Read Kambera MATIU 25 Bible Online

MATIU 25 - Kambera bible

MATIU 25

¹“Jàka namaika na Ana Tau ba Miriya, na hadana hama tuna yiana na pangerangu: Tau hakambulu-ha da ana karia, da karia-na na bidi papa, da-kawàra piti palita ba dalua pa-tàbuku-ya na bidi papa mini.

²Nu lai nyuda ninja ba tau malima-ha da manduba, dàngu da tau malima hawiangu da-manggàna.

³Da tau malima da manduba dangàndi palita, tàka nda da-payema-nja wai minada.

⁴Da ana karia malima da ma-manggàna dangàndi palita, dangàndi pakaria-manja wai minada.

⁵Na bidi papa mini na endapu na tàkana, jia-duyaka nuda da ana karia hi kiri tàtiku-da, ka lupa mahuru-danyaka.

⁶La mandalora, hinaka hi darongu mawara, ‘Nàmu-nyaka na bidi papa mini! Maiwa kai tàbuku-ya!’ na mawàna.

⁷Nuda da ana karia hakambulu, hadangu-danyaka, hi da-pakehi-nja da palita-da.

⁸Da ana karia manduba karai-danyaka la ma-manggàna, “Wua àrunda minami hawutu, ba mbàda wàdaka da palita-ma nyuma,” wàda.

⁹Dahema da ana karia ma-manggàna, ‘Nda pekuna! Nadu napa nanjàpu-dunda mina. Lua bia pakei la toku,’ wàdanja.

¹⁰Da ana karia manduba lua-danyaka pakei mina. Ba talànga nàhunja, tàka-nanyaka na bidi papa mini. Da ana karia da marimangu tama karia-danyaka na bidi papa mini la ngia pambabu, ka bita-danyaka na pindu!

¹¹Tunaka nu, tàka-danyaka da ana karia ha-banjaru. Hi da-paaungu, ‘Miri, Miri, bunggahu àru-nggama pindu!’ wàda.

¹²Tàka nahema na bidi papa mini, ‘Nda kutanda-akai!’ wànanja.

¹³Ka panjàpu-nanyaka na pangerangu-na i Yehu ba napanii, “Jia-duya hi wànggu-nggai, imàra mangga rimangu, ba ndai pinya na lodu dàngu na njàmu tàkana!’ wàna.

¹⁴“Jàka natàka na Ana Tau ba Miriya na hadana hamana na pangerangu yiana. Na haàtu na tau na-kamomatu palaku la tana mamarau. Napaau-nja da papalewa-na, hi na-kawàra pakata-nja da bandana.

¹⁵La ni-mbihuda nu da papalewa-na nawua-nja tutu ràka pamàka-da. Na haàtu nawua-nya lima rata àmahu rara. Na haàtui nawua-nya dua rata àmahu rara. Tàka na hili haàtui nawua-nya harata àmahu rara. Ka laku-nanyaka.

¹⁶Na tau papalewa na ma-ngalangu lima rata àmahu rara, luma laku-madua-nanyaka pa-danggangu, hi na-ngalangu utuna hilu lima ratamai àmahu rara.

¹⁷Tuna numai duna na haàtu na papalewa na ma-ngalangu dua rata àmahu rara, na-ngalangu utuna hili dua ratamai àmahu rara.

¹⁸Tàka na tau papalewa haàtu na ma-ngalangu harata àmahu rara, lua-nanyaka hi naàki lambongu la tana, hàla hi nawini-nya nuna na àmahu-na na mirina lai nu.

¹⁹Mandai langatàka ba hàla patuna nu, ka beli-nanyaka na mirida nuda da tau papalewa, hi na-padiha dànja nyuda.

²⁰Na tau papalewa na ma-ngalangu lima rata àmahu rara mai-nanyaka, hi nawotu-ha ba hakambulu ratada, ‘Miri, hi wàna’, yia nana mu-pakatangga lima ratada da àmahu rara. Iluha, kuwingu-ha hi kuhili ngalangu lima rata àmahu rara pautu-nggu!’ wàna.

²¹‘Hàmudu!’ hi wàna na mirina. ‘Nyumu papalewa mahàmu dàngu ma-tuturu-kau. Rukuna ba pa-monungu-kau nyumu la ma-hawutu-na, napa ku-pakata-nggaunja da ma-dangu lai nyumu. Tamawa kau mbaha eti dàngga nyungga!’ wànanya.

²²Tàka na papalewa haàtu na ma-ngalangu dua rata àmahu rara hurungu-nanyaka, hi napanii, ‘Miri, da pa-pakata-mungga dua ratada da àmahu rara. Iluha, ba kuhili ngalangu utu dua rata-madai,’ wàna.

²³‘Hàmudu,’ hi wàna na mirina, ‘nyumu tau papalewa mahàmu dàngu ma-tuturu-kau. Rukuna ba pa-monungu-kau nyumu la ma-hawutu-na, napa ka ku-pakata-nggau madangu nyumu. Tamawa kau mbaha eti dàngga nyungga!’ hi wànanya.

²⁴Tunaka nu na tau papalewa na ma-ngalangu harata àmahu rara, hurungu-nanyaka hi napanii, ‘Miri, ku-pimanggau nyumu ba tau mbana etikau. Bau pàpu bia wuana la panda pamula-mu dàngu bau muti bia la panda hàbaru-mu.

