Read Kambera MATIU 21 Bible Online

MATIU 21 - Kambera bible

MATIU 21

¹Ba da-mareni-nyaka la Yeruhali, tàka-danyaka la Mbetupanggi la Tandula Haitungu. Lai nu i Yehu na-paràha-nja da tau madua makiku-nya la palaku mangilu.

²“Ilua la kotaku ni lua la hangga,” wàna i Yehu lai nyuda. “Ndedi tiangu napa miita-ya na heu kalandai pahondu dàngu anana la lihina. Wàkahu-ya kai ngàndiya nàmu!

³Jàka ningu ma-paàra-nggai ngga - nggàra, pekanya na tau nuna, ‘Ningu paihi wàngu wàna i Miri,’[17] wàminya, napa nalu puli-manggai duna pangàndi-ya nuna na kalandai,” wànanja.

⁴Nu hi tuna nu ka na-padeningu na papanii-na na wunangu,

⁵“Pekanya la Hiungu, na Hanganji-mu nàmunya lai nyumu, Nyuna na-karàda etina dàngu na-kaliti heu kalandai, heu ana kalandai larii-nanya,” wàna.

⁶Tunaka nu laku-danyaka nuda da tau madua ma-kikungu, hi dalaku-nya hama tuna ba wànanja i Yehu nyuda.

⁷Ka ngàndi-danyaka nuna na kalandai dàngu anana. Hàla wàlahu-danjaka da hinggida la kajiada da kalandai. Tunaka nu kaliti-nanyaka i Yehu.

⁸Dangu tau da maninja lai nu da ma-wàlahu-ha da hinggida la ànda, tàka hawiangu dahàpi lai ai hi da-wewaru-nja la padua ànda.

⁹Na tau dangu da malaku mangilu la hangga dàngu na ma-malamiri la kajia-na i Yehu dalaku warangu, “Oha-anaka na Anana i Ndautu! Na-mànjaku maringu-wa Nyuna na mamai wànya na tamuna i Miri. Wotunya i Ala Mahupu jangga!” wàda.

¹⁰Hàla, ba natama-ka i Yehu la Yeruhali, kangguhuku-nanyaka na ihi paraingu nggubuluna, “Nggamuya yiana yia?” wàna na tau la paraingu.

¹¹“Jiaya i Wunangu Yehu welingu la Naharitu la Nggalilia,” wàna na tau dangu na matundu-nya i Yehu.

¹²Tunaka nu i Yehu tama-nanyaka la Umana i Miri, hi nawàngga hàlaya na tau na ma-danggangu dàngu na madingi lai nu. Na kabe - beliha da menja tau manjepa ndui dàngu da nggala ngia pa-danggangu kulundiha.

¹³Hàla hi napanii-nja nuda da tau “Daa la Huratu Matua ninya na-patulihu ba napanii i Ala, ‘Na umanggu uma ngia pa-hamayangu-ya wàda làti.’ Tàka nyimi mituya hibu tau rambangu!” wànanja.

¹⁴Da tau poki dàngu tau kaliparu damai lai Yehu la Umana i Miri, hi na-pamàlaru-ha.

¹⁵Tàka da ratu kapala dàngu da ngguru anggama dambeni ba daita-ha nuda da pa-hangàtarungu da paruku-na i Yehu. Dàngu dambeni-mbu ba darongu-ha da anakeda ba da-kayaka la Umana i Miri, “Oha-anaka na Anana i Ndautu!” ba wàda.

¹⁶Dapanii-nya i Yehu, “Murongu-duha ni jàka nggàra wàda?” wàdanya. “Wua kurongu-maduha,” hi wàna i Yehu. “Ndedi mi-handàkangu-a dimi pambaha-ya na handalaru yiana la Huratu Matua, ‘Da anakeda dàngu da ana rara ku-ajaru-mahaka la pawunda wotungu ma-lànyapu,’ ba wàna?” hi wànanja.

¹⁷Tunaka nu i Yehu dunjaku-nanjaka, hi naluhu welingu la paraingu nalaku la Mbetani hi natodu lai nu.

¹⁸La mba - mbaru hadangu harii, nàhu la ànda ba nabeli la paraingu, manjuu-nanyaka i Yehu.

