Read Kambera MATIU 17 Bible Online

MATIU 17 - Kambera bible

MATIU 17

¹Pa-làngangu nomu mbua lodu i Yehu na-karia-nya i Peturu, dàngu i Yakombu dàngu na anguna paluhu i Yuhani, da-pamehangu la hau palindi jangga.

²La hanggada nyuda pa-njilungu-nanyaka na hadana i Yehu: Na matana na-kajilaku hama mata lodu tàka da pakina dabara kalilangu.

³Tunaka nu ita-danjaka i Muha dàngu i Elia paraï da matailu da makiku-nya ba dapanii dànya i Yehu.

⁴Ka panii-nanyaka i Peturu lai Yehu, “Miri, nahàmu làti nu ba ninda lai yiahu. Jiaya jàka wàmu, ka kuwulu tailu mbua maü lai yiahu, hau Nyumu Miri, hau i Muha dàngu hau i Elia!” wàna.

⁵Ba talànga kareuku-inapa i Peturu ninya na karumangu ma-kanjupu hambila na ma-panggàbalu-nja tàka welingu nu la karumangu parongu-ya na mapanii, “Yiana-ya na Ananggu na pambuha-nggu. Nyuna na-pamànjaku-ya na etinggu. Patingi-nya Nyuna!” na mawàna.

⁶Nu da makiku-nya i Yehu ba darongu-yaka na lii nuna, mangàdatu nda ukuha hi da-maràbaku la tana.

⁷Tàka i Yehu lua hi naràma-ha, “Hadangu àmbi mangàdatu!” hi wànanja.

⁸Ba da-tàngaru-ka nda nggamu-apa paita-da, jiaya i Yehu-makia-ka.

⁹Ba dapuru-ka welingu la palindi, i Yehu nahiri hahanja, “Àmbu paniidu lai ngga - nggamu na paita-mi ni kawai, jàka ndedi pa-pahada-nya na Ana Tau welingu la meti,” wànanja.

¹⁰Da makiku-nya da-paàra-nya, “Nggiki-na da ngguru anggama hi dapanii ba namai mangilu-mapa bàdi i Elia?” hi wàda.

¹¹Nahema i Yehu, “Jia-maduya ba namai i Elia dàngu nyuna napa na ma-palànyapu hàlaya na hangia - hangia.

¹²Tàka ka kupeka-nggai, I Elia mbàda mai-manaka, tàka nda natanda-aya tau nyuna, nyuda dawàngu-ma-a papida ba dahangga-nya nyuna. Napa tudanya numbu-duka taï na Ana Tau,” wànanja.

¹³Hàla da ngara makiku-nya da-jàngapu-yaka ba jiaya i Yuhani Pa-runungu na palana i Yehu.

¹⁴Ba dabeli-ka la tau dangu i Yehu dàngu da tau madua haàtu da makiku-nya, mai-nanyaka na haàtu tau mini, hi na-patika la hanggana i Yehu,

¹⁵“Umbu, mila àrunya eti na ananggu. Hidu wutu manu-nanya. Natungu-ka na wutu manuna mambana ailulu-ya, hi lupa nakàli kanabu la epi, dàngu la waimbuya.

¹⁶Kungàndi-mayaka làti la makiku-nggau, tàka nda da-ngalangu pa-pamàlaru-ya” wàna.

¹⁷Nahema i Yehu, “Lalukai nyimi yia! Nyimi tau pali ha-luangu-kai dàngu ndaipa-wai. Pirangu-mapa bàdi ba kundengi-kai dàngu pirangu-maipa bàdi ba ku-patoru-nggai? Ngàndiya nàmu na anakeda,” hi wàna.

¹⁸Ka pareta-nanyaka i Yehu na wàndi akatu paluhu welingu daa la anakeda. Tàka hi naluhu na wàndi akatu, ka màlaru memangu-madua-nanyaka nu-ma-a na anakeda.

¹⁹Tunaka nu da makiku-nya i Yehu damai lai Nyuna ba dawàngu pa-pamehangu hi da-paàra-nya, “Màla Miri, nggikina nyuma hi nda ma-duluku pawàngga-ya na wàndi akatu?” wàda.

²⁰Nahema i Yehu, “Nadu nyimi ba namàli na pawaimi. Kanandi-nya! Jàka ningu pawaimi hama ana karohu hawi, pekuna nyimi bai paràha-nya na tandula yiana, ‘Haleli lai nàhukau!’ ka wàminya, jiangu-ma duna ba na-haheli. Nda ningua ngga - nggàra manda peku lai nyimi! [

²¹Na nyuna na wàndi akatu tungu yia, hi napeku pawàngga-ya mbulungu ruku hamayangu dàngu puaha-a]” wàna.

²²Ba da-pauhi i Yehu la Nggalilia dàngu da makiku-nya, napanii-nja paraïna i Yehu, “Nda namandai-apa, na Ana Tau ba pulinya la lima tau.

²³Nyuna napa da-pameti-ya, na nyuna la lodu patailu wàna na-hadangu beli,” wànanja. Handuka nda ukuha da makiku-nya.

²⁴I Yehu dàngu da makiku-nya ba datàka-ka la Kapinaumu, mai-danyaka lai Peturu da ma-pahurungu hilu katiku uma Ala hi da-paàra-nya, “Na nggurumu na-wuangu hilu katiku Umana i Miri jàka ndia?” wàdanya.

²⁵Nahema i Peturu, “Na-wuangu-madu!” hi wàna. Ba na-belika i Peturu hi napanii mangilu-nya paraïna i Yehu, “Ha Himungu, màla nggikina wàna na pa-pangàda-mu nyumu? Nggamu-maka bàdi na ma-wuangu hilu katiku yia la ma-pareta pinu tana, na rayatu jàka ndia na tau weli nàmungu?” wàna.

²⁶“Na tau weli nàmungu,” hi wàna i Peturu. Nanapa-ya i Yehu, “Jàka tuna nu na rayatu nda na-wuangu-apa.

²⁷Tàka na nyuna àmbu tatuya na pa-handuka wàda da etida. Ba tuna, lua pa-mengela la tàma. Pitiya na iyangu pa-kawunga kànamu. Nu la ngaruna napa ninya na àmahu, jiaka-ma tuba hilu katiku-nda nyuta tau madua. Pitiya kau wuanja da hilu katiku-nda nyuta ndumana na Umana i Miri,” wànanya.