Read Kambera NAHUMU 2 Bible Online

NAHUMU 2 - Kambera bible

NAHUMU 2

¹Ha dumu Naniwa, patingingu-wa! Nàmu-nyaka na mawuku-ya pa-nyungguru kau! Dai-hawa da tindingu ngia pa-torungu! Hamata pahàmu-nja da ànda! Hawaritu-wa pa-pabera. (

²Langatàka, napa na-pahàmu beliya i MIRI na pa-hamemu-wàna na Ihirailu, ka jia beliya hama tuna la handàka-na, ba ndedi naramba-nya paraï da muhuna.)

³Da temingu muhu darara, tàka da paki ndihida hama wai riaha. Na muhu ma-panjàkapu ehingu-mana-nyaka. Hama epiha, da-kajilaku bàhi kareta-da. Da njarada[5] da-kajeki ndàba.

⁴Da-pairihungu, nalaku-da da kareta la ànda. Dapaya - yaulu la mambila. Hama hulu ma-kandulangu-ha ba itaha, da-talanjiru pa-mbangatungu hama kabàla-ha.

⁵Pa-paaungu-ha da parawira palaku hanggangu; datu - tunjuru ba da-karoruku.[6] Ri - ringada ba da-hanggangu la kangeli paraingu, hi lu patinja-nja da pa-tumburu wàngu.

⁶Da ngaru wai mbuu ndàbada da luku da-habonga-ka, ka kanggupuku ndàba-nanyaka na ihi uma hanganji!

⁷Na maràmba kawini payàpa-yaka, da ata kawini da-kanjaïku dàngu da padudurungu, ngu - nguda hama tuna rawa, dàngu data - tambungu kuruda paraï pa-handuka.

⁸Dawàngu pa-tanyumbalu da rayatu Naniwa ba dapalai, hama tuna wai maluhu la kamutu ma-tamburi.[7] Ningu mawara, “Jiaka, jiaka!” na mawàna. Tàka nda ningua ma-mbuhangu pabeli.

⁹Wàhi-hawa mbuu ndàbada da àmahu marara mabara-na! Dabundu làndangu da pawulu wàngu la paraingu yiana!

¹⁰Nakabu-ka na Naniwa, na-malinggitu kahàna. Dahala da eti paraï pa-mangàdatu. Da-malijangu dàngu da-kandàndaku da kambàku. Da-tawàla bara da matada mbuu ndàbada da tau.

¹¹Nggini-yaka nàhu na paraingu nuna? Na paraingu ba hama liangu-ya na ngia pa-pahibungu hinga? Ngia pawua-nja pangangu da ana hinga, ngia pa-orangu hinga mini dàngu bai hinga, pangia ma-mambiru nduma da anada?

¹²Àmangu lai nu na-njàkilu payàpa-na na hinga, hi nahira-ya nduma baina dàngu anana. Napinu-ya na hibuna wàngu kabu tolungu payàpa-na.

¹³“Nyungga yia muhu-mungga,” wàna i MIRI Hupu Mambiha. “Kutunu pambuta-ha napa da kareta-mu. Napa da-hanggubalu la pa-hanjàlungu da panjuri-mu, dàngu kupiti-ha napa mbutada da pambàda pitimu welingu la tau hawiangu. Nda pahili rongu-ahapa napa da pakaruhi-da da papalewa-mu,” wàna.