Read Kambera DIHA 16 Bible Online

DIHA 16 - Kambera bible

DIHA 16

¹I Kora anana i Yihàru, welingu la kaloka kalibaru Kehàtu, kabihu Lewi, na-patula ngganggangu hanggangu lai Muha. Dandula-ya paraï tau matailu welingu la kabihu Rumbingu, nu i Ndatàngu dàngu i Ambiràmu da anana i Eliapu, dàngu i Onu anana i Pelitu dàngu paraï tau 250 liku uru ma-kawulangu da papindi rayatu.

³Da pa-karia ndàbangu nyuda palua la hanggada i Muha dàngu i Harungu hi dapanii, “Toma-mana-nyaka hi Muha! Nggubulu-na na banjaru Ihirailu pa-pahinggilu ndumana i MIRI-ha. Dàngu ninya i MIRI la pahiku-nda nyuta mbuu ndàbada. Tàka ka nggikina dumu nyumu hiu kaka wikimu bau ngia ditanya na banjaru-na i MIRI?” wàda.

⁴Ba narongu-yaka nuna i Muha, marubu-nanyaka la tana hi na-hamayangu lai MIRI.

⁵Hàla, ka panii-nanyaka i Muha lai Kora, dàngu da makiku-nya, “Napa haromu la mbaru na-paita-ndanya i MIRI, jàka nggamuya na manguna, dàngu nggamuya na tau papahinggilu nduma wikina Nyuna. Na tau na papindi-na napa na-pahia-nya la palihi-nya Nyuna.

⁶Haromu la mbaru lupangu-ma nyumu dàngu da makiku-nggau kai maràngga piti kanai epi, dàngu kai paihi-nja wàla epi dàngu dupa, kai mangu pangàndi-ya la ngia pawotu maraku. Napa ka taita-ya jàka nggamuya la honganda nyuta na pambàda pindina i MIRI. Toma-mana-nyaka nu ha dimi tau Lewi!” wànanja.

⁷

⁸Na pangalangu-na napanii i Muha lai Kora, “Pa-tingingu dimi ha tau Lewi!

⁹Bai kakaya ma-halela-aya wàmi ba napindi-kai paraïna i Ala Ihirailu welingu la tau Ihirailu hawiangu kapeku lihi-minya Nyuna, dàngu la papawai ngera la Maüna dàngu la paràma nduma banjaru Ihirailu dàngu la palumu-nja nyuda?

¹⁰Nyumu dumu Kora, dàngu mbuu ndàbada da tau Lewi hawiangu mbàda pawili-mana-nggaika làti nu i MIRI — tàka nàhu hili karuhi-minyai la panjadi ratumbu!

¹¹Nyumu dàngu da makiku-nggau bai hoputu-nya i Harungu, langatàka-ma ba ndubaku-minya i MIRI-ma!” wàna.

¹²Hàla, paràhangu-nanyaka i Muha la papaau-nja i Ndatàngu dàngu i Ambiràmu, na nyuna dapanii nyuda, “Nda mabihu-a duma palua!

¹³Ndedi-mapa nu natoma bau karia-nggama paluhu welingu la tana Mehiru na ma-kamboka, la pa-pameti-kama yiahu la maràda telangu? Lupangu-maipa nu ba nyumu ma-pareta-kama nyuma?

¹⁴Langatàka-ma ba nda karia-mu-nggama la tana ma-kamboka-a, jàka ndia la pawua-nggama woka dàngu woka angguru ka matuu manguma! Tàka nàhu ka panyonga-ha wàmu-nggamai! Ndia-a, nda jia bihu-ama duma palua!” wàda.

¹⁵Ka mbumbaru-nanyaka na mbenina i Muha hi napanii lai MIRI, “MIRI, àmbu kataku-duha da hunggu maraku pangàndi-da nyuda. Ndedi haàtu-ma duku pa-pamburi-nggu la hongada nyuda; jiapa kaheu-a kalandai ndedima duku kupiti welingu lai nyuda,” wàna.

