Read Kambera MATIU 15 Bible Online

MATIU 15 - Kambera bible

MATIU 15

¹Ha pajuru-da da tau Parihi dàngu ngguru anggama welingu la Yeruhali damai lai Yehu. Da-paàra-nya,

²“Nggikina da tau makiku-nggau Nyumu hi dapangga-ya na huri boku la mangilu-nda? Nganguwa jàka wàda ba nda dabaha pàku limada hama tuna na kalaratu!” wàdanya.

³Nahema i Yehu, “Ka nu nggikina nyimi mipangga-ya na pareta-na i Ala, paraï ruku la pakiku-nya na hurida da boku la mangilu?

⁴Nadu napanii i Ala, ‘Tembiha da amami da inami,’ wàna, dàngu ‘Nggamu ma-paaka-nya na amana na inana, huku pameti-maya bàdi,’ wàna.

⁵Tàka nyimi na pa-ajaru-mi: jàka napanii dànja da ina amana na tau, ‘Làti da ràka pawua-nggunja da ina amanggu, ku-maraku-njaka lai Ala,’ jàka wana,

⁶na tau nuna nda pa-patanggungu-ayapa la patembi-ha da ina amana.[13] Ba tuna, mulana na huri boku la mangilu, pa-halela-minyaka na puluna i Ala.

⁷Nyimi yia tau kapelu-kai! Pa-deningu-nanyaka na panyura-na i Yahaya na ngerami nyimi:

⁸‘Tuna yia wàna i Ala: da tau nuda ba dalumu-ngga ngaru jua-ma-ada, tàka da etida damarau welingu lai Nyungga.

⁹Parahumangu ba dalumu-ngga, kalaratu tau-ma-aya na pa-ajaru-da hama tuna kalaratu-nggu Nyungga-yaika, wàna,’ ba wàna,” wànanja.

¹⁰Tunaka nu i Yehu hi na-paaunja da tau hi napanii-nja, “Rongu kai pinya!

¹¹Da ma-tama la ngaru nda da-pairaku-aya na tau; tàka da maluhu welingu la ngaruna nudaha da ma-pairaku-ya na tau,” wàna.

¹²Hàla mai-danyaka da makiku-nya i Yehu hi dapanii-nya, “Mupinya umbu da tau Parihi ba dakaraü-nggau eti ba darongu-kau bau panii tumu nu?” wàda.

¹³Nahema i Yehu, “Da matumbu-ka jàka nda pa-pamula-na i Amaya la awangu napa pabuta-ha.

¹⁴Àmbi kawela-nja da tau Parihi. Nyuda liku uru pokiha; na tau poki ka nairu ngàndi tau poki, maràngga kanabu-danyaka la lambongu,” wàna.

¹⁵Napanii i Peturu, “Màla umbu, kaloka-nggamanya nuna na pangerangu!” wàna.

¹⁶Napaya i Yehu, “Ka nu nyimi ndedi mi-jàngapu-mayai dimi?

¹⁷Ndai pinya dimi, na matama la ngaru ba napuru la kambu, hàla hi nahili luhu?

¹⁸Tàka na maluhu welingu la ngaru, ma-pawelingu la etiya; ka jia-duyaka nuna na ma-pairaku-ya na tau.

¹⁹Nadu welingu la eti datumbu da ka-nandingu ma-akatu, na ma-pawiti-nya na tau hi na-pameti tau, nanjuraku, nakiu kaü, na-manganga, na-hakahii kambàliku dàngu na-papulungu.

²⁰Jia-duhaka nuda da ma-pairaku-ya na tau, nda jia-aya ba ngangu wàngu lima panda baha,” wàna.

²¹Tunaka nu i Yehu hi na-dunjaku-nya lai nu hi nalaku la ngabana na malihi-nja da paraingu Tiruhu dàngu Hindungu.

²²Na haàtu na kawini Kanaàngu lai nu, namai lai Yehu ba nawara, “Dou Anana i Ndautu, mila àrungga eti! Na ananggu kawini na-huruku-ya wàndi akatu. Na ngerana nyuna pa-dàkangu-mananya,” wàna.

