Read Kambera MIKA 2 Bible Online

MIKA 2 - Kambera bible

MIKA 2

¹Ai-inai da tau ma-pakakangu ma-akatu ba talànga tanggilungu-da la ngia pa-katuda-da la rudungu, hi da-pahàra-nya la mbaru ba damàka-du la pawunda-ya nuna.

²Jàka da-kabàlikungu hau woka, dawàhi-ya. Jàka da-kabàlikungu hau uma, daramba-nya. Ka malanja-ya ka mangu umangu-ya nda ningu-apa mambiru-da.

³Rukuna nuna napanii i MIRI, “Ku-pakaka-nya na ura mila ndumami nyimi, hi nda peku marami. La rehi kàba ndewa nuna nda peku laku dàngu ngànjangu-amipa napa.

⁴La rehi nu napa napeka-ya tau na pahunggu ràngga nàumi pa-pangera wànya na tàparu, hi da lawiti-nya yiana na ludu ringu langu, ‘I MIRI na-wànjiru-yaka yiana na tanama hi nawua-ya la ma-tanawa-nggama. Karunggutu ailulu-mama-nyaka, ba wàda,’ ” wànanggai.

⁵Jia ba tuna jàka natoma-ka na rehina la pa-pabeli-nya la banjaru-na i MIRI nuna na tana, nda haàtu-a la hongami ma-ngalangu ndumana.

⁶Da tau da-kanyàngi-ngga nyungga, “Àmbu kanyàngi-nggama. Àmbu kanyàngi wànja rukuda nuda mbuu ndàbada. Nda jia ngalangu-ama makia.

⁷Àmbu jia kaka-dumunya ba mbàda ràtu-nanyaka na banjaru Ihirailu paraïna i MIRI! Nda jia wunda-ana matungu nu i MIRI. Ndedima duna na-mbulangu na lerangu etina. Ka nda nahàmu lii ana la tau ma-padeningu pawunda-na, wàmu?” wàdangga.

⁸Nahema i MIRI, “Nyimima ma-kaluluku-nya na banjaru-nggu hama tuna muhuya. Na tau ba nabeli welingu la pa-hànjalungu mambiru-ndanyaka napa la umanda wàda na pamonu-da, tàka nyimi dimi nedingu pàku-aminya la paramba-nya na umana.

⁹Da kawini la banjaru-nggu iwànggaha welingu la kuru uma pambuha-da, dàngu welingu la anada iwàhiya lundu nu - nu na kanyuru na pawua-nggunja.

¹⁰Hadangu kai laku, nda na-mambiru-apa lai yiahu. Da njalami na-pawiti-nyaka ura mila pa-mayilangu la tana lai yiahu.

¹¹Imbuhangu wunangu ma-mbuhangu pa-kambàliku dàngu ma-palapingu wàngu manyura-na ba jiangu-ma ningu angguru dàngu pa-ngunungu ma-maüku panda taü ba wàna,” wàna.

¹²Nahili panii i MIRI, “Oi banjaru Ihirailu pa-manjabii! Jiangu-ma ku-pauhi dàngu kukahau-nggai nyimi hama tuna mbimbi mabeli la okana. Hama tuna maràda rumba mambinu mbimbina, tuna numbu na tanami ba nambinu-nya tau dangu.

¹³Napa ku-bowangu ànda dàngu kuluhu karia-nggai welingu la tanawangu. Napa nyimi ibàriku pindu bokulu tàka ilaku mara. Nyungga wiki, MIRI, jia-maka Hanganji-mi, dàngu napa ku-kapipi-kai paluhu,” wàna.