¹⁶Tunaka nu panii-nanyaka i Muha lai Kora, “Maikaiwa haromu la Maüna i MIRI dàngu da tau 250 da makiku-nggau. Napa nimbunya i Harungu lai nu. Lupangu-ma imaràngga ngàndi kanai epimi nyimi. Tunya daa dupa, kai mangu pahunggu maraku-nya lai MIRI,” wànanja.

¹⁷

¹⁸Ka maràngga piti-danyaka kanai epida nimbihu-da, hi datunja daa wàla epi dàngu dupa, hi da-ndolaku la pindu Maüna i MIRI anguda i Muha dàngu i Harungu.

¹⁹Tunaka nu pauhi-nanyaka na banjaru nggubulu-na paraïna i Kora, hi da ndolaku papapa dànya i Muha dàngu i Harungu la pindu Maüna i MIRI. Hi jia ita bia-nanya paraïna banjaru na handaraku ba bi - bilana i MIRI.

²⁰Hi napanii i MIRI lai Muha dàngu i Harungu,

²¹“Kandulingu-wa welingu la tau yiada; ba patàlaru-ha nàhu memangu-ma wànggu,” wàna.

²²Na nyuna marubuku-danyaka i Muha dàngu i Harungu hi dapanii, “Ou Ala, Nyumu mawua-nya luri mbuu ndàbana na maluri. Jàka haàtu-na na manjala, ka mbeni ndàba-mamu-nyaka nu na banjaru?” wàda.

²³Napanii i MIRI lai Muha,

²⁴“Paràha-nja da tau ka da-yilangu welingu la maüda i Kora, i Ndatàngu dàngu i Ambiràmu,” wana.

²⁵Ka lua-nanyaka i Muha la pangia-da i Ndatàngu dàngu i Ambiràmu, ba nawàngu pandàki-ya paraï hapajia-ha da liku uru banjaru Ihirailu.

²⁶Napanii-nja da tau Ihirailu paraïna i Muha, “Yilangu-wa welingu la maüda da tau akatu yiada dàngu àmbu nggàrambu pajonggarumi manguda nyuda. Jàka ndai panamatungu, patàlaru karia-nggai nyuda rukuda da njalada nyuda,” wàna.

²⁷Ka yilangu-danyaka da tau Ihirailu ba damarau-nja da maüda i Kora, i Ndatàngu dàngu i Ambiràmu. Mbàda luhu-daka i Ndatàngu dàngu i Ambiràmu dàngu maràngga ndolaku-madanya la pindu maüda dàngu ana dàngu papaha-da.

²⁸Hi napanii i Muha, “Wànya yiana napa ipinya ba mbàda palewa-nanggaka i MIRI la pawunda-ha yiada mbuu ndàbada dàngu ba nda wàngu eti wiki-anggu duku nyungga.

²⁹Jàka da meti da tau yiada hama tuna na pakàli ndàmanda, ba dàngu nda nggàra-a hukungu welingu lai Ala, ka nda palewa-anangga nyungga i MIRI.

³⁰Na nyuna jàka ningu hau pawunda-na i MIRI na pandedi rongu ndokumi, dàngu jàka na-tawangga na tana la pahoba-ha nyuda dàngu mbuu ndàbada da manguda hi dapuru kaluringu la pangia tau meti, pii-dimi-nyaka napa, da tau yiada ba mbàda ndubaku-danyaka i MIRI,” wàna.

³¹Ba nanjàpu-kika na kareuku-na i Muha, tawangga-nanyaka na tana ngia padili-da nyuda,

³²hi nahoba-ha nyuda pa-kariangu kuru umada dàngu mbuu ndàbada da makiku-nya i Kora dàngu da banda malanja manguda nyuda.

³³Ka hadànjalu kaluringu-danyaka la pangia tau meti dàngu mbuu ndàbada da banda malanja manguda nyuda. Ka pa-ràpitungu beli-nanyaka na tana ma-tawangga hi damohu molungu ba nahoba-ha tana.

³⁴Ba darongu-ha kaladaku-da nyuda, ka palai-nanyaka mbuu ndàbana na banjaru Ihirailu na maninya lai nu ba dàngu warangu-da, “Palai! Napa nahoba-duta tana!” wàda.

