Read Kambera DIHA 23 Bible Online

DIHA 23 - Kambera bible

DIHA 23

¹Napanii i Mbiliamu lai Mbalàku, “Pahada-nggawa pihu mbua ngia pawotu maraku lai yiahu, dàngu payema-njawa yiahu pihu ngiu hapi mini dàngu pihu ngiu mbimbi bumbu,” wànanya.

²Pahàra-nanyaka hama tuna na papanii-nanya i Mbiliamu paraïna i Mbalàku. La pinu nimbihu-da da ngia pawotu maraku dawotu maraku nyuda heu hapi mini dàngu heu mbimbi bumbu.

³Tunaka nu napanii lai Mbalàku i Mbiliamu, “Ndolaku-wa yiahu la lihi kameti maraku patunu-mu. Ba talànga luanggu nu patàru-ya jàka na-mbuhangu-du papahàmburu dàngga i MIRI, jàka ndia. Napa kupanii-nggaunja mbuu ndàbada da papanii-nangga nyungga i MIRI,” wànanya. Hàla, laku meha-nanyaka i Mbiliamu la pinu hau tandula,

⁴tàka hi namai lai nu i Ala lai nyuna. Napanii i Mbiliamu lai Ala, “Mbàda pahadangu-ngguka pihu ngia pawotu maraku, hi kuwotu maraku, heu hapi mini dàngu heu mbimbi bumbu la nimbihu-da nuda da ngia pawotu maraku,” wàna.

⁵Tunaka nu i MIRI napanii-nya i Mbiliamu, jàka nggàraya bàdi na patiki-na napa, hàla, hi na-paràha-nya pabeli lai Mbalàku pa-patàka-nya na lii languna i MIRI lai nyuna.

⁶Ka beli-nanyaka hi natàka-nya Mbalàku ba ndolaku-mana-nyapa la lihina na kameti maraku patunu-na, anguda mbuu ndàbada da liku uru Muapu.

⁷Tàka i Mbiliamu hi natiki-ya na manyura yiana, “Welingu la Aràmu, welingu la ma-palindingu lai nu la pahunga lodu, napaau-ngga nyungga i Mbalàku na hanganji Muapu, napanii, ‘Maiwa, kareuku-ngga ndumanggu, ràtu-nyawa na banjaru Ihirailu!’ wànangga.

⁸Jia pekunggu-kaka nu pa-ràtungu, jàka nda na-ràtungu i Ala? Jia pekunggu-kaka nu pa-wuangu hukungu jàka nda na-wuangu hukungu i MIRI?

⁹Welingu la pinuda da palindi kuita-ha nyuda; welingu la pinuda da tandula ku-tàngaru-ha nyuda. Tàngaru-ha, hau banjaru mandora meha-maha, nda datama-a la kaloka-da da banjaru hawiangu.

¹⁰Da ana umbuku-na i Yakupu hama tuna kumburu tanaha ba nda pataü-ha danguda; na banjaru Ihirailu ma-kanjupu danguya. Màla àruki la metinggu ka tau pa-tutungu-ka màla àruki na hupu njàpu luringgu ka hama tuna na hupu njàpu lurida da tau nuda,” wana.

¹¹Hàla, napanii i Mbalàku lai Mbiliamu, “Ka nggàra-yaka yiana na pawunda-mu hanggangu lai nyungga? Hi ku-karia-nggau yiahu jia kau ràtunja da muhunggu wànggu làti. Tàka pa-kanyuru pàku amuha,” wànanya.

¹²Nahema i Mbiliamu, “Jiaya na papanii ba wànangga i MIRI-a duku na papanii-nggu,” wàna.

¹³Hàla, hi napanii i Mbalàku lai Mbiliamu, “Màla, ta-kariangu la hau pangia; welingu lai nu peku ita-munya hawiangu-a na banjaru Ihirailu. Ràtu-njawa nyuda welingu lai nu,” wànanya.

¹⁴Ka karia-nanyaka i Mbiliamu paraïna i Mbalàku la maràda Hopimu la pinu Palindi Pinggàhu. Lai nu na-pahadangu-mbu pihu mbua ngia pawotu maraku dàngu hi nawotu heu hapi mini dàngu heu mbimbi bumbu la nimbihu-da nuda da ngia pawotu maraku.

