Read Kambera DIHA 31 Bible Online

DIHA 31 - Kambera bible

DIHA 31

²“Tunguwa hilu kiringu la tau Mindiangu rukuna na pambàda wundada la tau Ihirailu. Hàlaka nu kau mangu pameti,” wànanya.

³Ka panii-nanyaka i Muha la tau Ihirailu, “Hawa - waritu-wa ka pabera; lupangu-ma ihadanya na tau Mindiangu, kai wundaya nahuku-nanja nyuda i MIRI.

⁴Welingu la nimbihu kabihu banjaru Ihirailu lupangu-ma ihawaritu 1000 panjuri ka ndàharungu pa-pabera,” wàna.

⁵Ka pindi-danyaka tau 1000 welingu la nimbihu kabihu banjaru Ihirailu, nggubulu-da 12.000-ha da ma-hawaritu ka pa-hànjalungu.

⁶Ka paràha-nanjaka nyuda paraïna i Muha ka dalua pa-pabera anguda i Pineha anana i Ratu Eliahàru. I Pineha nangàndi-ha da banda matua dàngu da taropitu da pawàngu ba luma pa-wuangu tanda.

⁷Nunjuya na hupu liina i MIRI lai Muha, nàhaku-dahaka tau Ihirailu da tau Mindiangu, hi da-pameti ndàbaha da tau minida,

⁸pa-pohungu lima hanganji Mindiangu: nu i Ewi, i Rekimu, i Njuru, i Huru dàngu i Remba. I Mbiliamu anana i Mbeuru pa-pameti-mbuya.

⁹Da tau Ihirailu da tanawa-nja da kawini dàngu da ana tau Mindiangu, hi dawàhi ndàbaha da banda, dàngu mbuu ndàbada da pawulu-da.

¹⁰Da paraingu dàngu da ngia pa-pamaüngu da tunu-mbuha.

¹¹Hàlaka nu da tau Ihirailu dapiti ndàbaha da pawàhi-da, papohu-nja ba hapajia-ha da pa-tanawangu dàngu da banda,

¹²hi dangàndi-ha lai Muha dàngu i Eliahàru dàngu nggubulu-na na banjaru Ihirailu. La rehi nu ninja la ngia pa-pamaüngu-da la ma-ndidaru Muapu, lihina la Luku Yorundangu la papana na paraingu Yeriku.

¹³Ka luhu-danyaka i Muha, i Eliahàru dàngu mbuu ndàbada da liku uru hawiangu la banjaru Ihirailu, welingu la ngia pa-pamaüngu hi dalua pa-hàmburu-ha da tanatara Ihirailu.

¹⁴I Muha nambeni-nja ba hapajia-ha da parawira, ba hapajia-ha da ngora pamba tanatara dàngu da ngora panjuri da mabidi beli welingu la pa-hànjalungu.

¹⁵Napanii-nja nyuda, “Ka nggikina dimi nyimi hi imàta bianja mbuu ndàbada da kawini paluri?

¹⁶Ka nda jiaha da kawini nuda-maka da makiku-nya na pawuna-nanja paraïna i Mbiliamu, hi lupa danggeli-ya na banjaru Ihirailu la Piuru la pa-dunjaku-nya i MIRI? Dàngu nuna-duyaka na maparuu-nya na tàparu la banjaru-na i MIRI!

¹⁷Nàhu nggàra ula-mipa, pameti mbuta-hawa da anakeda mini dàngu mbutada da kawini da manda ana karia-ha.

¹⁸Na nyuna mbuu ndàbada da kawini da maana karia-ihapa pekuna kai pitiha ndumami.

¹⁹Tàka nàhu, nyimi mbuu ndàbami mambàda ningu pa-pameti-mi, jàka ndia mambàda jonggaru mameti, lupangu-ma indàdiku la hambeli ngia pa-pamaüngu pihu mbua lodu mandaina. La lodu patailu wàna dàngu la papihu wàna, lupangu-ma iwundaya na lii hawari wiki, nyimi dàngu ba hapajia-ha da kawini tanawangu.

²⁰Nimbihu-da da paki dàngu jàka nggàra biaha da pa-pandoi welingu la manulangu, wulu ihi kamàmbi jàka ndia ka aiyakai lupangu hawari-mbuha,” wàna.

²¹Tunaka nu panii-nanyaka i Eliahàru la tau da mabidi beli welingu la pa-hànjalungu, “Yiada-haka da kalaratu da pawua-na i MIRI lai Muha.

²²Mbuu ndàbada da ma-torungu la epi hama tuna da àmahu rara, àmahu bara, wudu, bàhi, tambura bara dàngu tambura mitingu lupangu-ma paili-ha ba wàngu patunu-ha la epi. Tunaka nu nuda nu lupangu hawari-mbuha bàdi wàngu wai pawunda wàngu lii hawari ka àmbu dahili iraku. Mbuu ndàbada da malanja hawiangu da manda torungu la epi lupangu-ma paili wànja wai pawunda wàngu lii hawari.

