Read Kambera HAKARIA 6 Bible Online

HAKARIA 6 - Kambera bible

HAKARIA 6

¹Ku-ngalangu hili hau harii mata. La rehi yiana kuita-ha da patu mbua kareta pabera maluhu welingu la njonga dàmbu palindi parunggu.

²Nuda da kareta dayila-ha njara ma-papera - papera, na ma-wungangu njara raraha, na padàmbu wàda njara mitingu-ha,

³na patailu wàda njara baraha tàka na papatu wàda njara mbàlangu-ha.

⁴Ku-paàra-nya na papalewa, “Nggàraya nuna na ihida yiada da kareta, umbu?” wànggunya.

⁵Nahema, “Nyuda jiaha, ba patuda da tuba ngia palaku-da ba dahàla pa-hurungu la hanggana i MIRI na MIRI awangu tana.

⁶Na kareta pabera payila njara mitingu hanggangu-nanya la Mbambilu hu dia. Da njara bara hanggangu-danya la patama lodu, tàka da njara mbàlangu hanggangu-danya la nanggara hu luru,” wàna.

⁷Ba daluhu-ha da njara mbàlangu, nda dangudu-a ba itaha ka laku panjanga-ya na pinu tana, wàda. Napanii na papalewa, “Lakuwa panjanga-ya na pinu tana!” wàna. Ka laku-danyaka.

⁸Tunaka nu wara-nanggaka nyungga na papalewa, “Da njara da malaku la Mbambilu mbàda pa-wadaru-danyaka na hànggana i MIRI,” wàna.

⁹I MIRI nawua-ngganya yiana na lii langu,

¹⁰“Piti-hawa da hunggu maraku pawua-da i Helindai, i Tombia dàngu i Yandaya, nu da tau da mabidi beli welingu la ngia pa-tanawangu la Mbambilu. Lu ngàndiha nuda da hunggu maraku-da la umana i Yuhia anana i Hapanya.

¹¹Welingu la àmahu marara mabara pawua-da nyuda, pandoi-wa hau tubuku pareta dàngu pakàna-nya la katiku-na i Ratu Bokulu Yuhua anana i Yuhandàku.

¹²Patàka-nya lai nyuna, ba tuna yia na paniinggu Nyungga MIRI Hupu Mambiha, ‘Na tau, Na Kalunga ba wàndanya, napa na-madàpangu la pangia na ngia paninya dàngu napa na-pahada belinya na Umana i MIRI.

¹³Nyuna-maka napa ma-pahada-nya na Umanggu dàngu na-mangalangu tembi hama tuna haàtu hanganji, dàngu napa na-pareta-ya na rayatu-na. Napa na-karaha-ya haàtu ratu hi daràma pa-mbapangu dàngu hàmuda,’ wàna.

¹⁴Pa-pahàmu la Uma-nggunya na tubuku ka pangàda wànja i Helindai,[7] i Tombia, i Yandaya, dàngu i Yuhia.[8]

¹⁵Napa damai da tau welingu la mamarau hi da-pandulangu pa-pahada-nya na Umanggu. Jàka na-lundungu-ka na pahadangu-da Uma, pi-danyaka napa ba Nyungga MIRI Hupu Mambiha mambàda palewa-kau lai nyuda. Mbuu ndàbada nuda da-hàrangu napa jàka datundu langatàka-nja da hupu liinggu Nyungga, MIRI Alada nyuda,” wàna.