Read Kambera DIHA 7 Bible Online

DIHA 7 - Kambera bible

DIHA 7

¹Ba na-palundu-nyaka na pahada-nanya na Maüna i MIRI nyuna i Muha, na-katua-ya na Maü dàngu da pamàtu wàna ba nawàngu padoha wànja mina lii mbuu ndàbada. Tunanya numbu na ngia pawotu maraku dàngu mbuu ndàbada da pamàtu wàna.

²Hàla, ba hapajia-ha da ngora Ihirailu, nu ba hapajia-ha da liku uruda da kabihu-da ma-hanobaku-ya na ngera palaku-ya na diha,

³dawotu hungguda nomu mbua karobaku dàngu hakambulu dua ngiu hapi lai MIRI: nimbihu tau madua liku uru dahunggu wàngu hau karobaku dàngu heu hapi haàtu - haàtu. Ba dahàla ka nu pawotu-ha,

⁴napanii i MIRI lai Muha,

⁵“Keihawa nuda da hunggu ka ngàndi wànya na Maünggu; pakata-nja nuda la tau Lewi pa-namatu-nya na wai ngerada nyuda,” wàna.

⁶Hàla, hi nawua-ha i Muha nuda da karobaku dàngu da hapi la tau Lewi.

⁷Da dàmbu karobaku dàngu da patu ngiu hapi nawua-ha la tau Nggerihongu,

⁸da patu mbua karobaku dàngu da walu ngiu hapi la tau Marari-naha, pa-namatu-nya na paràma pa-palaku-da la kapipi-naha i Itamàru, anana i Ratu Harungu.

⁹Tàka da tau Kehàtu nda da-ngalangu-a karobaku jàka ndia hapikai welingu lai Muha, nadu da banda da malanja ma-matua da pa-tanara-da nyuda ba lupangu-ma dawàngu paduku-ha.

¹⁰Dangàndi ndàbambu hunggu maraku ba hapajia-ha da ma-pangora ka mbabu wànya na lii katua-ya na ngia pawotu maraku. Ba dawai rehingu-ka pangàndi-ha da hungguda la hangga ngia pawotu maraku,

¹¹i MIRI napanii-nya i Muha, “Paniinja nyuda, nimbihu lodu la dalu hakambulu dàmbu lodu, haàtu welingu la hongada da liku uru, lupangu-ma nawotu hungguna ndumana ba katua-ya na ngia pawotu maraku,” wàna.

¹²Nimbihu-da dangàndi-ha da hunggu maraku-da tuna yia na-pandàkingu-da: [Lodu] — [Kabihu] — [Liku Uru] 1 — Yahunda — i Nahahungu anana i Aminandàpu 2 — Ihakàru — i Netaneyilu anana i Huaru 3 — Hembulungu — i Eliapu anana i Helungu 4 — Rumbingu — i Elihuru anana i Handiuru 5 — Hamiungu — i Halumialu anana i Hurihandai 6 — Nggàtu — i Eliyahàpu anana i Rehuilu 7 — Epuraïmu — i Elihama anana i Amihutu 8 — Manahi — i Nggamalialu anana i Pandahuru 9 — Mbanyamingu — i Ambindàngu anana i Nggindioni 10 — Ndàngu — i Ahiyehiru anana i Amihandai 11 — Ahiaru — i Panggialu anana i Okuràngu 12 — Nàputali — i Ahira anana i Enàngu. Da hunggu maraku nimbihu-da da-pahama: hau kaba julangu àmahu bara ma 1,5 kilu mbotuna, dàngu hau tobu robu àmahu bara ma 800 nggaràmu mbotuna, pa-namatungu la timbangu pakàli wàngu la Maüna i MIRI. Da kanaingu da madàmbu-da nuda da pinuha kanguta pa-haürungu lonahu ka hunggu maraku mangejingu-ha. N(...)

⁸⁴Da hunggu maraku da pangàndi-da da liku uru ba hakambulu madua-ha ka katua wànya nu na ngia pawotu maraku na danguda nggubulu-da: — hakambulu dàmbu kaba julangu àmahu bara dàngu hakambulu dàmbu tobu robu àmahu bara, nggubulu-da 27,6 kilu mbotuda — hakambulu dàmbu kaba julangu àmahu rara nggubulu-da 1,32 kilu mbotuda, dambinunja dupa — hakambulu dua ngiu hapi mini, hakambulu dua ngiu mbimbi bumbu, dàngu hakambulu dua ngiu ana mbimbi mahau ndauda, papohu-nja da hunggu maraku mangejingu da pa-màtu wàda ka hunggu maraku patunu-ha — hakambulu dua ngiu kamàmbi ka kameti maraku jàmangu njalaha — dua kambulu patu hapi mini, nomu kambulu mbimbi bumbu, nomu kambulu kamàmbi, nomu kambulu ana mbimbi mahau ndauda, ka kameti maraku papeku-ha.

⁸⁹Handàka tama - handàka tamana i Muha la Maüna i MIRI papanii dànya i MIRI, narongu-ya na talia liina i MIRI ba napanii dànya nyuna welingu la pinu ndàbi Pàti Pa-ràndingu la njongada da madua-da nu da patau awangu.[1]