Read Kambera MATIU 16 Bible Online

MATIU 16 - Kambera bible

MATIU 16

¹Ninja ba mapira-ha da tau Parihi dàngu tau Handuki damai lai Yehu ka ta-kahili-ya wàda. Dakarai-ya ka na-patumbu tanda mbiha tandana Nyuna ba ma-pawelingu lai Alaya.

²Nahema i Yehu, [“Jàka jia-yaka na tamana na lodu, ‘Habola-nanya, nadu ba narara na awangu,’ wàmi duka.

³Tàka la mbaru, ‘Nàmunya na urangu taï, ba narara na awangu dàngu na-panggumungu,’ wàmi. Nu mipingu bia patanda-ya na awangu jàka nggàraya na manàmu-nya na matumbu, tàka na tandana na matumbu nàhu, ndai pingua panyura-ya!” wànanja.]

⁴“Mambana akatu dàngu katàdaku-ya na tau la rehi nàhu. Nyimi mikarai-ka pa-patumbu tanda mbiha. Na nyuna nda pa-wuangu-akai ana hau tanda mbiha mbulungu-ana na tanda mbiha rukuna i Wunangu Yunuhu,” wànanja. Ba napanii tunaka nu dunjaku-ma-ananja, hi nalaku.

⁵Ba datàka-ka la hapapa tàma da makiku-nya i Yehu, hinaka hi dapinya ba da-marombangu pangàndi roti.

⁶I Yehu napanii-nja, “Pananjarungu la tai wolu tau Parihi dàngu Handuki,” wànanja.

⁷Ba darongu-yaka na kareuku-na i Yehu pa-kiringu-danyaka papanii dàngga anguda, “Hi napanii tuna nu jia-yaka ba nda tangàndi roti,” wàda.

⁸I Yehu napinya na papanii-da. Jia-duyaka hi napanii, “Nggikina nyimi hii panii wànya na ruku nda ningu rotimi? Najapu na pawaimi nyimi!

⁹Ndedi-mapa nu ijàngapu-ya? Màla ndai namu-ayapa na rukuda da lima mbua roti da pakawita - witanggu ndumada da tau lima rata? Pira mbua mbolada da rihi roti da pa-pauhi-mi?

¹⁰Dàngu jàka nggikida da pihu mbua roti ndumada da tau patu rata? Màla pira mbua mbolada da pangangu da marihi da pa-pauhi-mi?

¹¹Nggikina nyimi hi ndai jàngapu-ya ba nda jiaha da rotia ba kupanii da-nggai? Pananjarungu la tai wolu tau Parihi dàngu Handuki!” wànggunggai duku, wànanja.

¹²La malamiri da makiku-nya i Yehu hinaka hi dapinya pananjarungu ba wàna da palana i Yehu ba nda jia-aha da tai wolu pa-pandoi wàngu roti, tàka ba jiaha da pa-ajaru-da da tau Parihi dàngu Handuki.

¹³I Yehu nalua la ngaba lihi paraingu Kaiharia Pilipi. Lai nu na-paàra-nja da ma-kikunya, “Tundunya na panii tau, na Ana Tau Nggamuya wàda?” wàna.

¹⁴Dahema da makiku-nya, “Ningu mapanii, jiaya i Yuhani Pa-runungu, wàda. Ningumbui mapanii, jiaya i Elia, wàda. Hawiangui na mapanii, jiaya i Yerimia wàda, jàka ndia jiaya na haàtu welingu da wunangu, wàda,” hi wàdanya.

¹⁵“Tàka nyimi wiki nggamuya wàmi-ngga?” hi wànanja.

¹⁶Nahema i Himungu Peturu, “Nyumu jiakau na Hanganji Ma-pamànangu, Ana Ala maluri,” wàna.

¹⁷“Wangu-naka nyumu Himungu, anana i Yona!” hi wàna i Yehu. Nadu ba nda taua ma-paniinggau-nya na rukuna nuna, tàka ba na Amanggu la awangu,

¹⁸“Jia-duya kau pinya, nyumu Peturu-kau, na watu kapingatu. La pinu watu yiana-ka napa ba ku-pahada ninya na karenja-nggu, na panda hilu talu; jiapa ka na pameti wàngu-kadu.

¹⁹Nyungga napa kuwua-nggau kuhina na Pinu Tana Bidina i Ala. Nggàraya na pahiri-mu la pinu tana, napa pa-hiringu-mbuya la awangu. Dàngu nggàraya na pa-padeni-mu la pinu tana, pa-padeningu-mbuya la awangu,” wàna.

²⁰Hàlaka nu hi na-panamu hahanja da makiku-nya ka àmbu da-bobaru-ya lai ngga - nggamu ba jiaya Nyuna na Hanganji Ma-pamànangu.

²¹Piti welingu nu i Yehu paloha ailulu-nanyaka na paniina la makiku-nya, ba lupangu-maka bàdi nalaku la Yeruhali hi nadangu na mayila na pangala-na welingu la ama boku - ama bokulu, da ratu kapala dàngu da ngguru anggama. Nyuna napa da-pameti-ya, tàka la lodu patailu wàna Nyuna napa pa-pahada belingu-ya.

²²Tàka i Peturu hi nabinda-ya i Yehu la karaha hi na-pabeta-nya, “Màla àruki i Ala ka na-pamarau-ya nuna welingu lai Nyumu Miri! Àmbu jia pa-tutungu-duna nuna lai Nyumu Miri,” wàna.

²³Nambaili i Yehu hi napanii-nya i Peturu, “Laku hu luakau ha Ma-pakamangu! Nyumu àmbu pa-ratahu-dungga. Na kanandingu-mu kanandingu tauya; nda kanandingu Ala-aya!” wànanya.

²⁴Tunaka nu i Yehu panii-nanjaka da makiku-nya, “Na tau na ma-mbuhangu pakiku-ngga Nyungga na-mayaungu pàku bàdi wai ngera wikina ka naduku-ya na harika-na ka na-pangalangu pakiku-ngga Nyungga.

²⁵Nadu na tau na maaï-ya na luri wikina napa na-yàmihu na lurina. Tàka na tau na manda aïya na luri wikina lumungga Nyungga napa nangala-nya na lurina.

²⁶Nggàra lingu-naka la tau, jàka namangu hàlanya na pa-nggubulu awangu tàka hi na-yàmihu-ya na lurina? Peku-naka na luri ka panjepa wànya ngga - nggàra?

²⁷Nda namandai-apa na Ana Tau, ba namai karia-nja da papalewa-na ba natàka wàngu mbihana na Amana. La rehi nuduka ba tunya himbalu-na haàtu - haàtu na tau pa-namatu-nya na paraï paruku-na.

²⁸Kai pinya! Welingu la hongami nyimi mbuu ndàbami ningu nàhu lai yiahu na manda meti, jàka ndedi naita-ya na maina na Ana Tau ba Hanganji-ya,” wànanja.