Read Kambera DIHA 8 Bible Online

DIHA 8 - Kambera bible

DIHA 8

¹I MIRI napanii-nya i Muha,

²“Paniinya i Harungu, jàka na-pakàna-nja da pihu mbua palita nu la tandai palita lupangu-ma na-pakàna-nja ka peku handaraku ninguna la hangga tandai palita,” wànanya.

³Ka pahàra-nanyaka i Harungu nu na pareta-na i MIRI. Ba na-pakàna-nja nuda da palita na-paora-nja la hangga tandai palita.

⁴Nuna na pangia palita lundu la kapuka-na dàngu da wàla ai pa-manandangu wàna pa-pandoi welingu la àmahu rara patuku-ha, pa-namatu-nya na hada pa-paita-nanya i Muha paraïna i MIRI.

⁵I MIRI napanii-nya i Muha,

⁶“Kahika-ha da tau Lewi welingu la tau Ihirailu hawiangu dàngu pahàra-nyawa na lii hawari lai nyuda

⁷ba tuna yia na pawàngu: paiharu-nja wai pa-pahinggilu nduma lii hawari dàngu paràha-nja ka da kikiru ndàbaha da ihida dàngu ka dabaha-ha da pakida. Ba wàngu patuda nu hi daili.

⁸Hàla, paràha-nja papiti heu kamboka hapi mini dàngu hunggu maraku mangejingu, ma-welingu la kanguta pa-haürungu lonahu. Tàka nyumu dumu, lupangu-ma upiti hili heui kamboka hapi mini nduma kameti maraku jàmangu njala.

⁹Tunaka nu pauhi-nya nggubuluna na banjaru Ihirailu dàngu paràha-nja da tau Lewi pa-ndolaku la hangga Maünggu.

¹⁰Lupangu-ma da-padambakungu limada na banjaru Ihirailu la pinu katiku-da da tau Lewi,

¹¹hàla, lupangu-ma nawotu-nggaha da tau Lewi paraïna i Harungu ka hunggu maraku pa-panuda-dangga Nyunggaha paraï da tau Ihirailu, ka peku paloku-danya na paràma-nggu Nyungga.

¹²Hàla, lupangu-ma dapadambakungu limada da tau Lewi la pinu katiku-da nuda da dua ngiu hapi mini; na heu lupangu-ma pawotu-ya ka kameti maraku jàmangu njalaya, tàka na heui ka kameti maraku patunu-ya. Wànya na lii nuna pa-hawari-haka da tau Lewi.

¹³Pa-hinggilu-hawa da tau Lewi ka ndumanggu Nyunggaha dàngu paràha-nja nyuda ka da-tangara lai Harungu dàngu da anana.

¹⁴Tuna nu bàdi na pawàngu bai kahika-ha da tau Lewi welingu la tau Ihirailu hawiangu, ka mangunggu Nyunggaha.

¹⁵Bau hàlaka pa-paloku-ya na lii huharungu tau Lewi, ninguka hàkuda paràma la Maünggu Nyungga.

¹⁶Mbàda panjadi-ngguhaka nyuda ka dahilu-ha mbuu ndàbada da mini kawunga ana Ihirailu; nu ba tuna jia-haka nyuda da pa-panuda-ngga Nyungga.

¹⁷Ba ku-pameti-ha mbuu ndàbada da kawunga ana la Mehiru, da kawunga ana la nimbihu kuru uma Ihirailu dàngu nimbihu-da da banda da ma-kawunga dedi mbàda panjadi-ngguhaka mangu pa-pahinggilu-nggu.

¹⁸Nàhu ka ningu hiluda da kawunga ana Ihirailu mbuu ndàbada, kupiti-ha da tau Lewi,

¹⁹tàka da tau Lewi ku-pakata-nja lai Harungu dàngu da anana, ka da pawai ngaba nduma tau Ihirailu la Maünggu. Dàngumbu ka da-kamahingu jàmangu njala nduma banjaru Ihirailu ka àmbu nanggàna-ha tàparu jàka lalu lihi-danya na pangia matua,” wàna.

²⁰Tuna nuduka i Muha, i Harungu dàngu nggubulu-na na banjaru Ihirailu hi dawotu-ha lai MIRI da tau Lewi, hama tuna na pareta-na i MIRI lai Muha.

²¹Ka-hawari-danyaka wikida da tau Lewi dàngu hi dabaha-ha da pakida, hàla ka wotu-nahaka nyuda i Harungu ka pawua panudangu lai MIRI-ha. Na-paloku-mbuya na lii hawari-ha nyuda.

²²Da-pahàra ndàbanja paraï tau Ihirailu mbuu ndàba da pareta-na i MIRI lai Muha da manggàna-ha da tau Lewi. Nu ba tuna ninguka ngabada da tau Lewi paràma la Maüna i MIRI la kapipi-daha paraï da i Harungu dàngu da anana.

²³I MIRI napanii-nya i Muha,

²⁴“Nimbihu-na na tau Lewi na madua kambulu lima ndaungu lurina dàngu na marihi-kai, lupangu-ma na-paloku-ya na wai ngerana la Maünggu,

²⁵tàka jàka lima kambulu-naka na ndaungu lurina pa-pahàlangu-yaka welingu la wai ngerana.

²⁶La hambeli-na nu pekuna pa-pambapa dànja da tau Lewi hawiangu da mapawai ngera la Maünggu, tàka na nyuna nda ningu-apa wai ngerana ma-padaingu. Tuna nu na-pawàngu ba palara-nya na paràma-da da tau Lewi,” wànanya.