Read Kambera MATIU 12 Bible Online

MATIU 12 - Kambera bible

MATIU 12

¹La hau lodu Hangahu, ba nali ningu la hau woka uhu nggàndumu i Yehu, da makiku-nya da-pakiringu pamuti uhu nggàndumu, hi dangangu ba manjuu-danya.

²Ba daita-haka tau Parihi, hi dapanii dànya i Yehu, “Tàngaru! Da tau makiku-nggau dapangga-yaka na uku anggama-nda ba datuya na pa-hiringu la lodu Hangahu,” wàdanya.

³Nahema i Yehu, “Màla ndedi mihandàkangu-a nyimi pambaha-ya jàka nggàra ulana i Ndautu ba jiaya na manjuuda nyuna dàngu da karia-na?

⁴Ba natama nyuna la Uma Ala; hi nanganja da roti da pambàda mangejingu-ya i Ala. Làti tundunya na uku anggama-nda, nyuna dàngu da karia-na nda ukua panganja da roti nuda — mbulungu da ratua duda làti da mapeku panganja.

⁵Jàka ndia ndedi mimbaha-maya dimi daa la huratu ukuna i Muha, nu la nimbihu lodu Hangahu da ratu da ma-paloku la Uma Ala, dapangga-ya na kalaratu lodu Hangahu, tàka nda pa-panjala-aha?

⁶Pangàda-nya na paniinggu yiana: lai yiahu ninya na marihi bokulu welingu la Umana i Miri.

⁷Daa la Huratu Matua ninya na pa-tulihu: Na mila etia duku na pakaruhi-nggu, nda kameti maraku banda-a. Làti nyimi jàka mipi hàmunya na panii nuna, ndai panjala-aha làti da manda njala.

⁸Nadu na Ana Tau ba makuaha lodu Hangahu-ya,” wàna.

⁹I Yehu na-dunjaku-nya lai nu hi nalaku la hau uma bungguru.

¹⁰Lai nu ninya na tau na mameti lima hapapa-na. Ba tau mapira-ya na mahi - himbunya njalana i Yehu, da-paàra-nya, “Pekuna ihu la pa-pamàlaru tau la lodu Hangahu,” wàdanya.

¹¹Nahema i Yehu, “Era ningu haàtu lai nyimi maningu mbimbingu heu, tàka la lodu Hangahu na-kanabu la lambongu manjolungu; màla na mangu mbimbingu nda napamu-karungu-a pa-padita-ya nuna na mbimbi weli dalungu la lambongu?

¹²Na, na tau narihi pabilangu-pa welingu la mbimbi! Jàka tuna nu pekuna pandula tau la lodu Hangahu,” wàna.

¹³Tunaka nu i Yehu hi napanii-nya na tau na mameti lima hapapa-na, “Pajola-ya dumu na limamu!” wànanya. Na tau nuna na-pajola-ya na limana, ka hàmu-nanyaka na limana hama tuna na lima hapapa-na.

¹⁴Ba tuna da tau Parihi, dunjaku-ma-adanya nuna na uma bungguru, hi da-pahamangu pa-pameti-ya i Yehu.

¹⁵I Yehu napi-manya na pawuku akatu-da da tau Parihi hanggangu lai Nyuna. Ka laku-nanyaka welingu lai nu, nadangu na tau na makiku-nya. Hi na-pamàlaru hàlaya na tau na mahidu.

¹⁶Na nyuna nahiri-nja papanii la tau rukuna Nyuna.

¹⁷Ba tuna nu pa-deningu-nanyaka na papanii-na i Ala la ngaruna i Wunangu Yahaya,

¹⁸“Yiana-ya na papalewa na papindi-nggu, na tau pambuha-nggu dàngu mali la etinggu. Na Ngahunggu kuwua-nya Nyuna, na pa-deningu-nggu napa na-bobaru-ya la ba - banjaru-ka.

¹⁹Nyuna nda na-pahànggangu dàngu nda na-warangu-a, nda na-pabobarungu-a la ànda bokulu.

