Read Kambera MALIAKI 3 Bible Online

MALIAKI 3 - Kambera bible

MALIAKI 3

¹Nahema i MIRI Hupu Mambiha, “Napa ku-palewa-ya na papalewa-nggu ka na-palànyapu-ngga ànda. Hi jia harabàndangu bianggu, Nyungga MIRI pahimbu-mi, ba kumai napa la Umanggu. Napa na papalewa-nggu na parinju-mi namai hi na-bobaru-ya na panjanji-nggu,” wàna.

²Tàka nggamu ma-torungu la lodu maina i MIRI dàngu ba na-pawuwangu wikina? Nadu napa Nyuna hama tuna epina na tau matanggu paihi mbàngingu patuku, dàngu beri hama tuna habuna na tau matanggu baha.

³Napa namai pa-patandangu ngera, hama tuna na tau ma-payarahu dàngu ma-paihi mbànginya na àmahu bara. Hama tuna na tau tuku ba na-paihi mbànginja da àmahu marara mabara, tuna numbu na papalewa-na i MIRI ba na-paihi mbànginja da ratu ka dawotu-ha da kameti maraku pa-namatungu la pawàngu na pambuha-na i MIRI.

⁴Tàka da kameti maraku da pawotu-da napa lai MIRI da banjaru Yahunda dàngu Yeruhali da-pambaha etiya i MIRI, hama tuna la rehi la handàka-na.

⁵Napanii i MIRI Hupu Mambiha, “Napa kumai lai nyimi pa-patandangu ngera. Napa kurengga la pa-hakahii papanja da tau ma-pandoi kabeli mata, da tau ma-njuraku, da ma-hakahii kambàliku, da ma-kaputingu la pa-mbayaru ngganji tau pahewa, da ma-kapidihu-ha da kawini meti lei, ana mamila dàngu tau nàmu, hamanai la pa-hakahii papanja mbuu ndàba da tau da manda tembika Nyungga,” wàna.

⁶“Nyungga MIRI-ka dàngu nda ku-panjilungu-a. Tuna nuduka, nyimi wàla wuana i Yakupu, hi nda pa-patàlaru-kai.

⁷Hama tuna da boku la mangilu-mi la handàka-na, nyimi mbuu ndàbami mbàda hiliru-mika welingu la uku - ukunggu dàngu ndai tuturu pa-pahàra-nja. Beliwa lai Nyungga, napa Nyungga kubeli lai nyimi. Tàka paàrangu-minyai, ‘Nggàraka bàdi pawunda-ma ka mabeli lai Nyumu?’ wàmi.

⁸Nàhu ku-paàra-nggai nyimi: Pekuna ihu jàka ningu haàtu ma-panyonga-ya i Ala? Tàrangu ba ndia-a. Tàka ba tuna, nyimi panyonga bia mingga. ‘Nggiki hamana?’ wàmi bai paàrangu. Kuhema: La ngera mbayaru-ha da hangia la hakambulu dàngu la ngera wotu hunggu maraku, wànggu.

⁹Nyimi mbuu ndàbami nanggàna-kai ràtungu, rukuna ba na-panyonga-ka paraïna banjaru nggubulu-na.

¹⁰Ngàndi-hawa la Umanggu mbuu ndàbada da hangia la hakambulu lai nyimi, ka ningu pangangu ma-bundungu lai nu. Kama-nggawa, napa kai itaya ba ku-bunggahu-ha da pindu awangu dàngu hi ku-pabundu-nggai mbuu ndàba da mahàmu.

¹¹Napa nda kumàta-anja da mabei ka da-paruha-ha da ihi wokami; da pingi angguru-mi napa da-kabàta da wuada.

¹²Oha-adaka nyuda, wàdanggai napa paraï da banjaru mbuu ndàbada, nadu na tanami ba pa-ngiangu mahàmu-ya ka ngianya,” wàna.

¹³Napanii i MIRI, “Napanii-mi rukunggu Nyungga lalu pawawa-mamingga,” wàna. “Tàka nyimi paàrangu-minyai, ‘Ka nggàraya na papanii-ma rukumu Nyumu?’ wàmi.

¹⁴Nyimi mbàda panii-mika, ‘Kahewa-ma-ana ba lumunya i Ala. Nggàra linguna ba tawunda-ha da tolu tanggu rumba ngeranda la hanggana i MIRI Hupu Mambiha, jàka ndia la pa-paloha-nya lai Nyuna ba tapeka halaera la pawunda-nda?

¹⁵Hama tuna na paita wikinda da tau ngànjangu bia da ma-paohangu. Na tau akatu nda mbulungu biana ba na-bonjangu paluri mbokaru, tàka jàka dakama-nya na lerangu etina i Ala wàngu akatu-da, jiangu damara bia,’ ” wàmi.

¹⁶Tàka da tau ma-mangàdatu-nyai i MIRI dapanii dua wikida. I MIRI narongu-ya dàngu na-hamata-ya jàka nggàraya na papanii-da nyuda. Da tamu tau matembi-ya dàngu ma-mangàdatu-nya Nyuna, pa-tulihu-ha la hau mbuku pangàdangu la hanggana Nyuna, wàda.

¹⁷I MIRI Hupu Mambiha napanii, “Nyuda danjadi banjaru-nggu napa. La lodu pa-luangu-nggu lima, nyuda mangu pambuha-ngguha napa. Napa kumila-nja eti, hama tuna na haàtu ama mamila-nya eti na anana na ma-lumunya nyuna.

¹⁸Napa na banjaru-nggu nahili itaya na hekangu-na na ura tau hàmu dàngu tau akatu, na tau malumu-ngga dàngu na manda lumungga,” wàna.