Read Kambera MATIU 20 Bible Online

MATIU 20 - Kambera bible

MATIU 20

¹“Jàka jia-yaka na pareta-na i Ala, na hadana ngera hamana na pangerangu yiana: Ninya na haàtu na tau na mangu woka anggurungu, naluhu la mbaru pahimbu tau maràma-ya na woka angguru-na.

²Ba na-pahama dànjaka da wundada hau àmahu bara hau lodu, paràha-nanjaka palaku paràma la wokana.

³La njàmu hiwa la mbaru, na mangu wokangu hili lua-nanyai, naita-ha da tau ba mapira-ha da ma-hangòbulu la pahangu.

⁴Ka panii-nanjaka, “Luawa kai ràma la woka angguru-nggu. Napa kuwua-nggai wundami ma-paràkangu,’ wànanja.

⁵Ka lua-danyaka. La njàmu hakambulu dua dàngumbu la njàmu tailu la malingu, hili luhu-mananyai na mangu woka anggurungu, hilu hama-manai.

⁶Dàngu ba ràkangu njàmu lima-yaka la malingu, hili luhu-mananyai hi na-itangu ba ni-bia-njapa da ma-hangòbulu. Hi na-paàranja, ‘Ka nggikina nyimi hi mi-ndolaku-padua bai kahau lodungu dàngu nda nggàra paràma-mi?’ wànanja.

⁷Dahema da tau nuda, ‘Nda ningu tau ma-paràma-nggama,’ hi wàda. ‘Jàka tuna nu ilakuwa kai ràma la wokanggu,’ hi wàna na mangu wokangu.

⁸La malingu na mangu woka anggurungu napanii-nya na manduru-na, ‘Paau-njawa da maràma dàngu kawàra wuanja wundada, haàtu - haàtu, piti welingu da ma-pa-malamiringu lundu tomaha da matama wungangu.’

⁹Ka mai-danyaka da maràma la njàmu lima la malingu da maràngga ngalangu hau àmahu bara.

¹⁰Ka mai-danyaka da pahewa weli mbarungu. Na pareki-da napa dangala pa-rihingu wàda. Ba tuna jia-mayai ba hau àmahu bara pangala-da.

¹¹Ba dakei-haka nuda da àmahu; hoputu-danya hanggangu la mangu woka anggurungu,

¹²‘Da maràma malamiri ana hau njàmu-ada. Tàka nyuma maràma kahau lodungu la mbana lodu hàritu, ba tuna nyumu muwua pahama-ma-anggama dàngu nyuda!’ wàda.

¹³Na mangu woka anggurungu nahema-ya na haàtu welingu lai nyuda, ‘Ha angu, nda kunjala-a lai nyumu. Ka nda mbàda pajia-amu la pangalangu hau àmahu bara wunda ràma hau lodu?

¹⁴Yiana na wundamu, kei-yawa kau laku. Pambuha-manggu duku na tau maràma malamiri pawua-nya wundana pahama dàngu wundamu nyumu.

¹⁵Màla nda pekuna nu ba kuwàngu etinggu la pawànja da mangunggu? Jàka ndia naharui wànya na etimu, ba ku-màjangu etinggu?’ ” wànanya.

¹⁶Hàla panii-nanyaka i Yehu, “Tuna numbu napa na tau na ma-malamiri napa na-mangilu, tàka na tau na ma-mangilu napa na-malamiri,” wàna.

¹⁷Ba jia-yaka nalaku hanggangu-na i Yehu la Yeruhali, la padua ànda paau-nanjaka da makiku-nya pa-pauhi meha. Hi napanii-nja,

¹⁸“Patingingu! Nàhu hanggangu-ndanya la Yeruhali. Lai nu napa na Ana Tau pa-pajàmangu-yaka la ratu - ratu kapala dàngu ngguru - ngguru anggama. Hàla rata-danyaka hukungu meti,

¹⁹tunaka nu puli-danyaka la lima tau nda Yahundi. Nyuda napa da-paaka-nya, da-pamayila-ya, lupa da-harika-nya. Tàka la lodupa-tailu wàna, napa pa-pahada belingu-ya,” wàna.

²⁰Tunaka nu na papaha-na i Hambandiu damai dàngu da anana lai Yehu. La hanggana i Yehu na-patika la pakarai ngga - nggàra.

²¹“Ka nggàra wàmu ina?” hi wàna i Yehu. Nahema nu na ina, “Na parinju-nggu yia da ananggu ba dadua ka da-mandapu haàtu ka kalai haàtu la kawana-mu jàka Hanganji-kauka napa,” wànggu hi wàna.

²²“Nyimi ndai pi-anya jàka nggàraya na pakarai-mi,” hi wànanja paraïna i Yehu. “Jia màkami-kaka dimi pa-unungu la kaba wai mayila-nggu ba lupa kuunu-manya bàdi?” wànanja. “Mamàka-ma duma,” hi wàda ba dahema.

²³Nanapa-ya i Yehu, “Tuba-duna, napa mi-unungu la kaba wainggu. Tàka jàka nggamu na ma-mandapu la kalai la kawana-nggu, nuna nda la limanggu Nyungga-aya la pa-patutu-nya. Da pa-ngiangu nuda ndumada da tau da pa-panduma-na i Amaha duna,” wàna.

²⁴Ba darongu-yaka nuna paraï da hawiangu da ma-kikungu da ma-hakambulu-da, mbeni-danjaka nuda da tau madua da ma-paangu paluhu.

²⁵Jia-duyaka hi napaau hàlanja paraïna i Yehu, hi napanii-nja, “Mipinya da liku uru la banjaru na manda tandaya i Ala ba da-kapidihu-ya na rayatu-da. Dàngu da ama boku - ama bokulu-da ba da-roduku-nja nyuda.

²⁶Tàka nyimi àmbi timi nu. Na pa-njàngangu-na, na tau na ma-mbuhangu pa-bokulu la hongami nyimi mbuu ndàbami, màtawa ka matanggu paloku-ya.

²⁷Dàngu na tau na ma-mbuhangu pangia ngaba la hongami nyimi, màtawa ka ataminya.

²⁸Hama tuna na Ana Taumbu; ba namai màta ka dalumu-ngga nda wàna-a, tàka ka kulumu-nja wàna duna, dàngu hi na-pamàja-nya na lurina la pa-pahàla-ya na tau dangu,” wàna.

²⁹Ba jia-yaka na-dunjaku-danya la Yeriku, dangu tau matundu-nya i Yehu.

³⁰Dadua da tau poki mandapu-da padua la hingi ànda. Ba darongu-ka ba nàhunya i Yehu, wara-danyaka, “Dou Anana i Ndautu, mila àru-nggama eti!” wàda.

³¹Da tau dangu da maninja lai nu dambeni-nja, kandii wàdanja. Tàka hili manaü warangu-ma-adai, “Dou Miri, Anana i Ndautu, mila àru-nggama eti!” wàda.

³²Ka ndaudaku-nanyaka i Yehu hi napaau-nja, “Màla màta ka nggikina-nggama wàmi nu?” wànanja.

³³Dahema, “Miri, ka mangita àru wàma!” hi wàda.

³⁴I Yehu namila-nja eti, hi nadàma-ha da matada. La mbàdiku-na nu madua-ka ba peku ngitada. Hi datundu-nya i Yehu.