Read Kambera MATIU 1 Bible Online

MATIU 1 - Kambera bible

MATIU 1

¹Yiana-yaka na juru boku la mangilu-na i Yehu Karitu, wàlana i Ndautu, wàlana i Ambarahàmu. Welingu lai Ambarahàmu lundu tàka lai Ndautu, da tamu boku la mangilu-na i Yehu:

²I Ambarahàmu, i Ihàku, i Yakupu, i Yahunda dàngu da angu dedina, i Perihu dàngu i Heràhu (na inada Tamàru-ya na tamuna), i Hehirungu, i Ràmu, i Aminandàpu, i Nahahungu, i Hàlamungu, i Mbowàhu (na inana, i Rahàpu-ya), i Ombitu (na inana, i Rutu-ya), i Ihai dàngu i Hanganji Ndautu.

⁶Welingu lai Ndautu lundu tàka la rehi wàrunya na banjaru Ihirailu la Mbambilu, jiaha da pa-tulihu pa-ndàkingu yiada: I Halomu (na inana, papaha-na i Uria-ya làti), i Rehambiamu, i Ambia, i Aha, i Yuhapàtu, i Yoràmu, i Uhia, i Yotàmu, i Ahàhu, i Hihikia, i Manahi, i Amungu, i Yuhia, i Yakonya dàngu da angu dedina.

¹²Piti welingu la rehi wàrunya na banjaru Ihirailu la Mbambilu lupa la dedina i Yehu pa-tulihu-ha da tamuda yiada da pa-pandàkingu: i Yakonya, i Halatialu, i Herumbambilu, i Ambihutu, i Eliyakimu, i Anjuru, i Handuku, i Akimu, i Eliutu, i Eliahàru, i Matàngu, i Yakupu, i Yuhupu leina i Maria. Welingu lai Maria nuna-duka hi nadedi i Yehu, i Karitu ba wàdanya.

¹⁷Jia ba tuna welingu lai Ambarahàmu lundu lai Ndautu hakambulu patu ndalaru-ya. Welingu lai Ndautu lundu la rehi wàrunya na banjaru Ihirailu la Mbambilu hakambulu patu ndalaru-manai. Tàka welingu la rehi wàrunya na banjaru Ihirailu la Mbambilu lupa la dedina i Karitu jiamayai ba hakambulu patu ndalaru-na.

¹⁸Tuna nu na ruku dedina i Yehu Karitu. Na inana, i Maria, da pa-tubangu dàngu i Yuhupu. Tàka ba ndedipa da-papohungu, lohangu-nanyaka ba mbàda woru ihi-naka i Maria. I Yuhupu nda napinya na woru ihina i Maria ba ruku mbiha Ngahuna i Alaya.

¹⁹I Yuhupu, na tubana, tau manundu la uku anggama-ya. Jia-duya màta ka wàngu pabota kangunduhu-ya na pa-tubangu-ma wànaka, ka àmbu na-makia i Maria la hangga madangu, wàna.

²⁰Ba talànga pata - tandangu tunaka nu i Yuhupu, manggadipangu-nanyaka. La manggadipangu-na, naita-ya na haàtu na papalewa-na i Miri na mapanii dànya, “Yuhupu, wàlana i Ndautu, àmbu mangàdatu-du la pa-pakuru umangu dàngu i Maria; nadu na ana na maninya la kambuna tumbuna ruku mbiha Ngahuna i Alaya.

²¹I Maria napa na-habolangu haàtu anakeda mini. Na anakeda nuna màta kau patamu-nya Yehu, nadu Nyuna napa na ma-pamàna-nya na banjaru-na welingu la njalada”, wànanya.

²²Mbuu ndàbana hi tuna nu, ka peku pa-deningu-na na puluna i Miri la ngaru wunangu-na, nu,

²³“Na haàtu na anakaria napa naworu ihina hi na-paanangu haàtu anakeda mini. Na anakeda nuna màta ka Imanuelu-ya na tamuna,” ba wàna. (Na Imanuelu hilu Imbarani-ya, nu ‘I Ala ninyaka lai nyuta’), wàna-duka.

²⁴Ba nahadangu-ka i Yuhupu, pahàra-nanyaka na papanii-na na papalewa lai nyuna. Paha-nanyaka i Maria.

²⁵Tàka ba ndedipa na-habola-nya na anana i Maria, i Yuhupu nda na-papohu da-anya i Maria. Tàka ba nadedi-ka na anakeda, i Yehu wànanya na tamuna paraïna i Yuhupu.