¹⁹Naita-ya na hareti na pingi kapilitu la hingi ànda. Hi nalua la pingina, tàka nda nahunggu ana haumbu wuana, ruu jua-ma-aya. Hàla i Yehu hi napanii-nya nuna na pingi ai, “Nyumu napa ndau hili wua-apa” wànanya. Ka hàngu malaï-madua-nanyaka na pingi kapilitu.

²⁰Nu da makiku-nya i Yehu ba daita-yaka na matuna nu, hangàtaru nda ukuha, “Nggikina ni na pingi kapilitu hi pa-ngalangu meti hàla-ma-ananya?” wàda ba da-paàrangu.

²¹“Langatàka,” wàna i Yehu. “Jàka mipawai dàngu ka àmbi ndua ndandi, pekuna nyimi la pawànya hama tuna na pawànggu Nyungga la pingi kapilitu yiana. Dàngu nda didi biaya nuna, jiapa peku-mbuna nyimi jàka mipanii-nya na tandula yiana, ‘Talunggahu-wa kau kawukangu wikimu la tehiku,’ jàka wàminya, napa na pa-deningu-ma duna.

²²Nggàra biaya na pakarai-mi la hamayangu-mi, napa mingala-manya duna mili mipawai,” wànanja.

²³Tunaka nu i Yehu hi nabeli la Umana i Miri, hi natama pa-ajaru lai nu. Ba talànga ajaru-naka nu, mai-danyaka da ratu kapala dàngu da ama bokulu Yahundi lai Nyuna hi da-paàra-nya, “Nggàra latana Nyumu hiu wundaya yiana mbuu ndàbana? Nggamu mawua-nggau hàku tungu nu lai Nyumu?” wàdanya.

²⁴Nahema i Yehu, “Nyunggai duku ka ku-paàra-nja nyuda wànggunggai. Dàngu jàka mihema-duya, napa ka kupeka-nggai jàka nggamu hàkuna Nyungga hi kuwunda-ha yiada mbuu ndàbada.

²⁵I Yuhani ba na-parunungu, nggamu hàku-naka? I Ala jàka ndia hi tau?” wànanja. Tàka da ratu - ratu kapala dàngu da ama boku - ama bokulu Yahundi bata-danyaka dàngu anguda, “ ‘Wàngu hàkuna i Alaya,’ jàka wàndanya Nyuna napa, ‘jàka tu maduna ka ni hi ndai waiya?’ wànandai.

²⁶‘Hàku tauya,’ jàka wànda, ta-mangàdatu-nya na tau dangu, nyuda mbuu ndàbada ba dareki-ya i Yuhani ba wunangu-ya,” wàda.

²⁷Jia-duyaka hi dahema, “Nda mapi-anya,” hi wàda-ma-a. Hàla i Yehu hi napanii-nja, “Jàka tuna nu Nyunggai duku nda kupeka-anggai jàka nggamu hàkuna hi kuwunda-ha nuda mbuu ndàbada,” wàna.

²⁸“Màla nggikina wàna na pa-patanda-mi na ngerana yiana?” hi wàna i Yehu ba na-pangala-nya na paniina. “Ninya na haàtu ama na maningu anangu mini madua. Na tau nuna nalua la anana na ma-maaya, ‘Ana, la lodu nàhu kau lua paràma la woka angguru,’ wànanya.

²⁹Napaya na anakeda, ‘Nda kubihu-a duku,’ wàna. Tàka ba tunaka nu, napa-njilungu na pa-tandangu-na, hi nalua paràma la woka angguru.

³⁰Tunaka nu na ama lua-nanyaka la anana na padua wàda, hi napanii hama tuna kawai, ‘Jiaya ama,’ hi wàna nuna na anakeda. Tàka nda nalua-a.

