Read Kambera NAHUMU 3 Bible Online

NAHUMU 3 - Kambera bible

NAHUMU 3

¹Nai-a-ai yiana na paraingu mambinu wàngu kambàliku dàngu bungu wai ria; nambinu-nya malanja pa-rambangu jàka ndia pa-ribangu.

²Ronguwa kaheuku iwi dàngu kanggeriku ndutungu, kangguruku njara mapalai dàngu kareta ma-tanggàjiru.

³Da pamba li la njara da-kaluluku wàngu ànjaru-da, da hapanda re - rerida, dàngu da nimbu ji - jilada. Nda pataü padiha-ha da tau mameti, da metida dapabu - bundungu dawàngu pa-tunjuru wànja tau.

⁴Na Naniwa pahunda pa-wuangu-ya padua-ka hukungu. Na manandangu-na pa-maratangungu-ya. Dangu banjaru pambàda palaku-na alimu, dàngu na-pamanda-nja[8] wàngu minangu kareuku-na.

⁵Napanii i MIRI Hupu Mambiha, “Ha dumu Naniwa, ku-pamayila-kau napa! Ku-kalàba-ya na laümu la hangga ba - banjaru, hi daita-ya na pa-makia, wàmu.

⁶Ku-palua-nggau lima hama malanja pa-mayitangu, ku-patàda-nggau ma-marihaku; kutukau pa-imingu, wàngu.

⁷Na wiliru na maita-kau hi napanii napa, ‘Na Naniwa tanyungguru watu ndàba-ayaka! Nggamu ma-handuka dànya nyuna? Nda ningua mawua-nya omba eti,’ ” wàna.

⁸Ha dumu Naniwa, jia rihi hàmu-mukaka nyumu welingu la Tembi na parai puhu pareta Mehiru? Na Tembi la hingi luku-mbuya na maopa-nya beri hama kangeli. Tubangu, na Luku Nilu jiaya na tindingu ngia pa-torungu-na.

⁹Na Tembi na-pareta-ya na Hundangu dàngu na Mehiru, dàngu nda ningu dirana na kawaha-na; na Limbia dàngu Putu jiaha da angu pakuhingu-na.

¹⁰Jiapa-kai ba tuna, da ma-ngiangu la Tembi pa-dundilu-ha la ngia pa-tanawangu. La mbuu ndàba kahanga ànda pa-pameti-ha da anada. Ba hapajia-ha da tau bokulu-da, patuu la nggili bàhiha hi pabe - berinja la hapajia-ha da ma-tanawa-nja.

¹¹Ha dumu Naniwa, umeti widimbu nyumu napa paraï pa-maüku. Napa nyumu upamukarungu-mbu kau mara welingu la mu - muhumu.

¹²Mbuu ndàba da ngia pa-torungu-mu hama tuna pingi kapilitu-ha napa, ma-kabàta wàngu wua marara-na. Jàka kàduku-nya nuna na pingi ai, napa da-kambutuku da wuana la ngaru tau ma-mbuhangu panganya.

¹³Da panjuri-mu da pa-maluputu tau kawiningu tàka na tanamu nda ana payatangu ndokuna, ba hangganya na muhu. Dakehi la epi da-kahoru pindu bokulu-mi.

¹⁴Taku biawa wai ka rima hahangu wàngu, pa-namatu-nya na mandaina ba nggupulu-kau, dàngu pa-kapingatu-ha da tindingu-mu! Kali - lijakungu-wa kapihaku ka pandoi watu rara, dàngu pandoi hahaha padua da maluda!

¹⁵Nggàra biaya na pawunda-mu, napa kahewa-ma-ana, nadu ba jiangu-ma bau meti la epi, jàka ndia uhanggubalu la pa-hànjalungu. Napa umolungu hama tuna ihi woka pa-pambuta kabala. Mbàda paworu kabalangu-muka nyumu.

¹⁶Da tau danggangu-mu dalàpa-ha da dangu kandunu la awangu! Tàka nàhu da-molungu-ka, hama tuna kabala ma-wàlahu ruu kàpada hi da-hawurungu lundu munangu-da.

¹⁷Ba hapajia-ha da tau bokulu-mu dàngu da maningu wai ngabangu hama kabàba kabala-ha ma-pa-hangindingu la kangeli la rehi maringu. Tàka ba nahunga-ka na lodu lu hawurungu-danyaka hi da munangu; nda haàtu-a mapinya jàka nggiha dalaku ningu.

¹⁸Ha dumu hanganji Ahuru! Ba hapajia-ha da nggumbunuru-mu mbàda meti-daka, tàka ba hapajia-ha da mbupati-mu katuda lundu nu-danyaka. Da rayatu-mu dapai - ihangu la ma-palindingu, dàngu nda haàtu-a ma-ngalangu pa-karia-nja la pabeli.

¹⁹Na jàramu nda pa-ngalangu-a patunya muru, dàngu da manua-mu nda pa-ngalangu-a pa-pahàmu-ha. Mbuu ndàba na tau marongu-ya na kabumu da-kapokukungu lima paraï pambaha eti. Nadu mbuu ndàba na tau mbàda mayila-daka ruku akatu-mu na manda ningu dirana.