Read Kambera HAKARIA 7 Bible Online

HAKARIA 7 - Kambera bible

HAKARIA 7

¹La tànggalu patu wulangu Kihiliu, nu na wulangu hiwa, la ndaungu papatu wàna, ba na-pareta i Hanganji Ndariu, nahili wuangga lii langu i MIRI.

²Da ma-ngiangu la Mbetilu mbàda palewa-danyaka i Harehiru dàngu i Renggimu-Meliku dàngu da tauda palua la Umana i MIRI Hupu Mambiha pakarai kanyuru-na.

³Pa-paràhangu-mbuha ka tuna yia ba paàra-nja da ratu dàngu da wunangu, “Lupangu-mapa ihi bàdi ma-paduduru-nya na kabuna na Umana i MIRI wàngu puaha la nimbihu wulangu lima hama tuna na pambàda wàma la dangu ndaungu mandaina?” wàmi wàdanja.

⁴Yiana-ya na lii languna i MIRI na matàka-ngga,

⁵“Patàka-nyawa nggubulu-na na ma-ngiangu la paraingu yiana dàngu ba hapajia-ha da ratuka, na puaha dàngu na padudurungu pawunda-da la wulangu lima dàngu pihu na mapihu kambulu ndaungu mandaina nda patembi wàngu-aya lai Nyungga.

⁶Hamangui ba dangangu ba da-ngunungu, keha ka nahoda-ta wàdama-a,” wàmu wànangga.

⁷Nunaya na papanii-na i MIRI la ngaruda da wunangu la rehina na ma-làpahu ba ngia-nyapa na Yeruhali dàngu ba daluri mbokaru-pa da mangia-nya. La rehi nu nda mbulungu-bia la nde - ndeha winggiru-na na paraingu na-ndàdiku ningu na tau, tàka lupa la ngaba mbara luruya dàngu la hi - hingi tandula la patama lodu-mbuya.

⁸I MIRI Hupu Mambiha nawua-ngganya yiana na lii langu,

⁹“La ndau - ndaungu na ma-làpahu kuwua-njaha yiada da pareta la banjaru-nggu, ‘Lupangu-ma ipahuri ma-molangu, ipa-namungu, dàngu ihàmu eti hanggangu la angumi.

¹⁰Àmbu kapidihu-ha da kawini meti lei, da ana mamila, da tau hangàdangu da ma-padaingu la hongami, jàka ndia nggàmu biaya na panggàna handuka. Dàngu àmbu wuku-mbuya na ma-akatu hanggangu la angumi,’ wàmunja wànangga.

¹¹Tàka na-malihu na banjaru-nggu dàngu nda ana bihu-màda parongu; dahulu-nja da kahilu-da ka àmbu peku ronguda.

¹²Da-patongguru-ha da etida hi lupa da-patongguru watungu. Kanjupu mbenika ba nda dakiku-nja da pa-pekangu da pambàda wua-nggunja, la ngaruda da wunangu àmangu.

¹³Nda kuhema-aha da hamayangu-da, nadu ba nda darongu-mbui ba kupanii Nyungga.

¹⁴Hama tuna na làpuru, mbàda wari-ngguhaka hi lupa da-ndàdiku lerangu la ta - tana tau hangàdangu. Yiana na tana ma-kamboka mbàda malinggitu halawàla-naka nda ningu mangia-nya dàngu nabulu jua,” wàna.