Read Kambera MATIU 13 Bible Online

MATIU 13 - Kambera bible

MATIU 13

¹La lodu nunama i Yehu ba na-dunjaku-nya nuna na uma hi nalaku la hingi tàma hi na-mandapu lai nu.

²Lalu danguya na tau ma-pauhi winggiru-nya i Yehu, jia-duyaka hi nalaku pa-mandapu ningu la tena, tàka na tau dangu ndolaku-danya la hingi wara.

³Ma - màtuka pa-papeka-nanja nyuda paraïna i Yehu ba nawàngu pangerangu. “Na haàtu na mini tungu woka nalua pa-hàbarungu wini,” wàna i Yehu ba napa-kirinya na pangerangu-na.

⁴“Ba talànga hàbarungu-naka nu, ningu wini ma-kanabu la ànda. Datàka da ma-hawurungu hi da-nàhiku pambuta-ya na wini.

⁵Ninja da ma-kanabu la ma-pawatungu, na tanana na-manipa-a. Darengga tumbu ba na-manipa na tanana.

⁶Tàka ba najangga-ka na lodu, malaï-danyaka da tumbuda, ka màdu-danyaka hi dameti, nadu ba nda da-tanjiku da amuda.

⁷Ninjai da wini da ma-kanabu la manggawa rii madàka. Datumbu da rii madàka ka kapidihu-danjaka da tumbuda da wini hi lupa dameti.

⁸Tàka ningumai nyuna wini ma-kanabu la tana hàmu ma-kamboka, ka wua-danyaka; ningu ma-pahangahungu, ningu ma-panomu kambulungu, dàngu ningumbu ma-patailu kambulungu,” wàna.

⁹Ba na-wàlahu-yaka na pangerangu nuna i Yehu, “Jàka ningu kahilu-mi jia hi mirongu!” wàna ba napanii.

¹⁰Tunaka nu mai-danyaka da makiku-nya i Yehu hi da-paàra-nya, “Ka nggikina Nyumu umbu hi muwàngu pangerangu bau panii dànya na tau dangu?” wàdanya.

¹¹Nahema i Yehu, “Nadu nyimi ba pa-wuangu-makaika la papinya na pa-kàpingu jàka nggiki wàna na pareta-na i Ala, tàka nyuda ndia-a,

¹²Nadu na tau na mambàda ningungu, napa ba pahili wua padangu-duyaipa, hi lupa na-parihingu. Tàka na tau na manda ningu ngga - nggàrangu, na ma-hawutu-na na maninya lai nyuna napa ba papiti-duyai-pa.

¹³Tuna nu hi kuwàngu pangerangu, jàka kupanii dànya na tau dangu, nadu ba daita, ba hama tuna manda ita-duha; nyuda ba darongu ba hama tuna manda rongu-duha dàngu nda da-hàmburu-ya.

¹⁴Jia ba tuna nu pa-deningu-nanyaka hama tuna na panyura-na i Wunangu Yahaya: ‘Napanii i Ala: Nyuda napa nuangu-mana ba darongu tàka nda da-hàmburu-ya; nyuda napa nuangu-mana ba da-hamata tàka nda dapinya jàka nggàraya na madedi.

¹⁵Nadu na kanandingu-da da tau nuda ba mbàda buli-madaka, da kahilu-da da-kawanga-ka dàngu da matada da-kapudangu-ka. Yiana hi tuna nu ka àmbu peku itada da matada, da kahilu-da ka àmbu peku ronguda, da kanandingu-da ka àmbu dahàmburu-ya dàngu ka àmbu dabeli lai Nyungga hi ku-pamàlaru-ha,’ ” ba wàna.

¹⁶“Tàka wangu ailulu-na nyimi,” wàna i Yehu la makiku-nya, “nadu ba ma-langatàka-ya na rongumi dàngu na ngitami.

¹⁷Kanandi-nya, dangu wunangu dàngu tau manundu lai Ala da ma-rinjungu paita-ya na paita-mi nyimi nàhu, tàka nyuda nda daita-ya. Nyuda da-rinjungu parongu-ya na pa-rongumi nyimi nàhu, tàka nyuda nda da-ronguya,” wàna.

¹⁸“Ronguya na ihina na pangerangu rukuna na ma-hàbarungu wini.

¹⁹Da wini da ma-kanabu la ànda pangera jia-haka da tau da marongu-ya na lii jàka nggikina ba na-pareta i Ala, tàka nda da-hàmburu-ya. Nàmu-nyaka i Ma-akatu hi naramba-nya na pambàda hàbarungu daa la etida.

²⁰Da wini da ma-kanabu la pangia ma-pawatungu, pangera jia-duhaka da tau da marongu lii, manyamalu kataku hàmu eti-ma-adanya.

