Read Kambera HAKARIA 14 Bible Online

HAKARIA 14 - Kambera bible

HAKARIA 14

¹Mareni-nanyaka na lodu pa-tandangu-na ngera i MIRI. Pa-rambangu-yaka napa na Yeruhali, tàka da pa-ngalangu papabe - beringu-ha la mbara matamu.

²Napa na-pauhi ndàbanya na banjaru i MIRI pa-kaluluku-nya na Yeruhali. Napa pawàhi-ya nuna na paraingu, pa-rambangu-ha da umana dàngu pa-rumbàku-ha da kawini-naka. Na paradua-na welingu la mangia-nya pa-dundilu-ha napa la ngia pa-tanawangu, na nyuna na rihina, napa da-ndàdiku la paraingu nuna.

³Hàla hi na-ngonjaru i MIRI hi na-ndubaku-ha la pabera-ha nuda da banjaru, hama tuna na-pawàna la rehi la handàka-na.

⁴Napa la lodu nuna na-ndolaku Nyuna la Tandula Haitungu, la tuba pahunga lodu welingu la Yeruhali. Ka bika-nanyaka lolangu ma-nggailaru na Tandula Haitungu, piti welingu la pahunga lundu la patama. Na ha-kabika nuna na palindi na-ndàharungu hu dia, tàka nahili ha-kabika hu luruya.

⁵Napa nyimi ipalai li ningu la lolangu mabika kadua ngianya[18] nuna na tandula. Napa ipalai hama tuna da boku la mangilu-mi ba natungu na upungu la rehi pareta-na i Uhia, na hanganji Yahunda. Hàla hi namai i MIRI na Alanggu, nandàki-ya paraï mbuu ndàba da papalewa.

⁶Jàka jia-yaka na loduna, nda ningu-apa maringu jàka ndia wai kapida.[19]

⁷La lodu nu nda ningu-apa kapàtangu. Pa-daingu hariina la lodu, hamangui la rudungu. Na nyuna didi-aya i MIRI na mapinya pirangu-ka natoma na lodu nuna.

⁸Napa la lodu nu, na-lulungu na wai luri welingu la Yeruhali; na beri mandua-na nuna na wai na hanggangu la Tehiku Meti, tàka nahili beri mandua-nai la Tehiku Padua-ya. Napa nalulu pangalangu na wai la nggubulu-na na ndaungu, la wula urangu hamangui la wula wandu.

⁹Ka pareta-nanyaka nggubulu-na na tana i MIRI ba Hanganji-ya; nimbihu-na na tau da ma-rubuku-nya Nyuna ba Alaya dàngu datanda-ya ba jia-maya na tamuna.

¹⁰Napa nggubulu-na na tana piti welingu la Nggemba mbara dia lundu la Rimungu mbara luru, nanjadi-ya mambila. Na nyuna na Yeruhali na-kahuluku pa-janggangu, narihi panjangga welingu la tana la winggiru-na; nuna na paraingu na-tayilingu welingu la Pindu Bokulu Mbanyamingu lundu la Pindu Bokulu Kabihu nu na pangia-na na Pindu Bokulu Wungangu dàngu welingu la Lewatu Hananeyilu lundu la ngia papohu angguru mangu hanganji.

¹¹Napa dàngu mambiru-da da tau ba da-ndàdiku la paraingu nuna, dàngu nda nggàra tapàru-a pa-mangàdatungu.

¹²Napa i MIRI na-patàka-nya kanyaki pa-mayilangu la mbuu ndàba banjaru na mambàda pabera dànya na Yeruhali. Dawua matada dàngu da làmada, jiapa mbuu ndàba daihi-mbuda da-mbubuku napa ba daluri-ipa.

¹³La lodu nu kanjupu pambingu dàngu pa-mangàdatu-nanja napa da banjaru i MIRI hi lupa nimbihu-na na tau nayàpa anguna na maninya la perana hi na-nàhaku-ya.

¹⁴Da tau mini la Yahunda napa da-pabera pa-kahiri-ya na Yeruhali. Katuu banda pa-ribangu da piti ndàbaha da pawulu-da da banjaru la winggiru-da, nu da àmahu marara mabara dàngu paki mapabu - budungu.

¹⁵Na hau kanyaki ma-wirungu nanggàna-mbuha da njara, da mbanggalu, da ota dàngu da kalandai dàngu mbuu ndàbada da banda la kotaku uma tera muhu.

¹⁶Napa la hambeli-da nuda da tau da maluri-ipa la honga ba - banjaru ma-nàhaku-ya na Yeruhali, dalua la paraingu nuna pa-marubuku-nya na Hanganji, i MIRI Hupu Mambiha, dàngu la pambabu-nya na Lodu Remi Maü Ma-paraungu.

¹⁷Napa jàka ningu banjaru manda bihu palua la Yeruhali pa-marubuku-nya na Hanganji, i MIRI Hupu Mambiha, nda jia puru-ana na urangu la tanada.

¹⁸Dàngu jàka nda dabihu da tau Mehiru pambabu-nya na Lodu Remi Maü Ma-paraungu, napa nanggàna-mbuha kanyaki pa-patàka-na i MIRI la nimbihu banjaru manda bihu palua pa-lumungu.

¹⁹Nuna-duyaka na-hukungu nduma Mehiru dàngu nduma mbuu ndàba banjaru manda bihu pambabu-nya na Lodu Remi Maü Ma-paraungu.

²⁰La lodu nuna pa-huratungu lawiti-ha da katàngu la ngaü njara, “Pa-pahinggilu ndumana i MIRI,” wàna. Da wurungu la Umana i MIRI nda danjinji-a dàngu da maku paiharungu la hangga ngia pawotu maraku.

²¹Mbuu ndàbada da wurungu la Yeruhali dàngu la nggubulu Yahunda pa-pahinggilu-ha napa ka manguna i MIRI Hupu Mambiha-ha. Na tau dangu na mawotu maraku-da da-manahu wànja tolu kameti maraku. Jàka jiaya na rehina, nda hili ningu-apa tau danggangu la Umana i MIRI Hupu Mambiha.