²³Tàka i Yehu nda nahema ndokuya na kawini nuna. Hi damai lai Yehu da makiku-nya dakarai-ya, “Umbu paràha-nya na kawini ka nalaku. Karepaku pàku-ananya la kajia-nda!” wàda.

²⁴Nahema i Yehu, “Nyungga papalewa la tau Ihirailu-aka, ri - rihi nyuda da ma-njàrangu,” wàna.

²⁵Ka mai-nanyaka nuna na kawini hi na-marubuku la hanggana i Yehu, “Màla àru Miri pa-ndulangu!” wànanya.

²⁶Napaya i Yehu, “Nda nahàmu-a ba pitiha da pangaa anakeda hi nduhanja da ahu,” wàna.

²⁷“Tubana Miri,” hi wàna na tau kawini, “tàka da ahu dangangu-mbu kamumu ma-kanabu welingu la lenangu mirida,” hi wàna.

²⁸Ka panii-nanyaka i Yehu, “Ina, ma-bokulu-duya na pawaimu! Màtawa ka na-patutungu hama tuna na pamonu-mu,” wànanya. La rehi nu màlaru-madua-nanyaka na anana nuna na tau kawini.

²⁹I Yehu na-dunjaku-nya lai nu, hi nalaku tundu pipitu la Tàma Nggalilia. Tunaka nu hi nahei la tandula hi na-mandapu lai nu.

³⁰Dangu tau mamai lai Nyuna da mangàndi tau kanjiku, tau poki, tau kaliparu, tau kambiu, dàngu da dangu-maipa da tau hidu hangia - hangia. Da-bànjalu-ha nuda da mahidu la hanggana i Yehu, hi na-pamàlaru-ha da tau nuda.

³¹Na tau dangu na maninya lai nu da-hangàtaru langatàka, ba daita-haka da tau kambiu ba peku kareuku-da, da tau kanjiku ba dahàmu, da tau kaliparu ba dapangga, dàngu da tau poki ba dangita. Ka wotu haila-danyaka na Ala banjaru Ihirailu.

³²Tunaka nu i Yehu napaau-nja da makiku-nya hi napanii, “Kumila-nya eti Nyungga yia na tau dangu. Mbàda tailu mbua lodu-daka ba dakaria-ngga Nyungga, tàka nàhu nda ningu-apa pangada. Nda kupuli-anja palaku dàngu nda ningu ihi kambuda, napa da-haluputu-du la ngara-ngia,” wàna.

³³Ka paàrangu-danyaka da makiku-nya i Yehu, “Nggi ta-ngalangu ningu biaka pangangu lai yiahu la pangia ma-indiku tungu yia ka tawua-nya pangangu yiana na tau dangu?” wàda.

³⁴“Pirada da roti lai nyimi?” hi wàna i Yehu ba na-paàra-nja. “Pihu mbuada, dàngu ana iyangu ana pira ngiuda,” wàda.

³⁵Ka paràha-nanjaka i Yehu da tau dangu pa-mandapu la tana.

³⁶Hi napiti-ha da roti pihu mbua dàngu da iyangu, tunaka nu hi na-pamalangu-nya i Ala. Hàlaka nu hi nakawita - wita wànja limana da roti hamanai da iyangu hi nawua-nja da makiku-nya. Tàka nyuda hi dapabe - berinya na tau dangu.

³⁷Ngangu hàla-danyaka lundu dambihu. Hàlaka nu da makiku-nya i Yehu hi da-pauhi-nja da rihi nganguda. Mbuu ndàbada pihu mbua mbola mbinuda.

³⁸Nggubulu-na na tau mini jua-a na mangangu la rehi nu ningu patu rataya, nda padiha-ya na kawini dàngu anakeda.

³⁹Tunaka nu i Yehu paràha-nanyaka na tau pabeli. Nyuna wiki hei-nanyaka la tena hi nalaku la ngaba Manggandàngu.