Read Kambera HAKARIA 13 Bible Online

HAKARIA 13 - Kambera bible

HAKARIA 13

¹I MIRI Hupu Mambiha napanii, “La rehi nu napa na-tapanjiru na hau matawai, ka hawari-ha da ana umbuku-na i Ndautu dàngu da mangia-nya na Yeruhali welingu la njala dàngu la ngera lumungu marapu pambàda wundada.

²Napa la lodu nu ku-podahu-ha da tamu marapu welingu la tana yiana, hi nda haàtu-mbupa manamu-ha. Mbuu ndàba da tau, wunangu-ka da mawàda napa kuwàngga pa-karia-nja dàngu da tau pa-huruku wàndi ka putingu.

³Dàngu jàka ningupa tau, ba pa-tàkangu-nggunya lii langu na mawàna, da ina ama wikina dapanii-nya ba lupangu-ma pa-hukungu metiya nyuna, nadu ba ma-kambàliku-ya nuna na papanii-na. Jàka pa-daingu-mana-nyapa wunangu-ka ba wàna, napa natanju pameti-ya ama dàngu ina wikina.

⁴La lodu nu napa ba hapajia-ha da wunangu da-makia patuya la pawunda-da ba wunangu-ha. Nda jia hau-ada paki wunangu pa-panyonga wàngu dàngu ka bokulu eti wànja da harii matada.

⁵Jiapa na-panjàngangu-mbuipa napa ba dapanii, ‘Nda wunangu-aka duku. Tau tungu woka, maràma la woka-aka duku la ngala luringgu,’ maràngga, wàda.

⁶Tàka jàka na-paàra-nya tau, ‘Nggàra manua-ya la kurumu?’ jàka wàdanya, napa nahema, ‘Ku-manua la uma angunggu,’ ” wàna.

⁷Napanii i MIRI Hupu Mambiha, “Hadanguwa ha hapanda, kaluluku-nyawa na mini pawangu,[17] na maràma lai Nyungga. Pameti-ya ka da-tanyalangu da mbimbi. Napa ku-kaluluku-nya na banjaru-nggu,

⁸tàka la nggubulu-na na tana dua ngia la tailuya napa welingu la mangia-nya na ma-hanggubalu.

⁹Ha ngia la tailu-aya na mapeka. Dàngu napa ku-hawari-ha nyuda nu hama tuna ba paihi mbàngingu àmahu bara la epi. Napa kukama-nya hama tuna tau ma-kamangu àmahu rara. Hàla hi da-hamaya-ngga tàka hi kuhema-ha. Napa kupanii-nja ba banjaru-ngguha nyuda, tàka hi dapanii-mbu nyuda ba Nyungga-maka MIRI Alada nyuda,” wàna.