Read Kambera DIHA 3 Bible Online

DIHA 3 - Kambera bible

DIHA 3

¹Yiada-ha da ihi umana i Harungu dàngu i Muha la rehi panii-dànanya i Muha la pinu Palindi Hinai i MIRI.

²Tau mapatu-ha da anana mini i Harungu: i Nandàpu na ma-maaya dehi hi mangupa i Ambihu, i Eliahàru dàngu i Itamàru.

³Pawotu-ha panjadi ratu nyuda wàngu lii pa-liringu lonahu la pinu katiku.

⁴Na nyuna mbàda meti-daka la maràda telangu Hinai i Nandàpu dàngu i Ambihu ba talànga hurungu-da lai MIRI ba dàngu ngàndida epi manda hida. Nda ningua anada pa-kadua-da. Jia ba tuna jiaha i Eliahàru dàngu i Itamàru da mapawai-ngaba ratu la ngala lurina i Harungu.

⁵Napanii i MIRI lai Muha,

⁶“Paràha-nya na kabihu Lewi ka na-hurungu la hangga, dàngu panduma-nja nyuda la palumu-nya i Harungu.

⁷Nyuda dapawai ngaba la Maünggu dàngu lupangu-ma dalumu-nja ba hapajia-ha da ratu, hamangui nggubulu-na na banjaru wàngu paràma-da nu la Maünggu.

⁸Na wai ngabada nyuda jiaya la pa-paloku-ha mbuu ndàbada da pamàtu wàna na Maünggu dàngu la paràma-ha da paràma la Maünggu ka hiluda da tau Ihirailu-ha.

⁹Welingu la banjaru Ihirailu didi-aya na kabihu Lewi na pawua-nggu wai ngaba ka da-padaingu palumu-nja i Harungu dàngu wàla wuana.

¹⁰Tàka i Harungu dàngu da anana lupangu-ma kuwotu-ha la pa-palaku-ya na wai ngaba ratu; hinggilu-da nyuda, jiapa ka nggamu-yakai na ma-kamangu pawunda-ya nuna lupangu-ma pa-hukungu metiya,” wàna.

¹¹Napanii i MIRI lai Muha,

¹²“Nàhu da tau Lewi kupindi-ha la panjadi mangunggu. Ba ku-pameti-ha mbuu ndàbada da kawunga ana banjaru Mehiru, ku-pahinggilu-haka da kawunga anana mini na tau Ihirailu ka nduma-ngguha dàngu da banda mbuu ndàbada da ma-kawunga dedi. Mbuu ndàbada nuda mangu-nggunja. Hiluda da kawunga anana mini na Ihirailu, kupiti-ha da tau Lewi ndumanggu; nyuda jia-mahaka da ndumanggu. Nyungga MIRI-ka,” wàna.

¹³

¹⁴La maràda telangu Hinai na-paràha-nya i Muha paraïna i MIRI

¹⁵pa-pandoi-nja huratu tamuda da tau Lewi pa-namatu-nya na kalibaru dàngu na biliku-da nimbihu-da; nimbihu-da da anakeda mini da mahau wulada lupa da marihi-ka lupangu tulihu-maha da tamuda.

¹⁶Ka pahàra-nanjaka nu da pareta-na i MIRI paraïna i Muha.

¹⁷Tau matailu-ha da anana mini i Lewi: i Nggerihongu, i Kehàtu dàngu i Marari. Jia-mahaka nyuda, yiada da boku la mangilu-da da kalibaru matamu-nja da tamuda nyuda. Tau madua-ha da anana mini i Nggerihongu: i Lipuni dàngu i Himei. Tau mapatu-ha da anana mini i Kehàtu: i Àmuràmu, i Yihàru, i Hemburungu dàngu i Uhialu. Tau madua-ha da anana mini i Marari: i Màhali dàngu i Muhi. Jia-mahaka nyuda yiada da boku la mangilu-da da biliku da matamu-nja nyuda.

¹⁸

¹⁹

²⁰

²¹Na kalibaru Nggerihongu jiaha da biliku Lipuni dàngu Himei.

²²Da mini la kalibaru Nggerihongu da mahau wulada hamangui da marihi welingu lai nu da pa-tulihu 7.500-ha nggubulu-da.

²³I Eliyahàpu anana i Layilu jiaya na maliku urunya nuna na kalibaru. La ngia pa-pamaüngu-na na banjaru Ihirailu na kalibaru nuna la patama loduha la kajia Maüna i MIRI da-ngiangu ningu.

²⁴

²⁵Ba paloku-ya na Maüna i MIRI nyuda ma-hanobaku-ya pa-tanara-ya na Maü dàngu na ndàdana, na tera la pindu tamana,

²⁶na tera dindi la talora na ma-winggiru-nya na Maü dàngu na ngia pawotu maraku, dàngu na tera dindi la pindu talora. Nyuda ma-hanobaku-ha mbuu ndàbada da paràma ba paloku-ha nuda da malanja.

