Read Kambera DIHA 19 Bible Online

DIHA 19 - Kambera bible

DIHA 19

¹I MIRI nawua-nja pareta i Muha dàngu i Harungu

²la pawua-ha yiada da kalaratu la banjaru Ihirailu: Piti heu bai hapi rara manda ningu nyurangu pandedi pa-bukungu ndoku.

³Wuanya i Ratu Eliahàru nuna na hapi. Lupangu-ma ngàndiya nuna na banda la hambeli ngia pa-pamaüngu ka mangu pa-hambàli-ya la hangga ratu.

⁴Hàlaka nu lupangu-ma napiti hakudu wai riana nuna na banda i Eliahàru ka namàngu pa-paiharu papihu wundanya hanggangu la tubana na Maüna i MIRI.

⁵Mbutana nuna na banda papohu-nya na manula-na, na toluna na riana dàngu na ihi kambuna, lupangu-ma tunuya la hangga ratu.

⁶Na pangalangu-na lupangu-ma napiti hakudu ai kajiu, ha-kaleki rumba hihupu dàngu ha-walangu liku rara na ratu hi nanduha-ha la epi.

⁷Hàlaka nu lupangu-ma na ratu na bahaha da pakina dàngu ka na ihu. Hàlaka nu peku tama-naka la ngia pa-pamaüngu, na nyuna na-iraku-mapa lundu tama lodu.

⁸Na tau na matunu-ya nuna na hapi lupangu-mbu nabaha-ha da pakina dàngu ka naihu; pa-daingu iraku-mbunapa nyuna lundu tama lodu.

⁹Hàla, lupangu pauhi-manya na aüna nuna na hapi paraï haàtu manda iraku, ka tuya la hambeli ngia pa-pamaüngu la pangia maili. Hi pahàmuya lai nu nuna na aü ka jiaya na pawàngu ba na-paloku wai lii na banjaru Ihirailu nduma la ngera hawari podahu njala.

¹⁰Na tau na ma-pauhi-nya na aüna nuna na hapi lupangu-ma nabaha-ha da pakina, na nyuna na-iraku-mapa lundu tama lodu. Na kalaratu yiana na pa-daingu lundu nu - nu, ka nduma tau Ihirailu, ka nduma tau hangàdangukai ma-ngiangu la pahiku da nyuda.

¹¹Na tau na ma-jonggaru mameti, pihu mbua lodu mandaina pa-iraku.

¹²La lodu patailu wàna dàngu la papihu wàna lupangu-ma nyuna na-hawari wikina wàngu wai lii hawari; hina duka hi naili. Na nyuna jàka nda na-hawari wikina la lodu patailu wàna dàngu la papihu wàna, pa-daingu iraku-manapa.

¹³Na tau na ma-jonggaru mameti tàka hi nda na-hawari bia wikina, tau iraku-maya, nadu ba ndedi-dupa paburi-nya wai pawunda wàngu lii hawari. Pa-iraku-nanya na Maüna i MIRI dàngu rukuna nuna-duka hi nda padiha-ayapa ba haàtu anggota banjaru-na i Alaya.

¹⁴Jàka ningu haàtu mameti daa la hau maü, nggamu biaya na maninya daa la maü ba nameti nuna na tau, jàka ndia nggamu biaya na matama-nya nuna na maü, na-iraku lundu pihu mbua lodu.

¹⁵Nimbihu-da da kadihi da wurungu da manda ningu ndàbida da-iraku-mbu.

¹⁶Nimbihu-na na tau na ma-jonggaru tau pa-pameti jàka ndia mameti wikina-kai la woka na-iraku lundu pihu mbua lodu. Hama-manai na tau na ma-jonggaru reti jàka ndia rii kawundu mameti.

¹⁷Ka hawari-ya nuna na tau na ma-iraku, lupangu-ma piti hakudu aüna na hapi rara na pambàda tunu nduma podahu njala. Nuna na aü lupangu-ma patuya la hau wurungu, hi tunya wai papiti welingu la wai ma-lulungu.

¹⁸La ngera na ma-wungangu, nu jàka ningu haàtu mameti la maü, lupangu-ma na haàtu tau manda iraku napiti hakaleki rumba hihupu, ka nalàbu-ya la wai nuna, ka mangu pa-paiharu-nya nuna na maü dàngu mbuu ndàbada da maninja daa la maü, dàngumbu da tau da maninja lai nu. La ngerana na ma-pandàkingu, nu jàka ningu haàtu ma-jonggaru mameti, pangia reti jàka ndia rii kawudu mameti-kai, na tau manda iraku lupangu-ma na-paiharu-nya na tau na ma-iraku hama tuna na pawàngu la ma-wungangu.

¹⁹Lupangu-ma na-paiharu-nya la lodu patailu wàna dàngu la lodu papihu wàna. Nu la lodu papihu wàna nggànapu-nanyaka na lii hawari-ya nuna na tau na ma-iraku. Hàlaka nu lupangu-ma nabaha-ha da pakina ka namangu paihu. Ka ili-nanyaka la rehi tama lodu.

²⁰Na tau na ma-iraku tàka hi nda nawunda biaya na lii hawari wiki, pa-daingu iraku-mana ba ndedi paburi-nya na wai pawunda wàngu lii lai nyuna. Pa-iraku-nanya na Maüna i MIRI, dàngu nda padiha-ayapa ba anggota banjaru-na i Alaya.

²¹Yiana na kalaratu pawàngu-maya lundu nu - nu. Na tau na ma-paiharu-nya na wai pawunda wàngu lii hawari, lupangu-mbu na bahaha da pakina, dàngu na tau na panggàna-na nu na wai na-iraku lundu tama lodu.

²²Da banda da malanja pa-jonggaru tau ma-iraku da-iraku-ma, dàngu na tau hawiangu na ma-jonggaru-ya na iraku-mbu lundu tama lodu.