¹⁵Napanii i Mbiliamu lai Mbalàku, “Ndàdikuwa yiahu, la lihi kameti maraku patunu-mu, ba talànga luanggu nu pa-hàmburu-ya i MIRI lai nu,” wànanya.

¹⁶I MIRI na-tàbuku-ya i Mbiliamu hi napanii-nya jàka nggàraya bàdi na patiki-na, hàla, hi na-paràha-nya pabeli lai Mbalàku pa-patàka-nya nu na lii languna i MIRI.

¹⁷Ka beli-nanyaka i Mbiliamu hi natàka-nya i Mbalàku ba ndolaku-mana-nyapa la lihina na kameti maraku patunu-na, anguda ba hapajia-ha da liku uru Muapu. I Mbalàku na-paàrangu nggàraya na papanii-na i MIRI,

¹⁸hàla tiki-nanyaka yiana na manyura i Mbiliamu, “Ha Mbalàku, anana i Hipuru, mainguwa, patingi-nyawa jàka nggàraya na papanii-nggu.

¹⁹I Ala nda hama tuna tau-aya na mamuda la papeka halaera dàngu na ma-mbuhangu pa-kambàliku. Jàka mbàda pa-njanjingu-naka i Ala, jiangu-ma duna na pahàra-nya! Jàka napanii Nyuna, lupangu na-hàrangu-ma napa!

²⁰Nduma pa-kanyurungu duku ba paràha-ngga; tàka jàka na-pakanyurungu i Ala nda peku yila beli-anggunya.

²¹Lai Yakupu nda paita-aya na akatu; la Ihirailu nda paita-aya na handuka. I MIRI, na Alada nyuda, naangu-nja nyuda. Da-payaaungu ba dawara: Hanganji-maya duna Nyuna! ba wàda.

²²I Ala ma-karia-nja nyuda welingu lai Mehiru; hama tuna hapi mbàtingu matàmba-ya ba na-pabera ndumada nyuda.

²³Nda ningua boharu ma-duluku ba hangganya i Yakupu nda ningua manyura ma-pawidi ba hangganya na Ihirailu. Rukuna nuna na banjaru, napanii napa na tau, ‘Tàngaru-ya na pa-hangàtarungu na pawunda-na i Ala!’ ba wàda.

²⁴Ba na-hadangu nuna na banjaru hama tuna bai hingaya, dàngu ba nandola bànduku hama tuna hinga miniya. Nda jia manyomba-ana jàka ndedi nanganya na payàpa-na dàngu naunu-nya na riana na pa-njàkilu-na,” wàna.

²⁵Hàla, panii-nanyaka i Mbalàku lai Mbiliamu, “Jiaka-wa jàka ndau bihu-madu nyumu paràtu-nya na banjaru Ihirailu; na nyuna àmbu jia pa-kanyuru-muhaka!” wànanya.

²⁶Nahema i Mbiliamu, “Ka nda mbàda panii-anggunggau ba lupangu-ma duku ku-pahàra-nya na papanii-nangga i MIRI la hupu liina?” wàna.

²⁷Napanii i Mbalàku, “Màla-ndawa ka talua ningu la hau pangia. Raï ai duna hi na-mbuhangu bia i Ala pa-pahia-nggau nyumu lai nu, kau ràtu-ngganya na Ihirailu,” wàna.

²⁸Ka karia-nanyaka i Mbiliamu la pinu Palindi Piuru na-mahanggangu la maràda telangu.

²⁹Napanii i Mbiliamu lai Mbalàku, “Pahadangu-wa pihu mbua ngia pawotu maraku lai yiahu dàngu payema-njawa yiahu pihu ngiu hapi mini dàngu pihu ngiu mbimbi bumbu,” wàna.

³⁰Pahàra-nanyaka hama tuna na papanii-na i Mbiliamu paraïna i Mbalàku. Nawotu kameti maraku heu hapi mini dàngu heu mbimbi bumbu la pinu nimbihu-da da ngia pawotu maraku.