Read Kambera MATIU 2 Bible Online

MATIU 2 - Kambera bible

MATIU 2

¹I Yehu dedina la paraingu Mbetulehimu la tana Yundia la rehi pareta-na i Hanganji Harondi. La rehina nuna ninja ba mapira-ha da tau manggàna mapingu kandunu welingu la pahunga lodu damai la Yeruhali.

²Nyuda da-paàrangu lai nu - lai nu, “Nggiya na Anakeda, na madedi la pa-hanganji-nya na tau Yahundi? Nyuma maita-ya hungana na kandunu-na la pahunga lodu, jia hi mamai pa-maraku-nya,” wàda.

³Nu ba narongu-ka i Hanganji Harondi na rukuna nuna, katàtaku nda ukuya, hamanai mbuu ndàbana na tau la Yeruhali.

⁴Ka paau-nanjaka mbuu ndàbada da ratu kapala dàngu da ngguru anggama tau Yahundi pamai pa-pauhi. Hàla paàra-nanjaka, “La nggika napa nadedi ningu na Hanganji na paràndi-na i Ala?” wànanja.

⁵Dahema nyuda, “La paraingu Mbetulehimu la tana Yundia. Nadu ba tuna jiadu na pa-tulihu-na na haàtu na wunangu:

⁶‘Nyumu ha Mbetulehimu, la tana Yahunda, nda jia-akau nyumu ma-màrahu halawàla la hongada da paraingu mangia ngora la Yahunda. Nadu ba welingu lai nyumudu napa natàka na haàtu na ma-pairungu napa na mairu ngàndiya na banjaru-nggu na Ihirailu,’ wàna,” wàdanya.

⁷Narongu-ka pa-kalokangu tungu nu, i Harondi napaau kangunduhu-nja da tau mapingu kandunu welingu la pahunga lodu. Hàla hi na-paàra-nja jàka pirangu langatàka na kawunga hungana nuna na kandunu.

⁸Tunaka nu paràha-nanjaka la Mbetulehimu hi napanii hahanja, “Iluawa, himbu pahàmu-manya nuna na Anakeda. Jàkai hunggu-yaka, kai paniingga, ka kuluai duku pa-maraku-nya,” wànanja.

⁹Hàla laku-danyaka. Ka hilu ita-danyaka na kandunu na-paita-da yia nana la pahunga lodu. Hawola nda ukuha ba daita-yaka nuna na kandunu. Na kandunu na-mangilu-nja nyuda, hi na-ndàdiku la dita pangia-na na Anakeda.

¹¹Datama daa la uma hi daita-ya na Anakeda dàngu i Maria, inana. Patika-danyaka dàngu maraku-danyaka na Anakeda, hàla bunggahu-danjaka da kanai bandada, hi damaraku-nya àmahu marara, kaminyangu dàngu muru.[1]

¹²I Ala na-panamu-nja la manggadipangu ka àmbu dabeli lai Harondi. Jia-duyaka hi dali ningu la ànda hau ba dabeli.

¹³Ba dalaku-ka da tau mapingu kandunu, na papalewa-na i Miri na-paitangu wikina lai Yuhupu la manggadipangu. Na Papalewa napanii, “I Harondi na-patikingu pahimbu-ya na Anakeda ka pameti-ya,” wàna. “Jia hadangu-wa, kau karia-nya na Anakeda dàngu inana, pa-hinggilu la Mehiru. Pa-engangu lai nu ka lupa kuhilu panii dànggau”, wànanya.

¹⁴Na-hadangu i Yuhupu, la rudungu nunama ba na-karia-nya na Anakeda dàngu inana pa-hinggilu la Mehiru.

¹⁵Pa-engangu-danyaka lai nu lundu metina i Harondi. Tuna nu pa-deningu-nanyaka na paniina i Miri la ngaru wunangu-na, “Nyungga kupaau-nya na Ananggu welingu la Mehiru,” ba wàna.

¹⁶Ba napi-nyaka i Harondi da mapingu kandunu welingu la pahunga lodu ba panyonga-danya, lalu mbana mbeniya. Hàla wuangu-nanyaka pareta la papameti hàlaha da Anakeda mini da madàmbu ndauda lupa la wawana da maninja la Mbetulehimu dàngu la winggiru-na. Na-pajàngapu-nya na pa-kalokangu pangala-na la mapingu kandunu na ruku pahunga wàna na kandunu.

¹⁷Tuna nu pa-deningu-nanyaka na pambàda paniina i Wunangu Yerimia:

¹⁸“La Rama tarongu ma-padudurungu, mahali dàngu mahii. I Rahilu nahiinja da anana; nda nabihu ka pamanda-nya nadu nyuda ba nda ninjapa,” ba wàna.

¹⁹Ba nameti-ka i Harondi, ba la Mehiru-yapa i Yuhupu na haàtu papalewa-na i Miri hilu paitangu-nanyaka wikina lai Yuhupu la manggadipangu.

²⁰Na papalewa napanii, “Da tau da ma-patikingu pa-pameti-ya na Anakeda dameti-ka. Jiaya nu hadangu-wa, kau karianya na Anakeda dàngu inana kai beli la Ihirailu,” wànanya.

²¹Hadangu-nanyaka i Yuhupu, hi na-karia-nya na Anakeda dàngu i Maria hi dabeli la Ihirailu.

²²Tàka la malamiri i Yuhupu narongu ba i Àrakilaü, anana i Harondi-ka na mahilu-ya na amana la pa-hanganji la Yundia. Ka mangàdatu-nanyaka i Yuhupu pabeli lai nàhu. Hàlaka ba nahilu ngalangu-ka panaungu welingu lai Miri la manggadipangu laku-nanyaka la tana Nggalilia.

²³Lai nu hi na-ngiangu la paraingu Naharitu ba wàdanya. Ba tuna nu pa-deningu-nanyaka na paniida da wunangu rukuna nuna na Anakeda: “Nyuna napa Tau Naharitu,” wàdanya.