Read Kambera DIHA 27 Bible Online

DIHA 27 - Kambera bible

DIHA 27

¹I Helapehàtu tau malima-ha da anana kawini, nu i Màhala, i Nua, i Hòkula, i Miluka dàngu i Tiràhu. Na amana i Helapehàtu jiaya i Hepiru, na amana i Hepiru jiaya i Nggiliatu. Na amana i Nggiliatu jiaya i Makiru, na amana i Makiru jiaya i Manahi, tàka na amana i Manahi jiaya i Yuhupu.

²Da malima da anana i Helapehàtu dalua la hanggana i Muha dàngu i Ratu Eliahàru, hamangui ba hapajia-ha da liku uru dàngu nggubulu-na na banjaru na ma-pauhi la lihi pindu Maüna i MIRI. Dapanii nyuda,

³“Na amama nyuma na meti la maràda telangu dàngu nda ningua anana mini. Nda haàtu makiku-nya i Kora-aya nyuna, na ma-patula ngganggangu hangganya i MIRI. Nuna na amama nyuma, metina ruku njala wiki-mana duna.

⁴Tàka ka nggikina hi na-àlingu na tamuna welingu la banjaru Ihirailu rukuna ba nda ningu anana minia? Wuambu-nggàma duma nyuma tana kangeha-ma dàngu da angu dedina na amama,” wàda.

⁵Tunaka nu, patàka-nanyaka i Muha na palakara-da nyuda lai MIRI,

⁶tàka i MIRI napanii-nya i Muha,

⁷“Na pa-karuhi-da nuda da anana i Helapehàtu ma-paàndangu-maya. Ba tuna wua-njawa nyuda tana kangeha anguda da angu dedi amada. Na kangeha-na i Helapehàtu lupangu-ma papuru-nya la anana kawini.

⁸Panii-nyawa na banjaru Ihirailu jàka nameti na haàtu tau mini tàka hi nda ningui anana mini, na tana kangeha-na lupangu-ma pa-kangeha-nja da anana kawini.

⁹Jàka nda ningu anana kawini na tana kangeha-na pa-kangeha-nja la anguna paluhu.

¹⁰Jàka nda ningu anguna paluhu nuna na tanana ndumada da angu paluhu ama-naha.

¹¹Jàka nda ningu anguna paluhu jàka ndia angu paluhu amana nuna na tanana mangu angu kabihu nditaku-naha,” wàna. Yiana na pawàngu lupangu-ma na-pahàra-nya paraï tau Ihirailu ka hau kalaratu ukuya ba pareta pawua-na MIRI-ya la ngaruna i Muha.

¹²I MIRI napanii-nya i Muha, “Heiwa la Palindi Ambarimu kau tàngaru-ya welingu lai nu na tana na pawua-nggunya napa na tau Ihirailu.

¹³Bau hàlaka paita-ya, napa umeti hama tuna na ayamu i Harungu,

¹⁴nadu ba mbàda ndubaku-minyaka na hupu liinggu, nyimi pa-kadua-mi, la maràda telangu Njingu. Ba na-hoputu ndàbangga rayatu la Marimba, ndai bihua nyimi papeka-nja nyuda na kawaha-nggu rukuna nuna na wai,” wàna. (Nuna nu natumbu ningu la matawai Marimba la Kandihu la maràda telangu Njingu.)

¹⁵Ka hamayangu-nanyaka i Muha,

¹⁶“Ou, MIRI Ala, mawua-nya paluri wàngu la mbuu ndàbana na maluri, ku kamahi-nggau, patuji-wa haàtu na ma-ngalangu pa-kapipi-ya yiana na banjaru;

¹⁷haàtu na ma-ngalangu panjadi mini la ngora la rehi pabera-da. Àmbu màta-dunya yiana na banjaru-mu ka hama kabàba mbimbiha manda ningu mapawa-nja,” wàna.

¹⁸Napanii i MIRI lai Muha, “Paau-nyawa i Yuhua anana i Nungu. Haàtu tau ma-hakapu-maya nyuna. Pa-dàmbaku-nya limamu la pinu katiku-na.

¹⁹Paràha-nya pa-ndolaku la hanggana i Ratu Eliahàru, dàngu na nggubulu-na na banjaru. Lupangu-ma ubobaru-ya la hanggada nyuda mbuu ndàbada ba jiaya i Yuhua na hilumu nyumu.

²⁰Wuanya hawiangu na kawaha-mu nyumu lai nyuna, ka na-karadaku-nya banjaru Ihirailu.

²¹Lupangu-ma na karai timbangu lai Eliahàru i Yuhua, tàka napa i Eliahàru na-paàra-nya na pambuha-nggu Nyungga ba nawàngu Urimu dàngu Tumimu.[6] Tuna nu na pawàna i Eliahàru ba na-kapipi-ya i Yuhua dàngu nggubulu-na na banjaru la mbuu ndàba palakara pahangga-da,” wàna.

²²Ka pahàra-nanyaka i Muha mbuu ndàbana na papanii-na i MIRI la hupu liina. Na-paràha-nya pa-ndolaku i Yuhua la hanggana i Eliahàru dàngu nggubulu-na na banjaru.

²³Hama tuna na pambàda paniina i MIRI la hupu liina, pa-dàmbakungu-nanyaka limana i Muha la pinu katiku-na i Yuhua hi na-bobaru-ya ba jiaya i Yuhua na hiluna nyuna.