Read Kambera HAKARIA 5 Bible Online

HAKARIA 5 - Kambera bible

HAKARIA 5

¹Kuhili kanandarui, nu ka ita-nggunyaka na hau mbuku pa-kulurungu ba na-hawurungu hu dita.

²Na-paàrangu na papalewa jàka nggàra-ya na paita-nggu. “Hau mbuku pa-kulurungu na-mahawurungu hu dita. Hiwa metiru-na madita-na tàka na mbalaru-na, patu para dua metiru-na,” wanggu ba kuhema-ya.

³Hàla hi napanii-ngga, “La huratu pa-kulurungu nuna pa-tulihu-ya na ràtungu ndumana yiana na tana nggubulu-na. La hapapa hangga huratu, pa-tulihu-ya nimbihu-na na ma-manganga, pa-paluhu-ya welingu la paraingu yiana. Tàka la hili hangga hapapa-nai pa-tulihu-ya ba pa-paluhu-mbuya, nimbihu-na na tau mahara kambàliku.

⁴Napanii i MIRI Hupu Mambiha ba puha-nanya napa nuna na ràtungu la uma nimbihu tau ma-manganga dàngu la uma nimbihu tau mahara kambàliku. Da uma nuda napa nanggàna mànuha ràtungu hi lupa tanyungguru watuha,” wàna.

⁵Hili wudaku wànai nuna na papalewa hi napanii, “Tàngaru! hili ningui manàmu-nya!” wàna.

⁶“Nggàraya nu?” wànggu ba ku-paàrangu. Nahema, “Katanga-ya ba hauna. Nuna jia-yaka na ninu maüna na njala[6] nggubulu-na yiana na na tana nggubulu-na,” wàna.

⁷Nuna na katanga ningu ndàbi tambura-na. Ba talànga kanandaru-nggunya tabunggahu-nanyaka na ndàbina hi itaya daa la katanga na haàtu kawini ma-mandapu.

⁸Napanii na papalewa, “Nina na kawini ninu maüna na akatu-ya,” wàna. Hàla hi na-roduku belinya na kawini hu daa la katanga hi na-panggàbi-nya na katanga.

⁹Ba ku-tàngaru-ka hu dita kuita-ha da tau kawini da madua ma-hawuru tubangga nyungga. Ningu ruu kàpa kapingatu-da hama tuna ruu kàpa langgokaru. Dapiti-ya nuna na katanga hi da-hawuru ngàndiya.

¹⁰Ku-paàra-nya na papalewa, “Nggi ngàndi nidanya na katanga?” wànggunya.

¹¹Nahema, “La Mbambilu, napa lai nu da-pahada-nya na uma marapu ndumana. Jàka hàla-yaka na uma marapu, pa-bànjalu lai nuyaka na katanga ka marubuku-nya,” wàna.