Read Kambera HAKARIA 11 Bible Online

HAKARIA 11 - Kambera bible

HAKARIA 11

¹Ha dumu Limbanongu, bunggahu-hawa da pindumu, ka na-halàru-ha epi da pingi arahu[13]-mu!

²Padudurungu-wa dumu, ha pingi ndaru, ba mbàda njoru-daka da pingi kajiu, ba mbàda mbàpa-daka da pingi ai nda najaru. Hiiwa dimi ha pingi ai bokulu la Mbahàngu. Ba mbàda parahu pa-nginjiru-haka da omangu bokulu.

³Ronguha da hiida da maningu kawahangu ba molungu-danyaka da pawulu-da! Ronguha da kangaüku hinga la omangu; ba ruha-danyaka na pangia-da la hingi Luku Yorundangu.

⁴Napanii-ngga i MIRI Ala, “Wunda-yawa ka beri hama tuna mini pawangu[14]-kau ma-pawangu mbimbi parupu.

⁵Da-pameti-ha paraï da makeiha nuda da mbimbi dàngu nda ngalangu-da hukungu. Dapanii da madangga-nja da toluda nuda da mbimbi, ‘Pa-wotungu-ya i MIRI! Nàhu bonjangu-nanyaka na wulunda!’ wàda. Nuda da ma-pawangu nda damila-ànja eti da mbimbi pa-kabubulu-da.

⁶Nda ku-mbuhangu-apa paaï-ya jiapa ka nggamu-yakadu la tana yiana. Nyungga wikima napa mawua-ya la mani - ningu kawahangu, nggubulu-na na mangia-nya. Napa nyuda da-pakabu-ya na tana yiana, tàka nda kuwàhi-aya napa welingu la limada nyuda,” wàna.

⁷Ka hewa-danggaka nyungga, Hakaria, paraï da tau danggangu mbimbi, la papawa-nja da mbimbi pa-hambàli. Dua mbunguda da tokungu-nggu; na hapungu ku-patamu-nya “Màja eti” tàka na hili hapungu “Bohuru”. Tunaka nu pakirungu-nggunyaka padaiha dàngu pa-kabubulu-ha nuda da mbimbi.

⁸Da tau ma-tailu mini pawangu ma-karaü-ngga eti dakawei-ya na lerangu etinggu. Kuwàngga-ha pa-làngangu hau wulangu.

⁹Tunaka nu kupanii-nja da kabàba mbimbi, “Nda kubihu-apa pa-pawanggai nyimi. Màta bia ka dameti da ma-hanggangu la meti, màta bia ka da-tàlaru da ma-hanggangu la tàlaru. Tàka da rihida màta da-pameti dua wikida,” wànggunja.

¹⁰Hàla hi kupiti-ya na tokunggu hi kupata-ya na patungu tamu “Màja eti” ka pa-ratahu-nya na pa-njanjingu patura-na i MIRI dàngu mbuu ndàba na banjaru.

¹¹La lodu numa ba pa-ratahu-nya nu na pa-njanjingu. Nu da tau danggangu mbimbi ba hapajia-ha da-kanàndaru-ka nyungga, ka pi-danyaka ba talànga paniina i MIRI daa la pawunda-nggu.

¹²Kupanii-nja nyuda, “Jiaya jàka wàmidu umbu - umbu, wua-nggahawa da wundanggu; tàka jàka ndia, màtangu,” wànggunja. Hàla hi da wuangga tailu kambulu àmahu bara wundanggu. Napanii-ngga i MIRI, “Puhiha nada da àmahu bara la kanai àmahu la Umanggu,” wàna.[15] Ka patama-nggunjaka nuda da tailu kambulu àmahu bara la kanai àmahu la Umana i MIRI. Tuna nu-ma-a na pawili dàngga!

¹⁴Tunaka nu pata-nggunyaka na tokungu padua mbungu wàda na pa-patamu-nggu “Bohuru”, ka mbera-nanyaka na ka-haungu-na na Yahunda dàngu na Ihirailu.

¹⁵Hàla panii-nanggaka i MIRI, “Uhili handàkangu ki pawunda-ya ba beri mini pawangu-kau, tàka la rehi nàhu hama tuna mini pawangu manda hàmu.

¹⁶Nadu pangaba-nggunya napa na haàtu mini pawangu la padaiya na kabàba mbimbinggu, na nyuna nda na-kawelangu-a mbimbi ma-mbulangu; nda nahimbu-a mbimbi ma-njàrangu, nda natungu-mbu muru mbimbi ma-manua, dàngu nda nawua-nja pangangu da mbimbi da maluri-ipa. Jiapa na ngaa-kinjapa da tolu mbimbi da mamboka halawàla dàngu na-butuhu-ha da wuuda nuda da banda.

¹⁷Nanggàna-ya ràtungu nuna na mini pawangu na manda ningu linguna! Ba mbàda dunjaku-nanjaka da kabàba mbimbina. Pabera ma-pahupu-nya napa na kawaha-na. Napa na maluputu na limana dàngu napoki na wua matana kawana,” wàna.