Read Kambera DIHA 6 Bible Online

DIHA 6 - Kambera bible

DIHA 6

¹I MIRI na-paràha-nya i Muha

²pawua-njaha yiada da kalaratu la tau Ihirailu. Nimbihu-na na tau mini jàka ndia na kawini na ma-paràkingu panjadi tau ma-roputu wikina dàngu la pa-panuda-nya na lurina ndumana i MIRI ka tau ma-roputu wiki-nanya,

³nda ukua pa-unungu angguru dàngu pa-unungu pa-maüku wàngu. Nda ukua nyuna pa-unungu pa-maüku wàngu nggàra bia na pa-pandoi welingu la wua angguru, jàka ndia wua ai hawiangu. Nda ukua nyuna pangangu wua angguru mabidi jàka ndia mamàdu-kai, jàka ndia nggàra biaya na ma-welingu la pingi angguru; ka wua dalu-nanya ka kapunju-nanyakai àmbu nangangu-du.

⁵Ba hanii-manapa la paràkingu-na àmbu na kàtahu-duya na lunggina jàka ndia àmbu na-kikiru-du. La ngalana nu lupangu-ma napuli-nya pamalai na lunggina dàngu ruu njerina. Napaka-manyapa paràkingu-na lundu na-nggànapu na rehi panuda-nanya na lurina ndumana i MIRI.

⁶Na lunggina jiaya na tanda ba pa-panudangu ndumana i Alaya. La ngala pawàngu-yapa na-paràkingu-na àmbu na-pairaku-du wikina; àmbu na-lihingu-du mameti, jiapa-kai ka meti ama-nanya, inana, jàka ndia meti angu dedi-nanya.

⁸La ngalana patau ma-roputu wikiya, tau pa-panudangu ndumana i MIRI-maya duna.

⁹Jàka jia iraku biana na lunggina nu na haàtu tau, ma-roputu wikina na pambàda panudangu wàngu rukuna ba ninya la lihi haàtu tau na mameti harabàndangu, lupangu-ma na nedingu pihu mbua lodu mandaina; hàlaka nu lupangu-ma na-kikiru lunggina dàngu ruu njerina, hina duka hi naili.

¹⁰La lodu la pawalu wàna lupangu-ma nangàndi dua ngiu kulundiha jàka ndia mbàrakai la ratu la pindu Maüna i MIRI.

¹¹Na ma-hawurungu na heu lupangu-ma nahunggu maraku wànya paraïna na ratu nduma kameti maraku jàmangu njala, tàka na heui nduma kameti maraku patunu ka payila wànya na iraku-na. La lodu nunama lupangu nahili panuda wànya i MIRI na ruu lunggina

¹²dàngu ka na-pabidi-ya na-pamàjangu-na wikina ba tau ma-roputu wikiya nyuna. Na rehi na mbàda làpahu nda padiha-ayapa ba mbàda iraku dunaka. Lupangu-ma na wotu hunggu maraku heu ana mbimbi mahau ndauna ka kameti maraku hilu runggiya.

¹³Jàka na-lundungu-ka na paràkingu-na na haàtu tau na ma-roputu wikina lupangu-ma nawunda-ya na lii tungu yia. Lupangu-ma lua ngàndiya na tau nuna la pindu Maüna i MIRI

¹⁴ba dàngu ngàndina lai MIRI tailu ngiu banda manda ningu nyurangu: heu ana mbimbi bumbu mahau ndauna nduma kameti maraku patunu, heu ana mbimbi bai mahau ndauna nduma kameti maraku jàmangu njala, dàngu heu mbimbi bumbu nduma kameti maraku papeku.

¹⁵Lupangu-mbu nawotu hau mbola roti pa-pandoi dàngu nda patai wolungu, nu da roti kabunggulu pa-pandoi welingu la kanguta pa-haürungu mina haitungu, dàngu kanguta manipihu pa-peringu mina haitungu. Hinggilu-da nuda lupangu-mbu nawotu hunggu maraku uhu mangejingu dàngu wai angguru.

¹⁶Lupangu-ma nangàndi ndàbaha nuda la hanggana i MIRI paraïna ratu, hàla hi nawotu-ya na kameti maraku jàmangu njala dàngu na kameti maraku patunu.

¹⁷Pa-karia-nja da roti da mahau mbolada, lupangu-ma nawotu-ya lai MIRI, na mbimbi bumbu ka kameti maraku papeku-ya. Dàngumbu na hunggu maraku mangejingu dàngu na hunggu maraku pa-unungu lupangu-ma nawotu-ha lai MIRI.

¹⁸Nu na tau na ma-roputu wikina lupangu-ma na kikiru-ya na lunggina la pindu Maüna i MIRI, hi natuya daa la epi ba talànga tunuya nu na kameti maraku papeku.

¹⁹Hàlaka nu jàka hàlaka pa-manahu-ya na wihi mangilu-na na mbimbi bumbu, lupangu na pitiya ratu, ka natuya la limana na tau na ma-roputu wikina, paangu-nya hau roti, kabunggulu dàngu hau kanguta manipihu welingu nu la mbola.

²⁰Hàla lupangu-ma na ratu na-pajola-nya nu na hunggu maraku pangangu ka pa-panudangu lai MIRI-ya; yiana hangia ma-matua nduma ratuya, pabonja wànya na kakauna dàngu na winju mbimbi bumbu nduma ratu nunjuya na kalaratu. Hàlaka nu hina duka hi pekuna pa-unungu wai angguru nuna na tau na ma-roputu wikina.

²¹Tuna nuduka na kalaratu manggàna-ya na tau na ma-roputu wikina; na nyuna jàka ningu haàtu tau ma-roputu wikina manjanji hunggu maraku marihi welingu la kalara - kalaratu paràkingu-na lupangu na-pahàra padeni-manya bàdi nu na panjanji-na.

²²I MIRI na-paràha-nya i Muha

²³ka patàka-nya i Harungu dàngu da anana, jàka da pa-kanyuru-nya na banjaru Ihirailu lupangu ka tuna yia bàdi na patiki-da:

²⁴I MIRI ka na-pakanyuru àrunggai dàngu ka narada àrunggai.

²⁵I MIRI ka nahàmu àrunggai eti dàngu ka namàja àrunggai eti.

²⁶I MIRI ka nambuha àrunggai dàngu ka nawua àrunggai peku.

²⁷Dàngu napanii i MIRI, “Jàka da tikiya na tamunggu ka pa-kanyuru wànya na banjaru Ihirailu ku-pakanyuru-maha duku nyuda,” wàna.