³¹Màla nu, welingu nuda da anakeda madua nggamuya na ma-patundu-nya na pambuha-na na amana?” wàna. “Na ma-maaya,” wàdaka da ratu kapala dàngu da ama bokulu Yahundi. Ka panii-nanyaka i Yehu lai nyuda, “Langatàka ka kupeka-nggai: da ma-pahurungu hilu katiku dàngu da kawini pahunda napa nyudaka da ma-mangilu patama la angu banjaru-na i Ala welingu lai nyimi, wànanja.[18]

³²Nadu i Yuhani Pa-runungu ba namai, hi na-paita-nggai huri luri na pambuha-na i Miri, ba tuna nyimi ndai waiaya na pa-ajaru-na; tàka da ma-pahurungu hilu katiku dàngu da kawini pahunda dawaiya nyuna. Tàka jiapa kai itayakadu mbuu ndàbana, nyimi ndai ngalangu-ma pa-panjilu-nya na kanandingu-mi dàngu ba nda waiya i Miri,” wànanja.

³³“Ronguya na pangerangu hau yiana,” wàna i Yehu, “Na haàtu na mangu tanangu na-pamula-nya na hau na woka angguru. Natunya oka winggiru-na dàngu naàki lambongu ka pohu ningu angguru, hàlaka nu hi na-pahadangu lewatu uma dai. Hàlaka hi na-pakata-nya la tau mahewa-ya nuna na woka angguru; tunaka nu laku-nanyaka la hau paraingu.

³⁴Ba natoma-ka na rehi pàpu wua angguru, na mangu tanangu na-paràhangu papalewa-na la tau maràma-ya na woka la pakei ndumana.

³⁵Tàka da maràma woka dayàpa-ma-aha nuda da papalewa-na na mangu tanangu: Na haàtu dapalu-ya, hawiangu da-pameti-ha, hilu hawiangui da-nàhaku-nja watu.

³⁶Na mangu tanangu hilu paràhangu-mananyai tau papalewa, rihi danguipa welingu la ma-wungangu. Tàka jia-mayai ba tudanja nu.

³⁷La malamiri na mangu tanangu na-paràha-nya na ana wikina. Na pareki-na, ‘Ba ngaha paana-nggunya datembi-mayaka duna,’ wàna làti.

³⁸Tàka nuda da maràma woka ba daita-yaka na anana na mangu tanangu, panii-danyaka dàngga anguda, ‘Na, jia-yaka yiana, na ma-kahenga-nya. Màlawa ka ta-pameti-ya, ka peku màngindanya na kangeha-na,’ wàdaka.

³⁹Ka yàpa-danyaka na anana, hi da-kawuka-nya la hambeli, hi da-pameti-ya,” wàna.

⁴⁰Hi na-paàrangu i Yehu, “Màla, jàka nabeli-ka duna nuna na mangu woka anggurungu, nggikina wàna-njaka nuda da tau madai woka?” hi wàna.

⁴¹Dahema nyuda, “Ka na-pameti-mahaka duna nuda da tau akatu, hi na-pakata-nya tau hawiangu nuna na woka angguru, na ma-mbuhangu pa-wuangu ihi tana lai nyuna na mangu wokangu jàka jia-yaka na rehina,” wàda.

⁴²Ka panii-nanyaka i Yehu lai nyuda, “Ndedi mi-handàkangu nyimi pambaha-ya na pa-tulihu daa la Huratu Matua? ‘Na watu na panda wàda da tukangu wulu uma, jia bia-yaika na watu tunggulu. Nuna paruku-na i Miriya, ai, kanjupu manandangu-ya!’ ” wàna.

⁴³“Jiaya nu kanandi-nya,” wàna i Yehu, “mbuu ndàbana da ngabami nyimi ba banjaru-na i Alakai napa na-pukalu hàlaha welingu lai nyimi tàka napa hi nawua-nya na banjaru na manunju-ha da pareta-na i Ala. [

⁴⁴Na tau ma-kanabu lai nu la watu napa na-kaweraku; dàngu na tau na pa-pinjalu-na nuna na watu napa na-muburu hi kumburu tanaya]” wàna.

⁴⁵Nu da ratu kapala dàngu da tau Parihi ba darongu-ha da pangerangu pawunda-na i Yehu, dapi-manya ba jiaha nyuda da palana i Yehu.

⁴⁶Jia-duya hi da-patikingu la payàpa-ya. Tàka da-mangàdatu-nya na tau dangu, nadu ba wunangu-ya i Yehu wàdanya tau dangu.