³⁵Hala, ka pa-tàkangu-nanyaka epi i MIRI na ma-pakehi-ha da tau 250 da mahunggu maraku wàngu dupa.

³⁶Hàla napanii i MIRI lai Muha,

³⁷“Paràhanya i Eliahàru anana i Harungu ka nahekanja da kanai epi da ma-kanjepi welingu la tau da ma-mamutungu nuda. Hàbaru-nja da kalatu epi la hau pangia welingu la kanai epi nuda, nadu ba ma-matua-ha nuda da kanai epi. Nuda nu da kanaingu jiaha da hunggu maraku-da da tau da pambàda hukungu meti ruku njalada. Nuda nu da kanaingu, ma-matua-ha ba mbàda hunggu maraku-nja la hanggana i MIRI, jia ba tuna pàha pa-manipihu-maha bàdi nduma ndàni liuna na ngia pawotu maraku. Nuna nu ka panamu wànya na banjaru Ihirailu,” wàna.

³⁸

³⁹Ka piti-nahaka da kanai epi i Eliahàru hi na paràhangu tau la papàha-ha ka da manipihu ka pandoi ndàni liuna na ngia pawotu maraku.

⁴⁰Yiana jiaya na pa-panamu wànya na banjaru Ihirailu, ba nda jia haàtu-a ma-àtalu mai biana patunu-nya dupa i MIRI la ngia pawotu maraku, hinggilu-da da ana umbuku-na i Harungu. Na tau na mapangga-ya na kalaratu yiana pa-patàlaru-ya hamana i Kora dàngu da makiku-nya. Nuda mbuu ndàbada pa-pahàrangu-ha hama tuna na hupu liina i MIRI lai Eliahàru la ngaruna i Muha.

⁴¹La lodu haromu-na dambe - mbeninja i Muha dàngu i Harungu paraï nggubulu-na na banjaru, “Mbàda pameti-mihaka da banjaru-na i MIRI,” wàdanja.

⁴²Nu ba da-pauhi pa-ndubaku-ha i Muha dàngu i Harungu, da-nggilaku la Maüna i MIRI hi daita-ya na karumangu na ma-panggàbalu-nya nuna na Maü, ka ita-danyaka na handaraku ba ninya i MIRI.

⁴³Lua-danyaka i Muha dàngu i Harungu la hangga Maüna i MIRI,

⁴⁴ka panii-nanyaka i MIRI lai Muha,

⁴⁵“Yilangu-wa welingu la tau yiada. Ka patàlaru-maha lai nu!” wàngguka, wàna. Marubuku-danyaka pa-kadua-da,

⁴⁶hi napanii-nya i Harungu paraïna i Muha, “Pitiya na kanai epimu, tunya daa wàla epi welingu la ngia pawotu maraku, dàngu tunya dupa la pinu wàla epi. Lu ngàndi parengga-nya nuna la banjaru dàngu wunda-yawa na lii podahu njala ndumada nyuda. Kahàruku-na! Kandulangu-nanyaka na mbenina i MIRI dàngu pakiringu-nanyaka na hidu pa-nggàbalungu,” wàna.

⁴⁷Ka pahàra-nanyaka na papanii-na i Muha paraïna i Harungu. Palai-nanyaka la honga banjaru ma-pauhi dàngu pakiringu-nanyaka panggàna-ha hidu pa-nggàbalungu. Ka tuna-nyaka dupa la pinu wàla epi i Harungu, hi nawunda-ya na lii podahu njala ndumana na banjaru.

⁴⁸Ka pànjangu-nanyaka na hidu pa-nggàbalungu, hi ndolaku-biana-nyaka i Harungu la padua tau maluri dàngu tau mameti.

⁴⁹Da mameti la rehi nu tau 14.700-ya, nda datama-a la diha da mameti la rehi patula ngganggangu-na i Kora.

⁵⁰Ba na-pànjangu-ka na hidu pa-nggàbalungu, beli-nanyaka lai Muha i Harungu la pindu Maüna i MIRI.