Read Kambera MALIAKI 1 Bible Online

MALIAKI 1 - Kambera bible

MALIAKI 1

¹Yiana-ya na lii languna i MIRI lai Maliaki ndumana na banjaru Ihirailu.

²I MIRI napanii-nya na banjaru-na, “Kumbuha-nggai nyimi,” wàna. Tàka na nyuna dahema nyuda, “Nggiki hamana nambuha-mu-nggama nyuma MIRI?” wàda. Nahema i MIRI, “Ka nda ayana i Yakupu-aya i Ehaü? Na nyuna ba tuna jiaya i Yakupu na pambuha-nggu,

³tàka i Ehaü ku-karaü-nya eti. Na tana pa-tandulangu manguna i Ehaü mbàda pakabu-nggunyaka, tàka na tanana kuwua-ya la banda bohu la maràda telangu,” wàna.

⁴Ngera hama tuna jàka dapanii da wàla wuana i Ehaü, nu da tau Endumu, “Da paraingu-ma mbàda pakabu-haka, tàka na nyuna napa mahili pahada belinja,” jàka wàda, napa nahema i MIRI, “Da-pahada belingu bia duna, na nyuna napa kuhili nyungguru-ha. Nyuda pa-patamungu-ha ‘Tana katadaku’ dàngu ‘Banjaru panggàna hànggana i MIRI-ha lundu nu - nu,’ ” wàna.

⁵Napa na banjaru Ihirailu naita mata wikiya, na rukuna nuna, hi dapanii, “Kanjupu bokulu-ya i MIRI; na kawaha-na na tomambu la hambeli tana Ihirailu!” wàda.

⁶I MIRI Hupu Mambiha napanii-nja da ratu, “Na ana natembi amana, dàngu na haàtu ma-paloku natembi umbuna. Nyungga yia Ama-mingga; ka nggikina hi ndai tembika Nyungga? Nyungga yia jiaka mangia Ditanggai; ka nggikina hi ndai mangàdatu-ngga Nyungga? Nyimi mi-pawawa-ka, tàka ba tuna paàrangu bia-minya, ‘Nggàraya na pa-pawawa wàmanggau Nyumu?’ wàmi.

⁷Tuna nu na pawawa-mingga Nyungga bai wotu tanda maraku manda ràkana pa-maraku wànja la ngia pawotu-ngga maraku. Hàla paàrangu bi minyai, ‘Nggàraya na panda tembi wàmanggau Nyumu?’ wàmi. Bai pairaku-ya na ngia pawotu-ngga maraku-du.

⁸Jàkai wotungga maraku banda poki, jàka ndia mahidu jàka ndia ma-kaliparu, nda nanjala-a na pawunda nuna wàmi bai kakaya? Kamanya kai wuanya banda matungu nu na nggumbunuru! Jia hàmuna-kaka na etina tàka hi mahàmu-ya na-palua-nanggai lima?”

⁹Tàka nàhu, ha nyimi dimi ratu, kamangu duna kai kamahingu lai Ala ka namila-nda eti. Nda jia hema-ananya na-hamayangu-mi, tàka nuna nu jiaya rukuna na njala wikimi.

¹⁰I MIRI Hupu Mambiha napanii, “Narihi hàmupa ka bita bianya na pindu umanggu, nadu ba kahewa-ma-ana bai paroka epi la pinu ngia pawotu-ngga maraku. Nda kumbuha-anggai nyimi, dàngu nda kubihu-a pa-kataku-ha da tanda maraku pawotu-mi lai Nyungga.

¹¹Da banjaru la nggubulu pinu tana datembi-ka Nyungga. La nggi - nggini datunu dupa la patembi-ya na tamunggu dàngu dawotu kameti maraku ma-paràkangu, nadu mbuu ndàbana na banjaru datembi-ka Nyungga!

¹²Tàka nyimi ipawawa-ka Nyungga bai kakaya ba nda ningu wilina na ngia pawotu-ngga maraku, tàka iwotuha la pinuna da pangangu panda mbuhami nyimi.

¹³‘Nahoda-taka nuda mbuu ndàbada,’ wàmi, tàka hi ndai ihili-ngga Nyungga. Nyimi ingàndi banda pa-manganga, banda kaliparu jàka ndia mahidu la pawotu-ha lai Nyungga. Bai kakaya ku-mbuhangu pa-kataku-ha nuda da tanda maraku-mi?

¹⁴Nanggàna-ya ràtungu ima-panyonga na mawotu banda manda pa-wilingu lai Nyungga, jàka ningu la kabàba bandana banda mahàmu na pambàda njanji-nangga! Ba Nyungga du Hanganji Bokulu, dàngu natembi-ka paraï nggubulu banjaru,” wàna.