²³

²⁴La lodu papihu wàna lupangu-ma ibahaha da pakimi, hina-duka hi ndai iraku, dàngu peku-mika patama la ngia pa-pamaüngu,” wàna.

²⁵I MIRI napanii-nya i Muha,

²⁶“Nyumu dàngu i Eliahàru hamangui da liku uru hawiangu la honga banjaru Ihirailu, lupangu idiha-maha mbuu ndàbada da malanja da pambàda rambangu, papohu-nja ba hapajia-ha da pa-tanawangu dàngu da banda.

²⁷Nuda da malanja da pa-rambangu lupangu-ma ipaberi mandua-nja pahama dangu manja ba dua ngiada; na hangia ndumada ba hapajia-ha da panjuri da mambàda lua pa-pabera, tàka na hangiai ndumada da rayatu hawiangu.

²⁸Tàka nduma pa-panuda-ngga Nyungga MIRI, lupangu-ma upiti hangia la lima ngahu — welingu la ndumada da panjuri ka tau tanawangu-ha, hapiha, kalandai-ha, mbimbiha dàngu kamàmbi-hakai.

²⁹Wua-nyaha nuda i Ratu Eliahàru ka hunggu pa-panuda-ngga Nyungga, MIRI.

³⁰Welingu la nduma na-pawua-nya na banjaru Ihirailu lupangu-ma upiti hangia la lima kambulu, ka tau tanawangu-ha, hapiha, kalandai-ha, mbimbiha, dàngu kamàmbi-hakai. Wua-njaha nuda mbuu ndàbada la tau Lewi da ma-tanara-ya na Maünggu,” wàna.

³¹I Muha dàngu i Ratu Eliahàru da-pahàra-nya hama tuna na-papanii-na i MIRI la hupu liina.

³²Hinggilu-da da pambàda pitida ba hapajia-ha da panjuri nduma wikida, nggubulu-da nuda da paramba-da: 675.000 mbimbi dàngu kamàmbi, 72.000 hapi, 61.000 kalandai dàngu 32.000 hiliwuku.

³³

³⁴

³⁵

³⁶Paberi ma-nduangu welingu la nggubulu-da nuda pa-wuangu la panjuri-ha, na pa-kalirangu-da tuna nu: 337.500 mbimbi dàngu kamàmbi, dàngu welingu la nggubulu-da nudai 675 ngiu nduma pa-panuda-nya i MIRI; 36.000 hapi, 72 ngiu nduma pa-panuda-nya i MIRI, 30.500 kalandai, 61 nduma pa-panuda-nya i MIRI; 16.000 hiliwuku, 32 nduma pa-panuda-nya i MIRI.

³⁷

³⁸

³⁹

⁴⁰

⁴¹Tunaka nu wua-nahaka nuda da pa-panudangu wàngu lai Eliahàru nduma hunggu maraku lai MIRI, hama tuna na papanii-na i MIRI la hupu liina.

⁴²Da nduma rayatu hama dangu-mada dàngu da nduma panjuri: 337.500 mbimbi dàngu kamàmbi, 36.000 hapi, 30.500 kalandai, dàngu 16.000 hiliwuku.

⁴³

⁴⁴

⁴⁵

⁴⁶

⁴⁷Hama tuna na pambàda paniina i MIRI la hupu liina, napiti hangia la lima kambulu i Muha welingu la tau tanawangu dàngu banda, nawua-njaha da tau Lewi da ma-paloku la Maüna i MIRI.

⁴⁸Tunaka nu lua-danyaka la hanggana i Muha ba hapajia-ha da parawira

⁴⁹hi da-patàkangu kareuku, “Umbu, mbàda diha-mahaka da panjuri la wawa pareta-ma nyuma, tàka jia ndàba-maha danguda, nda ana haàtu-ma ma-maromba.

⁵⁰Ba tuna mai ngàndi-mahaka nàhu da ngaü àmahu rara, kara lima, kara wihi, tawuru, pula dàngu patuu la nggoru da pa-maràngga pitida. Mbuu ndàbada nuda wua-mahaka lai MIRI, ka pa-daingu mangga-na-nggama nyuma,” wàda.

⁵¹Tàka i Muha dàngu i Eliahàru dakeiha nuda da àmahu rara mbuu ndàbada mbàda ngaü-mahaka.

⁵²Nggubulu-da da hungguda nuda ba hapajia-ha da parawira tika padua ngahu kiluda mbotuda.

⁵³Ba hapajia-ha da panjuri nimbihu-da mbàda piti-daka nduma wikida da paramba-da.

⁵⁴Tàka nyuda i Muha dàngu i Eliahàru dangàndi-ha nuda da àmahu rara la Maüna i MIRI, ka naopa-nya na banjaru Ihirailu i MIRI.