²⁷Na kalibaru Kehàtu jiaha da biliku Àmuràmu, Yihàru, Hemburungu dàngu Uhialu.

²⁸Da mini da mahau wulada hamangui da marihi welingu lai nu la kalibaru nuna nadangu-da tau 8.600-ha nggubulu-da. Nyuda da pawai ngaba pa-paloku-ha da malanja la Maüna i MIRI.

²⁹I Elihapàngu anana i Uhialu jiaya na maliku urunya nuna na kalibaru. La ngia pa-pamaüngu, na kalibaru nuna la luru Maüna i MIRI-ya na-ngiangu ningu.

³⁰

³¹Nyuda ma-hanobaku-ya la pa-tanara-ya na Pàti Pa-ràndingu, na menja, na tandai palita, da ngia pawotu maraku, da pakakahu da paràma wàda la Rowa Matua ba hapajia-ha da ratu, dàngu na tera dimbaku na ma-padira-nya na Rowa Matua. Nyuda ma-hanobaku-ha mbuu ndàbada da paràma ba paloku-ha nuda da malanja.

³²Na liku uru kabihu Lewi jiaya i Eliahàru, anana i Harungu. Nyuna ma-hamata-ha da tau maràma la Rowa Matua.

³³Na kalibaru Marari, jiaha da biliku Màhali dàngu Muhi.

³⁴Da mini da mahau wulada hamangui da marihi welingu lai nu la kalibaru nuna na danguda tau 6.200-ha nggubulu-da.

³⁵I Hurialu anana i Ambihaïlu jiaya na maliku urunya nuna na kalibaru. La ngia pa-pamaüngu, na kalibaru nuna la dia Maüna i MIRI-ya na-ngiangu ningu.

³⁶Nyuda ma-hanobaku-ha da karangga-na na Maü, da patengangu-na, da kambaniru-na, da latana dàngu mbuu ndàbada da pakakahu-na dàngu mbuu ndàbada da paràma ba paloku-ha nuda da malanja.

³⁷Jia-mbuha da kambaniru, da lata, da pandiku dàngu da liku ndumana na talora la hambeli.

³⁸La ngia pa-pamaüngu, i Muha dàngu i Harungu hamangui da anada lupangu-ma la hangga Maüna i MIRI-ha da-ngiangu ningu, la pahunga loduna. Nyuda ma-hanobaku-ya na lii lumungu nduma banjaru Ihirailu la Rowa Matua. Hinggilu-da nyuda nggamu biaya na ma-kamangu pa-paloku-ya na paràma nuna lupangu-ma pa-hukungu metiya.

³⁹Mbuu ndàbada da mini la kabihu Lewi da mahau wulada dàngu da marihi welingu lai nu da pa-tulihu-na i Muha pa-namatu-nya na kalibaru-da nimbihu-da nunjuya na pareta-na i MIRI, nggubulu-da tau 22.000-ha danguda.

⁴⁰I MIRI napanii-nya i Muha, “Mbutada da anakeda mini kawunga ana Ihirailu mangunggu Nyunggaha. Tulihu-ha da tamuda nyuda da mahau wulada hamangui da marihi welingu lai nu. Na nyuna na hiluda nyuda, paloha-nggunyaka ba mangunggu Nyunggaha mbuu ndàbada da tau Lewi. Nyungga MIRI-ka! Dàngu da banda tau Lewimbu ku-paloha-nya jiaha da mahilu-ha mbuu ndàbada da banda ma-kawunga dedi la banda banjaru Ihirailu,” wàna.

⁴¹

⁴²Pahàra-nanyaka na pareta-na i MIRI paraïna i Muha; na-tulihu ndàbaha da tamu anakeda mini kawunga ana

⁴³da mahau wulada hamangui da marihi welingu lai nu. Nggubulu-da tau 22.273-ha.

⁴⁴Hàla hi napanii i MIRI lai Muha,

⁴⁵“Pa-hinggilu-ha da tau Lewi ndumanggu Nyungga ka jiaha da hiluda mbuu ndàbada da kawunga anakeda mini Ihirailu; dàngumbu da banda tau Lewi ba hiluda da banda tau Ihirailu-ha.

⁴⁶Rukuna ba darihi 273 da mini kawunga ana Ihirailu welingu la tau Lewi nggubulu-da, ipapuru-njaka bàdi nuda da rihida.

⁴⁷Nduma nimbihu-da da ana, lupangu-ma imbayaru lima àmahu bara pa-namatu-nya na pa-bilangu pakàli wàngu la Maünggu;

⁴⁸wuaha nuda da àmahu lai Harungu dàngu da anana,” wàna.

⁴⁹Pahàra-nanyaka na pareta-na i MIRI paraïna i Muha.

⁵⁰Napiti 1.365 àmahu bara,

⁵¹hi nawua-ha lai Harungu dàngu da anana.