Read Kambera DIHA 24 Bible Online

DIHA 24 - Kambera bible

DIHA 24

¹Nàhu pii-nanyaka i Mbiliamu ba na-mbuhangu i Ala ka na-pakanyuru-nya na banjaru Ihirailu. Tuna nu duka hi nda nalua pahimbu ta - tanda hama tuna na pawàna ba ndedipa nu. Na-tàngaru hanggangu la maràda telangu i Mbiliamu,

²hi naita-ya na banjaru Ihirailu la kali - libaru uma tera pa-namatu-nya na kabihu banjaru-da. Tàka na Ngahuna i Ala najuju-ya i Mbiliamu,

³hi lupa natiki-ya yiana na manyura-na, “Yiana-ya na lii languna i Mbiliamu anana i Mbeuru, na lii na lawiti-na na haàtu maharii matana

⁴na mambàda ronguha da papanii-na i Ala dàngu na maita-ya na pa-paita-na i Mahupu Mbiha, dàngu tanggilungu-na, tàka na nyuna wàngu mata ma-pabulangu.

⁵Kanjupu manandangu-ha da maümu ha Yakupu, dàngu da ngia pa-ngiangu-mu ha Ihirailu!

⁶Hama tuna lolangu ma-nggailaru ba na-tawàlahu, jàka ndia hama woka ngia pambawa la hingi luku; hama tuna pingi homa pa-pamula-na i MIRI, jàka ndia hama pingi ai kajiu la hingi luku.

⁷Da-ngalangu wai urangu mabundu làndangu, da wini tondungu dangala padangu wai. Na-bunjuku na hanganji-da napa, narihi-nya i Anggàku, dàngu pa-pabokulu-ya napa na pa-hanganji-na.

⁸I Ala na maluhu ngàndiha nyuda welingu la Mehiru, hama hapi mbàtingu matamba-ya ba na-pabera ndumada nyuda. Dahoba pambuta-ha da banjaru muhuda, da-pa-karunggutu-ha da rii kawudu-da, da panada dapata-ha.

⁹Nuna na banjaru hama hinga mini dàngu bai hingaya, na ma-pamuku dàngu na ma-manyomba. Nggamu matoru mbeni pa-pahada-nya? Màla àruki ka pa-kanyuru-nya na tau na ma-pakanyuru-nggau nyumu, dàngu ka ràtunya na tau na maràtu-nggau nyumu,” wàna.

¹⁰Ba dàngu mbenina na-pakawudu-ha da limana i Mbalàku, hi napanii lai Mbiliamu, “Hi ku-paaunggau kau ràtunja da papanggu wànggu làti, tàka pa-kanyuru pàku-muha lundu pandailu wundangu.

¹¹Laku memangu-kau nàhu kau beli la uma! Mbàda pa-njanjingu-ngguka làti la pawua-nggau wundamu, na nyuna nda na-pahiangu-a i MIRI kau ngalanja nu da wundamu,” wànanya.

¹²Nahema i Mbiliamu, “Ka nda mbàda panii-anggunja da papalewa-mungga,

¹³ka jiapa kau wua ndàba-nggahakai da àmahu bara dàngu da àmahu rara da maninja la umamu, ba nda jia pangga-anggunya na hupu liina i MIRI la pawunda-ya na pambuha eti wikinggu? Jiaya na papanii ba wànangga i MIRI-a duku na papanii-nggu,” wàna.

¹⁴Napanii i Mbiliamu lai Mbalàku, “Beli-nggunyaka nàhu la banjaru wikinggu. Na nyuna ba ndedi kulaku ku-mbuhangu pa-panamu haha-nggaunya jàka nggàraya napa na pawunda-na na banjaru Ihirailu la lodu malamiri hanggangu la banjaru-mu nyumu,” wànanya.

¹⁵Hàla, tiki-nahaka i Mbiliamu yiada da manyura, “Yiana-ya na lii languna i Mbiliamu anana i Mbeuru; na lii na lawiti-na na haàtu maharii matana

¹⁶na mambàda ronguha da papanii-na i Ala, dàngu peku tanda-nanya i Mahupu Jangga; na maita-ya na pa-paita-na i Mahupu Mbiha ba dàngu tanggilungu-na tàka na nyuna wàngu mata ma-pabulangu.

¹⁷Ku-itaya nyuna, tàka na nyuna nda nàhua; ku-tàngaru-ya nyuna, tàka na nyuna welingu la mamarau. Na haàtu hanganji na ma-welingu la Ihirailu, napa namaiya beri kandunu ma-handaraku-ya. Napa na-pamuburu-ha ba hapajia-ha da liku uru Muapu napa na-pamija-ya na banjaru-na i Hetu.

¹⁸Napa na-mandapu-nya muhuna na tana Endumu, na nyuna na banjaru Ihirailu nawunda pawunda ma-kaborangu.

¹⁹Welingu lai Yakupu napa na-kawudaku na haàtu maningu kawaha-na, na ma-patàlaru-ha da muhuna,” wàna.

²⁰Tunaka nu, nu la pa-bowangu ita-nahaka da tau Amaliku i Mbiliamu. Katiki-nanyaka yiana na manyura-na, “Welingu la mbutana na banjaru la pinu tana, jiaya na Amaliku na marihi pa-kawaha. Na nyuna la hupu njàpuna, yiana na banjaru, napa na-molungu-mbu, lundu nu - nu,” wàna.

²¹Nu la pa-bowangu ita-nahaka da ana umbuku-na i Kaingu i Mbiliamu, hi natiki-ya yiana na manyura-na, “Deningu-mana na pangia-mi ba na-nggàpulu-ma, beri hibu la pinu watu pungguru majangga-ya.

²²Na nyuna nyimi tau Keni, napa pa-patàlaru-kai, nda namandai-apa napa ba na-ndundilu-kai paraï Ahuru pa-tanawa-nggai,” wàna.

²³Tunaka nu natiki-mbuya yiana na manyura-na i Mbiliamu, “Hanggàmaru-duyaka! Nggamuipa maluri, jàka nawunda-ya nuna i Ala?

²⁴Na nyuna welingu la Hipuru nàmunja napa na hau kabàba kapalu, na Ahuru dàngu na Hembiru, na-pakàku-ha, tunaka nu na kabàba kapalu-mbu na-tàlaru-mbu napa,” wàna.

²⁵Hàla kamomatu-nanyaka i Mbiliamu pabeli la pangia-na, dàngu laku-mbunanyai duna i Mbalàku.