Read Kambera DIHA 9 Bible Online

DIHA 9 - Kambera bible

DIHA 9

¹La wulangu hau la ndaungu padàmbu wàna la hambeli dunjaku-danya na Mehiru da tau Ihirailu, i MIRI napanii-nya i Muha la maràda telangu Hinai, napanii i MIRI,

²“La tànggalu hakambulu patu la wulangu yiana, piti welingu la tama lodu, lupangu-ma nambabu-nya na Paha na tau Ihirailu pa-namatu-nya na kalaratu na pambàda kawuku,” wàna.

⁴Ba tuna paràha-nanyaka na banjaru Ihirailu i Muha pambabu-nya na Paha.

⁵Dambabunya la maràda wara Hinai la malingu tànggalu hakambulu patu nu la wulangu hau. Mbuu ndàbada da-pahàra padeni-manya hama tuna na pareta-na i MIRI lai Muha.

⁶Na nyuna ningu la hongada nyuda ba mapira-ha da ma-iraku, rukuna ba da-jonggaru mameti, tàka hi nda pekuda la lodu nu pambabu-nya na Paha. Ka lua-danyaka la hanggada i Muha dàngu i Harungu

⁷hi dapanii, “Nyuma yia ma-iraku ba mbàda jonggaru-maka mameti. Ka nggikina hi lupangu kahika kama nyuma hi nda peku wotuma kameti maraku lai MIRI dàngu da angu dedima?” wàda.

⁸Nahema i Muha, “Nedingu kàdi lundu ku-ngalangu lii kaloka welingu lai MIRI,” wànanja.

⁹I MIRI na-paràha-nya i Muha

¹⁰papanii-nya na banjaru Ihirailu, “Jàka ningu ma-iraku la hongami jàka ndia la ana umbuku-mi rukuna ba na-jonggaru mameti jàka ndia maningu ngia palua-na la mamarau, tàka lupangu-mai duna nyuna na mbabunya na Paha ndumana i MIRI.

¹¹Na nyuna na mbabu nu lupangu-ma la hili hau wulangu ma-malamiri, nu la rudungu tànggalu hakambulu patu la wulangu padàmbu wàna. Mbabu-nyawa na lodu nuna bai wàngu pangangu mbimbi Paha dàngu roti nda patai wolungu dàngu wai rii ma-paita.

¹²Àmbu nggàradu pabiimi welingu la pangangu nu lundu la mbaruna haromu, dàngu àmbu jia hapungu-mbu rii kawudu papata welingu la rii banda pahunggu maraku-ngga Nyungga. Mbabu-nyawa nu na Paha pa-namatu-nya na kalaratu-na mbuu ndàbada.

¹³Na nyuna na tau na manda iraku dàngu nda ningumbu ngia palua-na, tàka hi nda nambabu bianyai na Paha, nda kureki-ayapa ba haàtu ma-welingu la banjaru-nggunya, rukuna ba nda na wotungga kameti maraku la rehi pa-kawuku. Lupangu-ma na tau nuna na-handepa-ya na injana ruku njalana.

¹⁴Jàka na-mbuhangu pambabu-nya na Paha na haàtu tau nàmu na ma-ngiangu la hongami, lupangu-ma nambabu-nya pa-namatu-nya mbuu ndàbada da kangguti kalaratu-na. Nuna na uku nanggàna ndàbaya na tau, ka tau Ihirailu-ya ka tau namu-yakai,” wàna.

¹⁵La lodu pahada-nya na Maüna i MIRI, puru-nanyaka na karumangu pa-pandàda-nya nu na Maü. La rudungu lundu la mbaru hama epiya ba itaya na karumangu.

¹⁷Handàka dita - handàka ditana nu na karumangu, nyànggaru-danyaka maüda da tau Ihirailu hi da-hadangu palaku. Tàka la ngia papuru-na nu na karumangu, lai numbuha da hili pa-hadangu maüda.

¹⁸La hupu liina i MIRI da-nyànggaru maüda da banjaru Ihirailu dàngu la hupu liina i MIRI-mbu ba dahili pahada-nja. Ba ngala ninyapa nu na karumangu la dita Maüna i MIRI, pa-engangu-madanya lai nu.

¹⁹Jàka namandai na karumangu la ditana nuna na Maü, da-karàdaku-ma la pawàna i MIRI hi nda dalaku welingu lai nu.

²⁰Na nyuna talànga handàka-na ana pira mbua lodu-ana nuna na karumangu pa-padaingu la ditana nuna na Maü. Jiapa ka nda nggi - nggiki-nakai jiaya na hupu liina i MIRI na matàpu-ya na ndàdiku-da la hau pangia hamangui na hadangu-da palaku.

²¹Talànga handàka-na piti welingu la kalitu lundu mbarua ba na-padaingu nuna na karumangu, tàka jàka ditangu wàna-kika na karumangu la mbaru, laku-madanyai duda nyuda. Pirangu bia ba nadita na karumangu, ka loduya ka rudungu-yakai, laku-madanya.

²²Ba ngala ninyapa nu na karumangu la dita Maüna i MIRI, ka dàmbu loduna, hau wulana, hau ndauna, jàka ndia na rihi kai, tuna numai mandaina na pa-engangu-da lai nu. Jàka nadita-ka na karumangu, hina-duka hi dalaku.

²³Na-padaingu-da la hau pangia dàngu na lakuda la hili hau pangiai, pa-namatungu-danya la hupu liina i MIRI-ma, na pawua-na la ngaruna i Muha.