Read Kambera DIHA 35 Bible Online

DIHA 35 - Kambera bible

DIHA 35

¹La ma-ndidaru Muapu, la hingi Luku Yorundangu, la lihina na paraingu Yeriku, napanii i MIRI lai Muha,

²“Patàka-nya na banjaru Ihirailu, ba lupangu-ma welingu la tana kangeha na pangala-da napa, dawua-nja da tau Lewi ana nda pira mbua paraingu dàngu da maràda rumba la winggiru-da ka peku ndàdiku ninguda lai nu da tau Lewi.

³Napa mangu tau Lewiha nuda da paraingu ka da-ngiangu ningu. Na maràda rumba la winggiru-da jiaha da nduma bandada la hondu dàngu da bandada hawiangu.

⁴Na nggàilaru-da da maràda rumba 450 metiru-da welingu la kangeli paraingu hanggangu la nggini bia.

⁵Ba tuna na tana ngaba tau Lewi na ka-patungu larana, na ma 900 metiru-na na hukutu-na la nimbihu karaha-na, tàka na paraingu-na la padua-ya.

⁶Lupangu-ma iwuanja da tau Lewi nomu mbua paraingu ngia pamara, ngia pa-handera ninguda da tau mambàda pameti tau dàngu nda wukuda. Hinggilu-da nuda hili wua-mbunjai da tau Lewi patu kambulu dàmbu paraingu hawiangu

⁷dàngu da maràda rumbada. Ba tuna nggubulu-da patu kambulu walu mbuada da paraingu nduma tau Lewi.

⁸Na danguda da paraingu tau Lewi la tana ngaba nimbihu kabihu Ihirailu, lupangu-ma itàpuya pa-namatu-nya na bokulu kuduna nuna na tana ngaba,” wàna.

⁹I MIRI na-paràha-nya i Muha

¹⁰pa-patàka-nya la banjaru Ihirailu da kareuku yiada, “Bai pala-yaka na Luku Yorundangu dàngu bai tama-nyaka na tana Kanaàngu,

¹¹lupangu-ma kai pa-hinggilu-ha da paraingu ngia pamara, ka dapalai ningu lai nu da tau da mambàda pameti tau dàngu nda wukuda.

¹²Napa la paraingu nuda namara ningu nuna na tau welingu la kalembi-na na tau pa-pameti-na da ma-mbuhangu patungu hilu kiringu. Nadu, na tau pa-panjala ruku pameti tau nda peku ana la pa-pameti-ya jàka ndedi pareha-ya na palakara-na la rapatu pareta.

¹³Kawàri-wa nomu mbua paraingu ngia pamara,

¹⁴tailu mbua la pahunga loduna na Luku Yorundangu dàngu hili tailui la tana Kanaàngu.

¹⁵Nuda da paraingu ba nomuda jiaha da paraingu ngia pamara ndumami nyimi tau Ihirailu dàngu nduma tau tàka na ma-ndàdiku la pahiku-mi, ka lu ndàdiku-ananya jàka ndia ka ndàdiku pangalangu-nanyakai. Nggàmu biaya na mambàda pameti tau dàngu nda wukuna, pekuna papalai la hau paraingu la hongada nuda da paraingu.

¹⁶Na nyuna jàka ningu haàtu tau ma-pameti tau wàngu madàka bàhi jàka ndia wàngu watu jàka ndia wàngu aikai, njala-mananya na tau nuna ba pameti-nanya taudu; dàngu lupangu huku pameti-ya bàdi.

¹⁹Peku-mana pa-pahàra-nya nu na hukungu meti paraï kalembi nditaku-na na tau pa-pameti. Jàka na-jàngapu-ya nu na ma-pameti tau, peku-mana ka na-pameti-ya.

²⁰Jàka ningu haàtu ma-karaüngu eti anguna, hi na-pameti-ya ba nawàngu pa-ndakilu-nya jàka ndia na-patàda-nya ngga - nggàrakai,

²¹jàka ndia nawàngu pa-nàhaku-nya kawudu limakai, njala-mananya na tau nuna ba pameti-nanya taudu; dàngu lupangu huku pameti-maya bàdi. Peku-mana pa-pahàra-nya nu na hukungu meti paraï kalembi nditaku-na na tau pa-pameti. Jàka na-jàngapu-ya nu na tau na ma-pameti tau, peku-mana ka na pameti-ya.

²²Na nyuna ngera hama tuna jàka ningu haàtu ma-pameti tau na pànda karaü-na eti dàngu nda wukuna, ka wàngu pa-ndakilu-nanya jàka ndia ka wàngu pa-patàda-nanya ngga - nggàrakai.

²³Jàka ndia ngera hama tuna jàka ningu haàtu, bundu nda ita-nanya napuha hau watu hi kiri metina na haàtu na nda muhuna, dàngu nda nawuku-mbuya ka pahanggàmaruya nuna na tau.

²⁴La palakara da matungu nu lupangu-ma datimba-nya paraï rapatu banjaru na ngerana na tau na ma-pameti tau dàngu na tau na ma-mbuhangu patungu hilu kiringu ruku metina na tau pa-pameti.

²⁵Lupangu-ma na rapatu banjaru na-kahiri-ya na tau na ma-pameti tau dàngu nda wukuna welingu la pangàdungu-da da kalembi-na nuna na pa-pameti. Lupangu-ma karia belinya nu na tau la parai ngia pamara, na ngia papalai-na. Lai numaya bàdi na-ndàdiku ningu lundu nameti na tau na manjadi Ratu Bokulu la rehi nu; hina-duka la hambeli-na nu hi peku belina la kotaku wikina. Na nyuna ngera hama tuna jàka na-dunjaku-nya na parai ngia pamara na ngia papalai-na, tàka hi na-jàngapu-ya paraï kalembina na pa-pameti, nu natungu-da hilu kiringu, nda njala pameti tau-aya.

²⁹Da kalaratu yiada pawàngu-maha ndumami nyimi dàngu nduma ana umbuku-mi, la nggini bia indàdiku ningu.

³⁰La palakara pameti tau, na tau papabukungu njala ba mbàda pameti-na tau, hi pekuna pa-panjala-ya dàngu hi ratanya hukungu meti, mbulungu-ana jàka ningu mbuti welingu la tau madua hakahii jàka ndia marihi-kai. Haàtu hakahii nda tuda-ana la panjadi mbuti ba ma-deningu-ya na pa-pabuku-nya.

³¹Na haàtu tau ma-pameti tau lupangu-ma huku pameti-ya. Nda peku-ana nyuna pahilu wànya àmahu nuna na hukungu.

³²Jàka ningu haàtu mapalai la hau parai ngia pamara, àmbi pamàja-dunya ka na-wuangu àmahu ka peku pahia-nya pabeli la umana ba ndedi nameti na Ratu Bokulu.

³³Jàkai wundaya nuna, pa-iraku-minya napa na tana ngia pa-ngiangu-mi. Na ruku pameti tau na-pairaku-ya na tana; jia batuna, nda jia ningua ànda hau pawàngu la pa-hawari-ya na tana, hinggilu-na ba wàngu pa-pamolu-nya na tau ma-pameti tau.

³⁴Àmbu jia pa-iraku-diminya na tana ngia pa-ngiangu-mi, nadu ba MIRI-ka Nyungga, dàngu ba ku-ngiangu la honga banjaru Ihirailu,” wàna.