Read Kambera DIHA 17 Bible Online

DIHA 17 - Kambera bible

DIHA 17

¹I MIRI napanii-nya i Muha,

²“Paràha-nya na banjaru Ihirailu ka da wuanggau hakambulu dua mbungu tokungu, nimbihu kabihu hapungu tokungu, na-wuangu-ya paraï liku uru kabihu. Tulihu-ya na tamu nimbihu liku uru la tokungu-na,

³tàka na tamuna i Harungu la tokungu kabihu Lewi. Lupangu ninguma hapungu tokungu nduma nimbihu liku uru kabihu.

⁴Ngàndiha nuda da tokungu la Maünggu ka bànjalu-ha la hangga Pàti Pa-ràndingu la ngia pakàli hàmburu-nggunggau nyumu.

⁵Napa na-kalunga na tokungu-na na tau na pambàda pindinggu. Tuna nu na pawàngu ba ku-papànja-nya napa, nahali-da ura dedi da tau da ma-nutakungu pa-hoputu ndubakukau nyumu,” wàna.

⁶Na-patàka-nja da tau Ihirailu rukuna nuna i Muha. Ka maràngga wuangu danyaka hapungu tokungu lai Muha da liku uruda, hapungu tokungu nduma nimbihu kabihu. Hakambulu dua mbunguda mbuu ndàbada, tàka na tokungu-na i Harungu nimanya la hongada.

⁷Tunaka nu bànjalu ndàba-nahaka i Muha nuda da tokungu daa la Maüna i MIRI la hangga Pàti Pa-ràndingu.

⁸La lodu haromu-na, ba natama-ka i Muha daa la Maüna i MIRI, ita-nanyaka ba mbàda kalunga-naka na tokungu-na i Harungu, nu na tokungu kabihu Lewi. Ninguka mahanggebarunya nuna na tokungu, na wàla dàngu na tuu wuana, wua manila wara mambàda ihi!

⁹Piti ndàba-nahaka i Muha nuda da tokungu hi na-paita-nja la tau Ihirailu. Daita-yaka nu na matumbu, piti beli-dahaka da tokungu-da da nimbihu liku uru.

¹⁰Tunaka nu panii-nanyaka i Muha i MIRI, “Bànjalu beliya na tokungu-na i Harungu la hangga Pàti Pa-ràndingu. Hi lupangu pahàmu-ya nuna na tokungu, màta ka panamu wànya na banjaru Ihirailu nu na makàli patula ngganggangu, ba dameti-ma napa jàka nda da-pànjangu pa-hoputu,” wàna.

¹¹I Muha na pahàra-nya na hupu liina i MIRI.

¹²Hàla, napanii na banjaru Ihirailu lai Muha, “Jàka tuna nu, hanggàmaru-duma-nyaka! Tàlaru-manyaka napa!

¹³Jàka lupangu-ma nameti na tau na malihi-nya na Maüna i MIRI, nda nggàra-apa pamonu-ma duma nyuma!” wàda.