Read Kambera HANGGAI 2 Bible Online

HANGGAI 2 - Kambera bible

HANGGAI 2

¹La tànggalu dua kambulu hau, wulangu pihu la ndaungu nuna, nahili panii i MIRI la ngaruna i Wunangu Hanggai.

²I MIRI na-paràha-nya i Hanggai papanii-nya i Nggumbunuru Herumbambilu, i Ratu Bokulu Yuhua, hamangui na rayatu, ka patàka-nya na lii langu yiana,

³“Ningu la hongami nyimi manamu-yapa jàka nggi tuna mangarangu-na yiana na Umanggu àmangu? Tàka nàhu nggikina na hadana, wàmi? Nda ana palii eti ndoku-ana? wàngguka.

⁴Na nyuna, àmbu jia mbota monungu dimi, ha nyimi nggubulu-mi! Pangala bianya na paràma, ba pa-dàingu ndula-manggunggai.

⁵Bai luhu welingu la Mehiru, mbàda njanji-manggu-nyaka la paopa-nggai nyimi. Tàka nàhu opa-manggu-nggaipa nyimi. Ba tuna, àmbu nggàradu pa-mangàdatu-mi.

⁶La rehi na ma-dànggitu napa kuyoya-nya na awangu dàngu na tana, na mara dàngu na tehiku.

⁷Napa ku-pakanggupuku-ya mbuu ndàba na banjaru, tàka da banda da malanja-da hi ngàndiha yiahu, hi lupangu na-hulungu na Umanggu wàngu pawulu-da nyuda.

⁸Mbuu ndàbada da àmahu marara mabara la pinu tana yiana mangunggu Nyungga-maha.

⁹Na Umanggu na mabidi, narihi mangarangu-pa napa welingu la ma-wungangu, dàngu lai nu napa kuwua-nya peku dàngu luri mbokaru na banjaru-nggu,” wàna. I MIRI Hupu Mambiha-ma na mambàda panii, wàna.

¹⁰La tànggalu dua kambulu patu, wulangu hiwa, la padàmbu wàna na ndaungu pareta-na i Hanganji Ndariu, nahili panii i MIRI Hupu Mambiha lai Hanggai,

¹¹“Karai-yawa na botangu-da da ratu rukuna na lii yiana:

¹²Ngera hama tuna jàka ningu haàtu mapiti ha-kadipu tolungu welingu la kameti pawotu lai MIRI, hi nangàndi-ya la làpitu kalembi malaina ba nabeli-ya, hàlaka nu wàngu kalembi nuna na-jonggaru roti jàka ndia pa-manahu hangia-kai, jàka ndia angguru, jàka ndia mina haitungu, jàka ndia ngga - nggàra pangangu bia, da-matua-mbuka ihu napa nuda mbuu ndàbada?” wàmu wànanya. Ba na-patàka-nyaka na pa-àrangu nuna i Hanggai, dahema da ratu, “Ndia-a,” wàda.

¹³Tunaka nu nahili pa-àrangu i Hanggai, “Ngera hama tuna jàka ningu haàtu ma-iraku rukuna ba na-jonggaru mameti, hàlaka nu hi na-jonggaru hangia welingu la pangangu nuda, na-iraku-mbuka ihu nuna na pangangu?” wànanja. Dahema da ratu, “Jia, ka tu-manaka-duna!” wàda.

¹⁴Hàla hi nahili panii i Hanggai, “Na kalaratu nuna nanggàna-mbuya na banjaru Ihirailu la tana yiana dàngu mbuu ndàba da ihi paraï-da. Ba tuna, nggàra biaya na pawotu-da la ngia pawotu maraku-yiana jiangu-ma na-iraku, wàna i MIRI,” wànanja.

¹⁵Napanii i MIRI, “Màla pangàda-nya jàka nggàraya na manjadi ba ndedi tàkanya na lodu nàhu, nu ba ndedi pakiringu pa-pahàmu-ya yiana na Umanggu! Nggikina na ngerami la rehi nu?

¹⁶Ilua pa-tàngaru kanguku uhu nggàndumu dàngu ikakaya, napa ingalangu dua ngahu kilu, tàka hi 100 kilu anai. Ilua pataku 100 litaru angguru welingu la tongu angguru, tàka na maninya 40 litaru anai.

¹⁷Mbàda papuru-nggunyaka na ngilu mbana dàngu na ura watu mboka pa-pakabu-ha mbuu ndàba da ihi wokami, tàka nyimi ndai bihumbu pabeli lai Nyungga.

¹⁸La lodu nàhu, la tànggalu dua kambulu patu wulangu hiwa, mbàda lundungu-naka ba tuya na latana na Umanggu! Hamata-ya jàka nggàraya napa na manjadi piti welingu la rehi nàhu.

¹⁹Jiapa-kai ka nda ningu-apa uhu nggàndumu marihi, dàngu ba ndedi dawua da pingi angguru, da pingi kapilitu, da pingi njalima dàngu da pingi haitungu, tàka na nyuna piti welingu la rehi nàhu ku-pakanyuru-nggai!” wànanja.

²⁰La lodu nuna, la tànggalu dua kambulu patu wulangu hiwa, i MIRI na-patàka-nya lii langu pa-pandua wundangu wàna i Hanggai,

²¹ka na-patàka-nya lai Nggumbunuru Herumbambilu. Napanii i MIRI, “Nda namandai-apa napa kuyoya-nya na awangu dàngu na tana,

²²napa ku-nyungguru-ha da pa-hanganji dàngu ku-pakabu-ha da kawaha-da. Da kareta pabera dàngu da ma-kaliti-ha ku-kabeli patiri nggubulu-nja; napa dameti mbuu ndàba da njara tàka da ma-kaliti-ha napa da-pameti dua wikida.

²³La lodu nuna, nyumu Herumbambilu, atanggu, napa kuwotu-kau pa-pareta wànya na tamunggu. Ba nyumu-duka pambàda lehanggu,” wàna i MIRI wàmunya. I MIRI Hupu Mambiha mambàda panii, wàna.