²⁰Na kambauni na ma-tamainangu nda napata-aya, na palita na malàlu nda napàda-aya. Napa Nyuna na-pajàrungu hi lupa natoma-ya na ma-deningu,

²¹mbuu ndàbada da banjaru damonu-nya Nyuna,” wàna.

²²Tunaka nu dangàndi-nya i Yehu na haàtu tau poki dàngu kambiu nadu ba huruku-nanya wàndi akatu. I Yehu na-pamàlaru-ya na tau nuna hi lupa napingu papanii dàngu pangita.

²³Na-hangàtaru hàla na tau hi dapanii, “Talànga wanguna Nyuna ni Anana i Ndautu-ya ihu na pambàda ràndi?” wàda.

²⁴Nu da tau Parihi ba darongu-ka, hema-danyaka, “Na tau nina hi napeku pawàngga wàndi akatu, nadu i Mbeluhembulu, na kapala wàndi akatu, na mawua-nya kuaha tungu nu Nyuna,” wàda.

²⁵I Yehu napinya na pa-kanandi-da nuda da tau Parihi. Jia-duyaka hi napanii-nja, “Na hau nanggara jàka napai - ihangu la kaliba - kalibaru na ma-pamuhungu, na nanggara nuna nda na-padaingu-a. Dàngu na hau paraingu jàka ndia na kuru uma napai - ihangu dàngu na ma-pamuhungu dàngga anguda taweharu-nanyaka duna.

²⁶Tuna numbu la pareta-na i Kambàliku; na hau kalibaru jàka nawàngga-ya na kalibaru hau, ka taweharu-nanyaka na pareta-na dàngu napa tanàhaku-nanyaka.

²⁷Na paniimi nyimi, Nyungga ba kuwàngga wàndi akatu wànggu-nya na mbihana i Mbeluhembulu. Jàka tuna nu nggamu mbiha-naka na pawàda da makiku-nggai ba dawàngga wàndi akatu. Da makiku-nggai nyuda-ma-aka da ma-wuangu mbuti ba njala-minya nyimi!

²⁸Nyungga duku ba kuwàngga wàndi akatu wànggunya na mbihana na Ngahuna i Ala. Nu tandana ba pa-kiringu-nanyaka pa-pareta i Ala la hongami nyimi.

²⁹Nggiki tama-naka na tau la umana na tau kapàru la paramba-nja da bandana, jàka ndedi-madu nahondu mangilu-ya nuna na tau kapàru? Hàlaka nu, hi namangu paramba-nja da bandana.

³⁰Na tau na manda angungga Nyungga, papa-nangga Nyungga-duka. Dàngu na tau na manda pambapa-dàngga Nyungga na ma-langatàka paruha-nanya na paràma-du-ngguka!

³¹Jia-duya nu, kaipinya, era tuna manjala na tau ka na-paakangu,[10] peku-napa la pajàma-nya! Tàka jàka na-paaka-nya na Ngahuna i Ala, nyuna nda peku-anapa la pajàma-nya!

³²Era pekana hangia na tau mapapa-nya na Ana Tau, nyuna peku-napa la pajàma-nya, tàka jàka na-paaka-nya na Ngahuna i Ala, nda peku-ana la pajàma-nya, ka la rehi nàhukai hamanai la rehi hupu njàpuna,” wàna.

³³“Ka ngalangu wua mahàmu, na-kamboka bàdi na pingina. Jàka nda na-kamboka na pingina, nda nahàmu-mbu na wuana. Na kamboka-na na nda kamboka-na na pingi ai tapi weli wuanya.

³⁴Nyimi tau akatu-kai, nggiki pingu-mika papeka-ya na mahàmu jàka mi-akatu-madu? Nggàraya na maluhu welingu la ngaru mbumbaru-mana-nyaka welingu la eti!

³⁵Na tau hàmu natiki-ya na maha - hàmuma duna maa ba mbinu-mananya mahàmu. Na panjàngangu-na, na tau ma-akatu natiki-ya na maa - akatu-ma duna maa ba mbinu-mananya ma-akatu.

