Read Kambera MIKA 4 Bible Online

MIKA 4 - Kambera bible

MIKA 4

¹La lo - lodu na-manàmu-nya napa na-kahuluku na tandula Umana i MIRI. dàngu na-ndolaku bànduku làpahu-nja da tandula. Da banjaru mbuu ndàbada da pa-jurungu lai nu

²napa nyuda mbuu ndàbada dapanii, “Màlawa ka tahei la tandula-na i MIRI[2] la Umana na Ala Ihirailu! Napa na-papeka-nda nyuta jàka nggàra bàdi pawunda-nda. Napa nyuta ta-namatu-ya na àndana Nyuna nadu na lii papekangu-na i MIRI ba welingu la Yeruhali-du; welingu la Hiungu i MIRI napanii la banjaru-na,” wàda.

³Napa i MIRI nabota palakara-da da ba - banjaru, palakara-da da nanggara - nanggara ma-kapingatu, da mamarau hamangui da ma-mareni. Da hapanda-da datuku-ha panjadi luku tàka da nimbuda danjadi kahidi pa-ridihu wàngu kalunga. Da banjaru nda da-maràngga pa-kalulukungu-apa, nda da-hawàritu-mbupa pa-pabera.

⁴Nimbihu-na na tau napa naluri nda nggàra ehina dàngu na-mambiru la woka angguru dàngu la woka kapilitu-na; nda ningu makàli pa-mangàdatu-ya nyuna, nunaya na njanjina i MIRI Hupu Mambiha.

⁵Nimbihu na banjaru la pinu tana da-karadaku dàngu da-lumungu marapu wikida. Tàka nyuta duta napa ta-karadaku lai MIRI na Alanda dàngu hi talumu-nya lundu nu - nu.

⁶Napanii i MIRI, “Napa natàka narehi pauhi-nggunja da tau pa-hukungu, nu nyuda da ma-mayila la tanawangu.

⁷Nyuda pambàda pa-kaliparu-haka dàngu damarau welingu la kotaku-da. Na nyuna, welingu la tau nuda da pa-manjabii, napa ku-pakiri-nya na ndalaru bidi. Napa danjadi-ha banjaru bokulu ma-kapingatu. Napa ku-pareta-ha nyuda la Tandula Hiungu lundu nu - nu,” wàna.

⁸Tàka dumu nyumu Yeruhali, na ngia padaina banjaru-na i Ala, hama tuna mini pawangu madai kabàba mbimbina, napa nyumu parai puhu pareta belikau la pa-hanganji-mu hama tuna la wungana.

⁹Ka nggikina hiu hii kaladaku? Ka nggikina hiu mayila hama tuna kawini ma-habola? Jia-yaka ba nda ningu hanganji-mu, dàngu ba mbàda meti-daka da ma-panaungu-mu?

¹⁰Ha dimi ma-mandapu-nya la Yeruhali, kauli-wa dàngu kaingu-wa hama tuna kawini ma-habola! Nadu, nàhu ba lupangu-ma bàdi idunjaku-nya na paraingu kai ndàdiku la maràda. Lupangu-ma bàdi ilaku la Mbambilu, na nyuna napa lai nu na-pahàla-kai MIRI welingu la muhu - muhumi.

¹¹Nadangu na banjaru na mbàda pauhi pa-kaluluku-nggau nyumu, ha Yeruhali! Dapanii, “Pa-karunggutu-maya bàdi na Yeruhali! Napa maita-ya nuna na paraingu ba bundu watu tanyungguru-ya,” wàdanggau.

¹²Tàka da banjaru nuda nda dapi-anya jàka nggàraya na pa-pakaka-na i MIRI. Nda dapàda-anya ba pa-pauhingu-ha nyuda ka hukunja, hama tuna ba pauhingu uhu nggàndumu ka pàmbalu-nja.

¹³Napanii i MIRI, “Ha dimi ma-mandapu-nya la Yeruhali, lakuwa pa-tarohaku-ha da muhumi! Napa ku-pakapàru-kai hama tuna hapi ma-kadungu bàhi dàngu ma-wuungu wudu. Napa nyimi mi-pakabu banjaru dangu, dàngu da pawulu ruku rambangu-da napa iwotuha lai Nyungga, na MIRI pa-nggubulu awangu,” wàna.

¹⁴Ha dimi ma-mandapu-nya la Yeruhali, karai pa-mbanangu-wa ka nandula-kai i MIRI! Pa-nggupulu-taka nàhu! Na muhu ka-luluku-nanya na liku uru Ihirailu!