²⁵Ba ku-mangàdatu, jia-duyaka hi kulua pawini-nya la tana na àmahu-mu. Yiana-yaka miri na àmahu-mu,’ wàna.

²⁶‘Nyumu bai tau papalewa akatu dàngu mapatai etikau!’ hi wàna na mirina. ‘Ka nda mbàda pimungga ba kupàpu la panda pamula-nggu, dàngu ba kumuti la panda hàbaru-nggu?

²⁷Jia-duyaka ba tuna nu làti, kau pahàmu-ya na àmahu-nggu la mbàngu, ka pekuna ba kubeli-ka, ka kungala belinya na àmahu-nggu dàngu anana.

²⁸Jia ba tuna nu, pitiya nana na àmahu welingu lai nyuna, ka wuanya na tau na maningu hakambulu ratangu àmahu rara.

²⁹Nadu na tau na mambàda ningungu, ba pahilu wua padangu-duyaipa, hi lupa na-parihingu. Tàka na tau na manda ningungu, na ma-hawutu-na na maninya lai nyuna napa papiti-mbuya.

³⁰Tàka na tau papalewa na manda ningu lingungu, kawuka-nya la ma-kapàtangu la hambeli. Lai nu nyuna napa hiinanya dàngu mayila-nanyaka!’ ” wàna.

³¹“Jàka natàka na Ana Tau ba Hanganji-ya ba dandàki-ya paraï mbuu ndàbada da papalewa-na, napa Nyuna na-mandapu la kanjàka pareta-na na ma-bunjuku.

³²Mbuu ndàbada da banjaru napa pa-pauhingu-ha la hanggana. Hàla hi na-kawàri-ha, hi na-kadàmbu pauhinja, hama tuna na ma-pawangu ba nakawàri-ha da mbimbi welingu la kamàmbi.

³³Na tau na ma-patundu-nya na pambuha-na i Ala napa na-pauhi-nja la kawana-na, tàka hawiangu la kalai-nanja.

³⁴Tunaka nu Nyuna na Hanganji hi napanii-nja da tau la kawana, ‘Imaiwa dimi tau pa-kanyuru-na na Amanggu. Tamawa la ngia pa-hanganji na pa-payemangu-kai piti weli mula weli tanangu.

³⁵Nadu ba jiaya na rimbangu-nggu, bai wua-dungga pangangu, ba jiaya na madaunggu, bai wua-dungga pa-unungu. Ba tau weli nàmungu-ka bai pahia-dungga la umami.

³⁶Ba nda ningu pakinggu Nyungga, miwua-ngga paki. Ba kuhidu, nyimi ma-paloku-ka. Ba patama-ngga Nyungga la uma kapàtangu, nyimi mandula-ka,’ wàna.

³⁷Hàla da tau nuda napa dapanii, ‘Miri, pirangu-ka nu ba maita-kau rimbangu-mu tàka hi mawua-nggau pangangu, jàka ndia bau madau hi mawua-nggau pa-unungu?

³⁸Piranguka Miri ba maita-kau hama tuna tau weli nàmungu, tàka hi manggepi-kau la umama? Pirangu-ka Miri ba maita-kau ba nda ningu pakimu, tàka hi mawua-nggau paki?

³⁹Piranguka Miri ba maita-kau bau hidu jàka ndia ba la uma kapàtangu-kau tàka hi mandula-kau?” wàda.

⁴⁰Nahema na Hanganji, ‘Kai pinya: ba jiaya nawunda-mi matungu nu, jiapa ka jiaya na haàtu na angu dedinggu na marihi ngia wawa halawàla, wunda-minya lai Nyungga-maduka nu,’ wànanja.

⁴¹Hàla na Hanganji hi napanii-nja da tau la kalaina, ‘Pa-yilangu-kai weli yiahungu, ha pa-ràtungu! Tamawa la epi panda peku pàda, na pa-payema-nya i Kambàliku dàngu da papalewa-na.

⁴²Nadu ba jiaya na rimbangu-nggu, ba ndai wua-angga pangangu; ba jiaya na madaunggu, ba ndai wua-angga pa-unungu.

⁴³Ba tau weli nàmungu-ka Nyungga, ndai pahia-angga umami. Ba nda ningu pakinggu, ndai wua-angga paki. Ba kuhidu dàngu ba la uma kapàtangu-ka, ndai ingaaka.’

⁴⁴Hàla ka panii-danyaka napa lai Nyuna, ‘Miri, pirangu-ka nu ba maita-kau bau rimbangu, jàka ndia bau madau, jàka ndia ba tau weli nàmungu-kau, jàka ndia ba nda ningu pakimu, jàka ndia bau hidu, jàka ndia ba la uma kapàtangu-kau, tàka hi nda mandula-kau?’ wàda.

⁴⁵Nahema na Hanganji, ‘Kai pinya: ba jiaya na nda bihumi pandula-ya na haàtu na marihi ngia wawa halawàla yiana, nda bihu-minya pandula-ka Nyungga-maduka nu,’ wànanja.

⁴⁶Da tau nuda napa pahuku-nguha, wàngu hukungu pa-lupangu, tàka da tau da mawànya na pawuku-na i Ala napa hanggau-danyaka na luri pa-langatàkangu dàngu pa-lupangu,” wàna.