²¹Na nyuna na lii nuna nda na-paamu daa la etida, jia hi nda ana torungu-na. Ba da-pàdangu ma-handuka jàka ndia ma-mayila rukuna na lii nuna, manyamalu kandulingu-ma-adanya.

²²Da wini da ma-kanabu la ma-nggawa rii madàka, pangera jia-haka da tau da marongu-ya na lii, tàka da-kadiku-nya na paluri wàda dàngu da-rinjungu paluri mbokaru. Rukuna nuna, na lii langu welingu lai Ala pa-palàlu-ya daa la etida, hi nda datu wuada.

²³Tàka da wini da ma-kanabu la tana kamboka, pangera jia-duhaka da tau da marongu-ya na lii nuna tàka hi da-jàngapu-ya. Ka wua padangu-danyaka, ningu ma-hangahu, ningu manomu kambulu dàngu ningu ma-patailu kambulu wundangu ihina,” wàna.

²⁴I Yehu nahilu pekaya na hau na pangerangu la tau dangu, napanii, “Jàka na-pareta i Ala, na hadana ngera hama tuna na pangerangu yiana: Na haàtu na tau tungu woka na-hàbarungu wini hàmu la wokana.

²⁵Tàka la hau rudungu, ba talànga katuda hàla-naka na tau, tàka-nanyaka na muhuna hi na-hàbaru-nya wini witu la honga uhu nggàndumu, hàla laku-nanyaka.

²⁶Nu ba datumbu-ka da uhu nggàndumu dàngu ba da-huburungu-ka da wilida, wuwa-danyaka da witu.

²⁷Tàka da tau pahewa-na na mangu wokangu mai-danyaka lai nyuna hi dapanii, ‘Ha umbu hi wini hàmuha wàngguka da patumu la woka? Nggikina hi ninjaika ni da witu lai nu?’ wàda.

²⁸Nahema na mangu wokangu, ‘Nuna paraï ruku muhuya,’ hi wàna. Hi da-paàrangu da tau pahewa, ‘Màla umbu ka malua làti pabuta-ha da witu?’ wàda.

²⁹Nahema-ha, ‘Ndia-a, nadu jàka mibuta-haka da witu, napa datambuta pa-kariangu-duka da uhu nggàndumu.

³⁰Màta bianja da witu ka datumbu pa-kariangu da uhu nggàndumu lundu tomaya na rehi muti. Napa ka kupeka-nja da tau mamuti: Pauhi mangilu pàkunja da witu, painja ka tunuha. Hàlaka nu ka pauhi-nja da uhu nggàndumu, ka pahàmu-ha la dàndaku,’ ka wànggu,” wànaka.

³¹I Yehu nahili pekaya na hau na pangerangu la tau dangu, “Jàka jia-yaka na pareta-na i Ala, na hadana hama-naka na pangerangu yiana: Na tau napiti-ya na hau karohu wàla rii hawi,[12] hi natuya la wokana.

³²Na karohu hawi wini madira màraku-ya. Tàka jàka natumbu-ka hi rihi bokulu bia-nanya welingu la anguna patumbu. Ka hama pingi ai-yaka, hi lupa damaimbu da ma-hawurungu pawulu ningu hibuda la kahanga - kahanga-na,” wàna.

³³Ninya na nau ha pangerangu na papanii-na i Yehu la tau dangu, “Jàka na-pareta i Ala, na hadana hama tuna na tai wolu na papiti-na na haàtu tau kawini, hi na-uraku wànja da kanguta taringgu patu kambulu litaru hi lupa na-pupuhu hàla,” wàna.

³⁴Mbuu ndàbada da pa-ajaru-na i Yehu la tau dangu nawàngu lii pangerangu.

³⁵Nu ba tuna nu pa-deningu-nanyaka na papanii-na na wunangu, “Nyungga kuwàngu lii pangerangu ba kupanii dànja nyuda; napa ku-bobaru-nja mbuu ndàbada da pa-kàpingu weli mula weli tanangu, ba wàna,” hi wàna.

³⁶Hàlaka nu i Yehu hi na-dunjaku-nya na tau dangu hi natama la uma. Tàka da makiku-nya hi damai papanii-nya, “Màla làti umbu kau kaloka-nggamanya na àndana na pangerangu witu la honga uhu nggàndumu,” wàdanya.

³⁷Nahema i Yehu, “Na tau na ma-hàbarungu wini hàmu jiaya na Ana Tau.

³⁸Na woka jiaya na pinu tana yiana. Na wini hàmu jiaha da tau da mambàda tama la banjaru-na i Ala. Da witu jiaha da anguna i Kambàliku.

