Read Kambera DIHA 28 Bible Online

DIHA 28 - Kambera bible

DIHA 28

¹I MIRI na-paràha-nya i Muha

²pa-patàka-nya na banjaru Ihirailu ba lupangu-ma da-kanuturu pahàmu-nja da re - rehi pa-kawuku ka dawotu-ha da hunggu maraku pangangu na maliya na etina i MIRI.

³Yiada-ha da kameti maraku da pawotu-mi bàdi lai MIRI: Nduma kameti maraku nimbihu lodu, dua ngiu ana mbimbi bumbu mahau ndauda manda ningu nyurada,

⁴na ana mbimbi na ma-wungangu lupangu-ma ka tuya kameti maraku la mbaru, tàka na padua ngiu wàda la malingu.

⁵Anguna nuna na ana mbimbi lupangu hunggu marakungu-mbu hau kilu kanguta pa-haürungu hau litaru mina haitungu mahàmu halawàla.

⁶Yiada-duhaka da kameti maraku patunu ma-padaingu da pa-kawunga wotu la Palindi Hinai. Na wau hiritu-na naliya na etina i MIRI.

⁷Anguna nuna na ana mbimbi, lupangu-ma wotu hunggu maraku hau litaru angguru na paburi la pinu ngia pawotu maraku.

⁸Ba hunggu maraku wànya na ana mbimbi na padua ngiu wàda la malingu, lupangu-ma hama tuna na pawàngu la hunggu maraku mbaru, pa-karia-nya wai angguru. Na wau hiritu-na nuna na kameti maraku naliya na etina i MIRI.

⁹La lodu Hangahu lupangu-ma hunggu marakungu dua ngiu ana mbimbi bumbu mahau ndauda manda ningu nyurada, dàmbu kilu kanguta pa-haürungu mina haitungu ka hunggu maraku mangejingu dàngu hunggu maraku wai angguru-ha.

¹⁰Yiana na kameti maraku patunu lupangu-ma pawotu-ya la nimbihu lodu Hangahu, ka ndàpilu kameti maraku nimbihu loduya dàngu na hunggu maraku wai angguru-na.

¹¹La kawunga nimbihu wulangu lupangu-ma hunggu maraku-nya kameti maraku patunu i MIRI wàngu dua ngiu kamboka hapi mini, heu mbimbi bumbu, pihu ngiu ana mbimbi bumbu mahau ndauda, nimbihu-da manda ningu nyurangu-ha.

¹²Nduma hunggu maraku mangejingu lupangu wotuma bàdi kanguta pa-haürungu mina haitungu; tailu kilu kanguta nduma nimbihu hapi mini; dàmbu kilu kanguta nduma mbimbi bumbu,

¹³dàngu hau kilu kanguta nduma nimbihu ana mbimbi bumbu. Yiana na kameti maraku patunu, kameti maraku pangangu-ya, tàka na wàu hiritu-na naliya na etina i MIRI.

¹⁴Anguda nuda da kameti maraku patunu wotumbu hunggu maraku wai angguru, dua litaru nduma nimbihu hapi mini, hau paradua litaru nduma mbimbi bumbu, dàngu hau litaru nduma nimbihu ana mbimbi. Nuna duyaka na kalaratu la ngera kameti maraku patunu da pawotu mànu la tànggalu hau nimbihu wulangu lundu kanjupu-ya na ndaungu.

¹⁵Nduma ndàpilu kameti maraku nimbihu lodu dàngu na hunggu maraku wai angguru-na, lupangu-ma ihunggu marakungu-mbu heu kamàmbi bumbu nduma kameti maraku jàmangu njala.

¹⁶La tànggalu hakambulu patu la wulangu hau, jia-yaka na Lodu Paha ndumana i MIRI.

¹⁷Na lodu ndàkina la tànggalu hakambulu lima pakiringu-nanyaka na Remi Roti Nda Patai Wolungu na mapihu mbua loduna mandaina. Nu la pihu mbua lodu àmbi ngangudu roti pa-pandoi wàngu tai wolu.

¹⁸La lodu kawunga-na na mbabu, lupangu-ma ipauhi kai lumungu dàngu àmbu ràmadu paràma mambotu.

¹⁹Wotuwa lai MIRI kameti maraku patunu dua ngiu kamboka hapi mini, heu mbimbi bumbu dàngu pihu ngiu ana mbimbi bumbu mahau ndauda, nimbihu-da àmbu ningudu nyurada.

²⁰Wotu-hawa da hunggu maraku mangejingu pa-karuhi, nu da kanguta pa-haürungu mina haitungu: tailu mbua kilu kanguta nduma nimbihu-da da hapi mini, dàmbu kilu ndumana na mbimbi bumbu,

²¹dàngu hau kilu nduma nimbihu-da da ana mbimbi bumbu.

²²Wotumbu heu kamàmbi bumbu ka kameti maraku jàmangu njalaya. Tuna nu na pawàngu bai wundaya na lii podahu njala ndumana na banjaru.

²³Mbuu ndàbada da kameti maraku yiada jiaha da ndàpilu maraku patunu mbaru da pakàli wàngu.

²⁴Ba hamana nuna na pawàngu lupangu-ma iwotu lai MIRI kameti maraku patunu lundu kanjupu-ya na pihu mbua lodu. Na kameti maraku yiana jiaya na ndàpilu kameti maraku nimbihu lodu dàngu na hunggu maraku wai angguru-na. Na wau hiritu-na nuna na kameti maraku naliya na etina i MIRI.

²⁵La lodu papihu wàna lupangu-ma ipauhi kai lumungu, dàngu àmbi ràmadu paràma mambotu.

²⁶La lodu kawunga-na na Remi Muti, na lodu mbabu ba hàla papihu mbua minggu, la rehi hunggu maraku-minja lai MIRI da uhu nggàndumu mabidi, lupangu-ma ipauhi kai lumungu dàngu àmbi ràmadu paràma mambotu.

²⁷Wotuwa lai MIRI kameti maraku patunu dua ngiu hapi mini, heu kamboka mbimbi bumbu dàngu pihu ngiu ana mbimbi bumbu mahau ndauda, nimbihu-da àmbu ningudu nyurada. Na wau hiritu-na nuna na kameti maraku patunu naliya na etina i MIRI.

²⁸Wotu-hawa da hunggu maraku mangejingu pa-karuhi, nu da kanguta pa-haürungu mina haitungu: tailu mbua kilu nduma nimbihu-da da hapi mini, dàmbu kilu ndumada da mbimbi bumbu,

²⁹dàngu hau kilu nduma nimbihu-da da ana mbimbi.

³⁰Wotumbu heu kamàmbi bumbu ka kameti maraku jàmangu njalaya. Tuna nu na pawàngu bai wundaya na lii podahu njala ndumana na banjaru.

³¹Da kameti maraku yiada dàngu da hunggu maraku angguru-na, jiaha da ndàpilu kameti maraku nimbihu lodu dàngu da hunggu maraku mangejingu.