³⁶Jia ba tuna, namuya: la Lodu Hupu njàpuna, nimbihu-na na tau tanggu-mananya la pahema-ya nimbihu-na na patiki-na na manda lingu.

³⁷Nadu ba jiaha da kareuku wiki-mamu dumu da pawàngu ba botaya jàka njala-munya jàka ndia,” wàna.

³⁸Tunaka nu ba mapira-ha da ngguru anggama dàngu tau Parihi dapanii, “Màla Umbu Ngguru, ma-rinjungu làti pa-itangu kau patumbu tanda pa-hangàtarungu,” wàda.

³⁹“Kanjupu ma-akatu-ya dàngu maka-tadaku-ya na tau nàhu,” wàna i Yehu. “Nyimi mikarai-ka patu tanda pahangàtarungu? Nyiminda pawua-anggai ana hau mbu tanda pa-hangàtarungu, hinggilu-na na pa-hangàtarungu rukuna i Wunangu Yunuhu.

⁴⁰I Yunuhu tailu mbua lodu tailu mbua ruduna daa la kambu iya bokulu. Tuna numbu napa na Ana Tau ba hanina tailu mbua lodu tailu mbua rudungu la kambu tana.

⁴¹La Lodu Hupu njàpuna, da tau da ma-mandapu la Naniwa napa dahada kariangu da tau da maninja nàhu, hi da-panjala-ha. Nadu da tau Naniwa ba da-panjilungu duda welingu la njalada, ba jiaya na-pabobarungu-na i Yunuhu lai nyuda. Tàka lai yiahu nàhu ninya na marihi bokulu welingu lai Yunuhu!

⁴²La Lodu Hupu njàpuna, napa na maràmba kawini welingu la tana mbara luru dahada kariangu da tau la rehi nàhu, hi da-panjala-ha. Nadu keha ka ronguya na papekangu-na i Halomu na ma-manggàna, nuna na maràmba kawini na-hadangu hi na-lakungu ngarangia madira matiki marauna welingu la hupu tana. Tàka lai yiahu nàhu ninya na marihi bokulu welingu lai Halomu!” wàna.

⁴³“Era dunjaku-nanya wàndi akatu na haàtu na tau, njadangu-nanyaka na wàndi lai nu - lai nu ba nahimbu pangia mamàdu ngia pa-pànjangu-na, tàka nda na-hunggungu.

⁴⁴Jia-duyaka hi napanii, ‘Napa ka kuhili beli la uma na pambàda dunjaku-nggu,’ wàna. Natàka-ka lai nu, hi uma jua bia-yaka, naili dàngu na-lànyapu.

⁴⁵Hi nalua dàngu na-kariangu-mbu anguna ba mapihu-ha da wàndi hawiangu da marihi akatu welingu lai nyuna. Tunaka nu tama-danyaka lai nu la tau, hi da-engangu lai nu. La hupu njàpuna na ngerana na tau nuna manaü iraku-naka welingu la wungana. Tuna nu-mbuduka napa na ngerana na tau akatu la rehi nàhu,” wàna.

⁴⁶Ba dàngu panii bia-napa i Yehu dàngu na tau dangu, tàka-danyaka na inana dàngu da angu dedina. Ndolaku-danya lua la hambeli, da-pamukarungu patama tomaya ka panii dànya wàda.

⁴⁷Ninya na haàtu welingu la honga tau dangu napanii-nya i Yehu, “Ha umbu, na inamu dàngu da angu dedimu ninja lua la hambeli. Ka mapanii dànya Nyuna, wàdanggau,” wàna.[11]

⁴⁸Nahema i Yehu, “Nggamuya na inanggu? Nggamuha da angu dedinggu?” wàna.

⁴⁹Na-patuji-ha da makiku-nya hi napanii, “Yiada-ha duku da inanggu da angu dedinggu.

⁵⁰Na tau na mawànya na pambuha-na na Amanggu la awangu, jiaya duku na angunggu paluhu, na anawini-nggu dàngu na inanggu,” wàna.