³⁹Na muhu na ma-habaru-nya na witu jiaya i Kambàliku-duka. Na rehi muti jiaya na Lodu Hupu njàpuna, tàka da tau da mamuti jiaha da papalewa la awangu.

⁴⁰Hama tuna da witu ba pauhi-nja hi tunuha la epi, tuna numbu napa la Lodu Hupu njàpuna.

⁴¹Na Ana Tau napa na-paràha-nja da papalewa-na pa-pauhi-nya welingu la honga banjaru-na mbuu ndàbana na tau na ma-pawiti-nya hi kiri tuna manjala na tau, dàngu mbuu ndàbana na tau hawiangu na mawunda ma-akatu.

⁴²Nyuda mbuu ndàbada napa pa-wàrungu-ha daa la tuluru epi ma-kandulangu, lai nu nyuda napa hii-danyaka dàngu mayila-danyaka.

⁴³Tàka da tau da mawànya na pambuha-na i Ala napa kahilaku-danyaka hama tuna matalodu la Pinu Tana Bidi-na i Ala, Amada. Jia-duya jàka ningu kahilu-mi kai rongu!” wàna.

⁴⁴“Jàka na-pareta i Ala, na hadana beri hama tuna na pangerangu yiana: ninya na banda na ma-tandaningu la tana hi na-hungguya paraï na haàtu na tau, hi na-patama belinya la tana. Tunaka nu paraï ruku nggaüru etina, lua-nanyaka padangga hàlanja da mangu wikina, hàla hi nabeli padingi-ya nuna tana,” wàna.

⁴⁵“Jàka na-pareta i Ala, na hadana beri hama tuna na pangerangu yiana: Na haàtu na mini danggangu himbu-nanya mutiara - mutiara mbana wili.

⁴⁶Ba nahunggu-yaka ba hauna na mutiara manandangu nda uku, lua-nanyaka padangga hàlanja da mangu wikina, hàla hi nakeiya nuna na mutiara ba hauna,” wàna.

⁴⁷“Jàka na-pareta i Ala, na hadana beri hama tuna na njeringu na pawàla la tàma, hi na-hanggaungu iyangu hangia - hangia.

⁴⁸Ba nambinu-ka na njeringu, dandada-nyaka la mara paraï da mini yàpa iyangu. Tunaka nu mandapu-danyaka hi dapindi - pindiha da iyangu: Da mahàmu datuha la kanaingu tàka da manda hàmu dawàru-nja.

⁴⁹Nuya na ngerana la Lodu Hupu njàpuna, napa da papalewa lua-danyaka pa-kawàri-ha da tau akatu welingu la tau da malumu-nya na pambuha-na i Ala.

⁵⁰Tunaka nu da tau akatu hi wàrunja la tuluru ma-paepingu. Lai nu nyuda hii-danya dàngu mayila-danyaka,” wàna.

⁵¹“Màla mi-jàngapu-duha nuda mbuu ndàbada?” wàna ba na-paàrangu i Yehu. “Ma-jàngapu-ha umbu,” wàda.

⁵²Hàla panii-nanyaka i Yehu, “Jia-duya nimbihu-na na ngguru anggama na mambàda njadi angu banjaru-na i Ala, beri hamana na haàtu mangu umangu na ma-paluhu welingu la kanai bandana malanja bidi dàngu malanja ndai,” wàna.

⁵³Ba nahàla-ka i Yehu papeka-ha da pangerangu-na, dunjaku-nanyaka lai nu,

⁵⁴hàla beli-nanyaka la kotaku wikina. Lai nu hi nalua pa-ajaru la uma bungguru, tàka da tau da marongu-ya, lalu hangàtaru-danya. Dapanii, “Nggi welingu-ka ihu na tau yiana ba na-ngalangu manggàna tungu nu? Dàngu nggi welingu-ka ihu na-ngalangu ningu mbiha la pa-patumbu pa-hangàtarungu?

⁵⁵Ka nda jiaya ni na anana na tukangu? Ka nda jiaya i Maria na inana ni, dàngu da angu dedina ba jiaha i Yakombu, i Yuhupu, i Himungu dàngu i Yundahu?

⁵⁶Dàngu ka nda lai yiahu-mbuha da-ngiangu ningu da anawini-na? Nggi welingu hi nangala hàlanja nuda?” wàda.

⁵⁷Ka jukaru-danyaka i Yehu. Hi napanii i Yehu lai nyuda, “Na haàtu na wunangu patembi-ya la nggi - nggi, hinggilu-na la kotaku dàngu la uma wikina,” wàna.

⁵⁸Ka jia-duyaka i Yehu hi nda nawunda padangu pa-hangàtarungu lai nu nadu ba nda dawaiya.