Read Kambera HAMBAKUKU 3 Bible Online

HAMBAKUKU 3 - Kambera bible

HAMBAKUKU 3

¹Yiana-ya na hamayangu-na i Wunangu Hambakuku:[7]

²Ou MIRI, kurongu-ya ruku na pawunda-mu, na orangu pa-karàda na-hulungu la etinggu. Màla àruki na pawunda ma-bokulu nuna kau hili belinya handàkangu-ki la rehima nyuma nàhu. Jiapa ka nambana na etimu namu bia kama làti.

³Nyumu Ala Mahupu Matua mamai welingu la Temàngu,[8] upamaingu welingu la ma-palindingu la Paràngu. Na awangu na-lumburu-nya bokulu dàngu mbihamu; na pinu tana nambinu-nya wotungu ndumamu Nyumu.

⁴Upamaingu dàngu hambila ma-handaraku, welingu la limamu naluhu na harii ma-hanggilangu, lai nuya ukawini-nya na kawaha-mu.

⁵Uparàha-nya na kanyaki pa-mangilu-nggau, tàka na meti hi nandàki-kau.

⁶Jàkau pànjangu, nda - ndàndana na pinu tana; jàkau tàngaru da-kanggupuku da banjaru. Da palindi weli nungu da tanyàbaru; da tandula weli ndaingu dawawa hi da kendaru, la tandula nuda-duka unjàlapu Nyumu la rehi la handàka-na.

⁷Kuita-ha da rayatu la Kuhàngu ba da-mangàdatu, dàngu da tau Mindiangu ba da-kandàndaku.

⁸Ou MIRI, rukuna na tehiku ihu Nyumu hi nahei na ma-karaü? Jiaha da luku ihu ma-pawitingu hiu mbeni? Ukaliti karumangu beri njara dàngu kareta pabera, nu bau wuanya talu na banjaru-mu.

⁹Na tandai panamu mbàda hawaritu-munyaka, na ana panamu bahingu-mananya la papuli-nya.[9] Hàla hiu bikaya na pinu tana hi danjadi da luku.

¹⁰Ba itakau Nyumu da-yoyangu da palindi welingu la awangu hama tuna pa-hanubuku-ya ba napuru na urangu. Na wai la unu tana na-kawoku na talia-na, da ngalingu-na dahanggu - ngguluru hi da-kawunggaru.

¹¹Na handaraku-da da ana panamu da-talanjiru pa-mbangatungu, na nimbumu na-kajilaku ba bi - bilana, ka pànjangu-nanyaka na mata lodu dàngu na wulangu la pangia-na.

¹²Dàngu hulungu-na na ma-karaü unjadanya na pinu tana; da banjaru utaro - rohaku-ha dàngu mbana etimu.

¹³Nyumu ulaku hanggangu, pa-pahàla-ya na banjaru-mu dàngu pa-pamara-ya na hanganji paleha-mu. Upunggilu panjoru-ya na liku uru tau akatu, uwari pambuta-ha mbuu ndàba da makiku-nya.[10]

¹⁴Da ana panamu dalumbu làpahu-nya na ngora pamba muhu ba damai da tanatara-na ba hama mbàngatu làpuru-ha, ka paiha pa-tanyala-nggama. Nyuda dariki mbàha eti hama tuna tau ma-kapidihu kangunduhungu tau manda toma lurina.[11]

¹⁵Wàngu njaramu ukali - lijaku-nya na tehiku lerangu hi lundu na wura bara na waina.

¹⁶Ba ronguya nuna na-bàrangu na etinggu dàngu ra - ràngguna na tàda ngarunggu. Ku-haluputu nda ningua kalotu-nggu, da tunjuru da wihinggu,[12] la nggini bia ba kulaku ningu. Napa kunedi mambiru-nya na hukungu-na i Ala la ngara ma-pakalulu-kungu.

¹⁷Jiapa ka nda ningu wuada da pingi kapilitu dàngu nda ningu angguru-da da pingi angguru, jiapa ka nda dadiki da wua haitungu dàngu da ihi woka uhu nggàndumu da-pahala eti, jiapa-kai ka dameti ndàba da mbimbi dàngu da oka banda nda ningu ihida,

¹⁸napa ku-hawola mànuma duku, ba Nyumudu MIRI Ala ma-pamàna-ngga.

¹⁹Nyumu uwuangga àtalu hama tuna wihi ruha, bau pa-kapànduku-ha da wihinggu. Nyumu malonda-ka ka ku-mambiru ba kulaku la ma-palindingu.