Read Kambera DIHA 20 Bible Online

DIHA 20 - Kambera bible

DIHA 20

¹La wulangu kawunga-na tàka-nanyaka nggubulu-na na banjaru Ihirailu la maràda telangu Njingu hi da-padaingu la Kandihu. Lai nu nameti i Miriyàmu hi taninya.

²La hau rehi nda ningua wai la ngia pa-pamaüngu, ka mai-danyaka nuda da tau pa-langgungguru-nja i Muha dàngu i Harungu

³ba dàngu hoputu-da dapanii, “Na hàmu-kipa làti jàka mbàda meti karia-manja da angu dedima la hanggana i MIRI!

⁴Ka nggikina hi ikaria-nggama la maràda telangu yiana? Jia-yaka ihu ka mameti karia-nja da bandama lai yiahu?

⁵Nggàra-yaka na linguna bai paluhu-kama welingu la Mehiru hi ingandi-kama lai yiahu la pangia mayila na manda peku la patondu-nya ngga - nggàra? Lai yiahu nda ningua uhu nggàndumu, nda ningu pingi kapilitu nda ningu angguru, dàngu nda ningua njalima. Jiapa wai pa-unungu-a nda ningumbu!” wàda.

⁶Dalaku maraunja nuda da tau nyuda i Muha dàngu i Harungu, hi da-ndolaku la hangga pindu Maüna i MIRI. Da marubuku lai nu tàka na handaraku ba ninya i MIRI nahambilanja nyuda.

⁷Panii-nanyaka i MIRI lai Muha,

⁸“Pitiya na tokungu na maninya la hangga Pàti Paràndingu, hàla, lupangu-ma nyumu dàngu i Harungu kai pauhi-nya nggubulu-na na banjaru. Màtawa la hanggada nyuda kau panii dànya na tandula watu lai nu, ka na-patapanjirungu wai. Tuna nu na pawàngu bau paluhu-ya na wai welingu la tandula watu nuna, ka peku unungu-na na rayatu dàngu da bandada nyuda,” wàna.

⁹Ka lua-nanyaka i Muha papiti-ya nuna na tokungu hama tuna na papanii-na i MIRI la hupu liina.

¹⁰Hàla, nyuna i Muha dàngu i Harungu da-pauhi-nya na banjaru la hanggana nu na tandula watu. Hi napanii i Muha, “Pa-tingingu, ha dimi banjaru patula ngganggangu! Welingu la tandula watu yiana-ka bàdi ba ma-paluhu-nggai wai?” wàna.

¹¹Ka wulaku-nanyaka nu na tokungu i Muha hi napalu wànya na tandula watu lupa na pandua wundangu. Ka tapanjiru-nanyaka na wai ba dàngu mbangatu-na, hi peku unungu ndàbana na tau dàngu da banda.

¹²Na nyuna i MIRI natenda-nja i Muha dàngu i Harungu, “Rukuna ba ndai wai hàmuka la pa-paloha-nya, na kawaha matua-nggu la hangga banjaru Ihirailu, nda jia kapipi-aminja nyuda patama la tana pambàda njanjinggunja,” wàna.

¹³Nuna mata wai Marimba[4]-ya. Lai nuduka ba da-hoputu-nya i MIRI da tau Ihirailu, dàngu lai numbu, na paloha-nya na kawaha matua-na i MIRI la banjaru nuna.

¹⁴Tunaka nu welingu la Kandihu na-paràha-nja da papalewa i Muha ka dalua la hanggana na maràmba Endumu. Dapanii nyuda, “Nyuma welima la kabihu - kabihu Ihirailu na ma-pakalembingu-mapa dàngu nyunu Umbu. Upii-manya Umbu na handuka na mambàda nggàna-kama nyuma.

¹⁵Da boku la mangilu-ma dalua la Mehiru hi da-ndàdiku lai nu dira dangu ndaungu mandaina. Manda hàmuya ba da-paluangu limada, na banjaru Mehiru hanggangu la boku la mangilu-ma dàngu lai nyuma,

¹⁶tàka nyuma hi mawara-nya i MIRI pakarai pa-ndulangu. Natingi-ya na warama hi na-palewa-nggama haàtu papalewa. Nuna na papalewa na-kapipi-kama paluhu welingu la tana Mehiru. Nàhu ningga-maka la Kandihu, nu na hau paraingu la padira ngaba tanamu nyumu Umbu.

¹⁷Ma kamahi-nggau Umbu kau pahia-ki-nggama làti ka malii ningu la tana yiana. Nyuma dàngu da bandama nda jia hiliru-ama duma welingu la ànda, dàngu nda jia tama-ama duma la wo - woka, jàka ndia la wo - woka angguru. Nda jia unungu-ama la hu - humuru-mu nyumu Umbu. La tana pahàka mànuma-kama duma napa malii ningu lundu maluhu welingu la tana ngabamu nyumu Umbu,” wàda.

¹⁸Na nyuna dahema da tau Endumu, “Nda mabihu-a duma pa-pahia-nggai nyimi palii ningu la tana ngabama nyuma. Jàka patidungu-maminya, napa maluhu pahada-nggai!” wàda.

¹⁹Dapanii da tau Ihirailu, “Napa malii ningu la tana pahàka-ma duma, tàka ngera hama tuna nyuma jàka ndia da banda-makai maunu-nja da waimi, ma-mbayaru-ma duma napa. Mbuhangu-manya palii ningua duma,” wàda.

²⁰Dahili panii da tau Endumu, “Màtangu!” wàda. Ka luhu-danyaka nyuda dàngu tanatara ma-kapingatu pahada-nya na banjaru Ihirailu.

²¹Ka beli-danyaka da tau Ihirailu hi dahimbu ànda hau ba nda da-pahia-nja tau Endumu palii ningu la ngaba tanada nyuda.

²²Nggubulu-na na banjaru Ihirailu da-dunjaku-nya na Kandihu hi datàka la Palindi Hòru,

²³la padira Endumu. Lai nu napanii i MIRI lai Muha dàngu i Harungu,

²⁴“Nda jia tama-ananya i Harungu na tana pambàda njanji-nggunya na banjaru Ihirailu; napa nameti rukuna bai ndubaku-ya na hupu liinggu la Marimba, nyimi pa-kadua-mi.

²⁵Hei karia-nyawa la Palindi Hòru i Harungu dàngu i Eliahàru na anana.

²⁶Kau kalàba-ha lai nu da pakina i Harungu kau pakàna-nja lai Eliahàru. Napa nameti lai nu i Harungu,” wàna.

²⁷Ka pahàra-nanyaka na paniina i MIRI i Muha la hupu liina. Hei-danyaka la Palindi Hòru i Muha, i Harungu dàngu i Eliahàru ba dàngu ita-danja paraï banjaru Ihirailu nggubulu-na.

²⁸Hàla, kalàba-nahaka da pakina i Harungu paraïna i Muha hi na-pakàna-nja lai Eliahàru. La pinu palindi nuna-duka nameti ningu i Harungu, ka puru beli-danyaka i Muha dàngu i Eliahàru.

²⁹Rongu ndàba-nanyaka na banjaru ba mbàda meti-naka i Harungu, hi da wai mata wai wiranya tailu kambulu lodu mandaina.