIRI la hupu liina.

³⁷I MIRI na-paràha-nya i Muha

³⁸papanii-nya na banjaru Ihirailu, “Tunja ruu matada da hupu hinggimi dàngu hondunja lulu kamba kawuru nimbihu ruu mata hinggi. Lupangu-ma iwànya lundu nu - nu la handalaru handàdiku.

³⁹Na linguda nuda da ruu mata hinggi jiaha da ma-pamiripu kanandingu: Handàka ita - handàka ita-miha, napa inamuha mbuu ndàbada da hupu liinggu tàka hi inunjuha. Tuna nuduka napa hi ndai maromba-ngga Nyungga la pa-namatu niya na pambuha-mi dàngu na pawuku wikimi.

⁴⁰Nuda da ruu mata hinggi jiaha napa da ma-panamu-nggai la panunju ndàbaha da hupu liinggu, tàka hi lupa mangu langatàka-nggunggai.

⁴¹Nyungga, MIRI Ala-mingga; Nyungga mangàndi-kai paluhu welingu la Mehiru ka Ala-mingga, Nyungga yia MIRI-ka,” wàna.