Read Kambera MALIAKI 2 Bible Online

MALIAKI 2 - Kambera bible

MALIAKI 2

¹I MIRI Hupu Mambiha napanii-nja da ratu, “Yiana-ya na hupu liinggu lai nyimi:

²Tembi-kawa Nyungga wàngu pawunda-mi. Jàka ndai mbuhangu parongu-ya na paniinggu, napa kuràtu-nggai. Mbuu ndàba da pangala-mi tuda paluri wàmi napa na-pambeli-ya ràtungu. Langatàka mbàda ràtu ndàba nggunyaka na mahàmu, ba ndai tunya wilina na hupu liinggu.

³Napa kuhuku-nja da anami dàngu kuperi-nja tai banda kameti maraku pawotu-mi da matami, tàka hi ruruhu-kai nyimi la pabundu tai banda nuda.

⁴Ka pi-dimi-nyaka ba mbàda wua-nggunyaka na hupu lii yiana, ka pa-daingu pangalangu-na na pa-njanjingu-nggu dàngu da ratu, da wàla wuana i Lewi.

⁵La pa-njanjingu nuna mbàda njanji-nggunyaka napa nyuda ba daluri ma-lundungu dàngu da mambiru, dàngu ku-paràha-nja nyuda patembi-ka Nyungga. La rehi nuna da tembika dàngu da mangàdatu-ngga Nyungga.

⁶Nyuda da-papeka-nya na mahàmu, dàngu nda jia-aya na manjala. Nyuda da-palonggamai dàngga Nyungga dàngu wàngu patutungu-da ba danunju-ya na pambuha-nggu. Nadangu-mbu na tau pandula-da ka àmbu dahili wunda ma-akatu.

⁷Mbàda wai ngera-mada-nyaka da ratu la pa-wuangu lii pa-pekangu ma-padeningu rukunggu Nyungga, MIRI Hupu Majangga. Nyuda ngia pa-paàrangu-na na rayatu jàka nggàraya na pawuku-nggu, nadu ba jiaha nyuda da papalewa-nggu.

⁸Tàka nàhu nyimi dimi ratu, mbàda hiliru-mika welingu la ànda ma-padeningu. Da lii pa-pekangu-mi mbàda ruruhu-daka tau dangu la pawunda manjala. Nyimi mbàda paruha-minyaka na pa-njanjingu patura-nggu dàngu nyimi.

⁹Tàka welingu lai Nyungga duku, napa ku-pawiti-nya ka àmbu na-kawela-nggai banjaru Ihirailu rukuna ba ndai nunjuya na pawuku-nggu, dàngu rukuna bai pindi kaba mata tau la rehi papeka-minya na banjaru-nggu,” wàna.

¹⁰Ka nda angu Ama-anda nyuta mbuu ndàbanda? Ka nda haàtu-ana na Ala na ma-wuluta nyuta mbuu ndàbanda? Jàka tunanu madu, ka nggikina hi ta-maràngga pa-hinggilungu pa-njanjingu dua wikinda, tàka ba tunda nu hi ta-hinggilu-nya na pa-njanjingu patura-na i Ala la boku la mangilu-nda?

¹¹Na banjaru Yahunda mbàda pangga-danyaka na pa-njanjingu dàngu i Ala dàngu dawunda pawunda pa-mayitangu la Yeruhali dàngu la nggubulu-na na tana. Nyuda da pairaku-yaka na Umana i MIRI na pambuha-da, dàngu dapaha kawini da ma-hamayangu marapu banjaru hawiangu.

¹²Màla àruki i MIRI ka na-pahinggilu-ya welingu la banjaru Ihirailu da-mawunda matungu nu. Màla àruki ka àmbu dahili kikungu ndokuma la banjaru nda la pawotu-ha da kameti maraku lai MIRI Hupu Mambiha.[1]

¹³Yiana-ya nahili hau pawunda-mi. Nyimi ipalena-nya wai mata na ngia pawotu-nya maraku i MIRI; nyimi ihii dàngu ihii jilungu ba nda na-kataku-ahapa i MIRI da kameti maraku-mi.

¹⁴Nyimi ipaàrangu ka nggikina hi nda nahili kataku-ha. Nadu ba napinya paraïna i MIRI ba ndai tuturu-du la kawini pambàda pahami ba bidi taukai. Na kawini nuna angu luri-munya, tàka nyimi mbàda kaleka-minyaka nyuna, jiapa-kai ka mbàda pa-njanjingu-mi la hanggana i Ala la pa-daingu pa-tuturu lai nyuna.

¹⁵Ka nda mbàda wulu-nanggai i Ala ba hau tolu dàngu ba hau ndewa-ami dàngu na kawini nuna?[2] Nggàraya na pawuku-na i MIRI hi tuna nu? Nda hili nggàra-a, màta kapeku ngalangu-mi anami manjadi banjaru pa-langatàkangu-na i Ala. Ba tuna hamata pahàmu-nya na wikimi, ka àmbu jia ningu la hongami na manda tuturu la papaha-na.

¹⁶“Huda eti-manggunya na pa-wàrungu,” wàna i MIRI Ala Ihirailu. “Huda eti-manggunya jàka ningu haàtu welingu lai nyimi mawunda mbana eti tungu nu hanggangu la papaha-na. Rima pa-hàmungu-ma, àmbi jia kaleka-minya na papaha-mi,” wàna.

¹⁷Nyimi mbàda pahoda-minyaka i MIRI wàngu kareuku-mi. Tàka paàrangu-minyai, “Nggàraya na pa-pahoda wàmanya i MIRI?” wàmi. Nyimi ipahoda-ya i MIRI bai panii, “Mbuu ndàbana na tau mawunda ma-akatu tau hàmuha dàngu nahàmu-nja eti i MIRI,” wàmi. Jàka ndia wàngu paàrangu-mi, “Nggiya na Ala na pakira ba mamola-ya?” wàmi.