Read Kambera MATIU 26 Bible Online

MATIU 26 - Kambera bible

MATIU 26

¹Ba nahàla-ka i Yehu pa-ajaru hàlaha nudaka hi napanii-nja da makiku-nya.

²“Mipinya dàmbu lodu-kiaka jiaya na Lodu Remi Paha, na Ana Tau napa pa-pakatangu-ya la pa-harika-nya!” wàna.

³La rehi nuna pauhi-danya da ratu kapala dàngu da ama bokulu Yahundi la umana na Ratu Bokulu Kayapàhu.

⁴Batangu-danya payàpa kangunduhu-nya i Yehu, ka pameti-ya, wàda.

⁵“Tàka, àmbu talaku-dunya na ngerana nuna la rehi mbabu, napa napariu-raüngu-du na madangu,” wàda.

⁶Ba jiaya na ninya i Yehu la Mbetani, la umana i Himungu na mahidu manula pa-mayitangu amangu,

⁷tàka-nanyaka na haàtu na kawini lai Yehu. Nangàndi hauna na boti na maningu ihingu mbii kati mambana wilina. Ba talànga mandapu-naka pangangu i Yehu, nuna na kawini naburi-nya mina mbii kati na katiku-na i Yehu.

⁸Da makiku-nya i Yehu ba daita-ya na matuna nu dambeni. “Nggàra linguna ba padima-nya na mambana wili tuna nu?” wàda.

⁹“Na mina mbii kati tungu nu ka dangganya nahei wilina, dàngu da àmahu wilina ka wuanja da tau mila,” wàda.

¹⁰I Yehu napinya na pa-pangàda-da, jia hi napanii, “Nggikina nyimi hi mi-pahanduka-ya nina na kawini? Nyuna tunanya na mahàmu dàngu na pa-wotungu ndumanggu Nyungga.

¹¹Na mamila ni mànu-manya duna lai nyimi, tàka Nyungga nda ni mànu-angga lai nyimi.

¹²Ba tuna nu ba naburi-nya mina mbii kati na ihinggu, payema-nangga napa ba taningga.

¹³Langatàka ka kupeka-nggai! La nggubulu pinu tana, la nggi bia na ngia pa-bobaru niya na Lii Mànangu welingu lai Ala, na rukuna na kawini yiana papanii mànuya ka pangàda wànya nyuna,” wàna.

¹⁴Hàla na haàtu welingu la tau hakambulu madua makiku-nya i Yehu, na ma-tamungu Yundahu Ihikariu, lua-nanyaka la ratu - ratu kapala.

¹⁵Napanii lai nyuda, “Nggàraka pawua-mingga jàka ku-pakata-nggainya i Yehu lai nyimi?” wàna. Ka diha-danyaka tailu kambulu àmahu bara, hi dawua-nya nyuna.

¹⁶Piti welingu la rehi nu himbu-nanyaka pekuna i Yundahu la pa-kaleka-nya i Yehu.

¹⁷La lodu kawunga la Mbabu Roti Nda Patai Wolungu, da ma-kikungu lai Yehu damai lai Nyuna. Da-paàrangu, “Màla umbu nggi paloku niya wàmu na pangangu Paha ndumamu Nyumu?” wàdanya.

¹⁸Nahema i Yehu, “Luawa la haàtu tau la paraingu kai paniinya, ‘I Umbu Ngguru, toma-nanyaka na rehinggu wàna; ku-mbuhangu pambabu-nya na Paha dàngu da makiku-ngga la umamu nyumu, wànanggau i Umbu Ngguru,’ wàminya,” wànanja.

¹⁹Da ma-kikungu lai Yehu danunju-maya na pa-paràha wànanja paraïna i Yehu lai nyuda. Hi dalua pa-paloku-ya na pangangu Paha.

²⁰Ba na-rudungu-ka, i Yehu dàngu da hakambulu madua makiku-nya mandapu ngangu-danyaka.

²¹Ba talànga ngangu-daka, panii-nanyaka i Yehu, “Pa-tingingu: Na haàtu welingu la hongami nyimi napa na-kaleka-ngga,” wàna.

²²Ba darongu-yaka nuna, da makiku-nya i Yehu hawina halawàla-danyaka. Hàla, maràngga paàra-danyaka i Yehu, “Nyuna, ndiadu wàmungga?” maràngga wàdanya.

²³Nahema i Yehu, “Na tau na ma-pahàbu dàngga roti la kaba moku, nyuna na ma-kaleka-ngga napa,” hi wàna.

²⁴“Jiangu-maka duna ba nameti na Ana Tau hama tuna na maninya la Huratu Matua. Tàka ura pàku-ana-nyaka na tau na ma-kaleka-nya na Ana Tau! Làti nahàmu-kiapa na tau nuna ka àmbu nadedi ndoku!” wàna.

²⁵Hàla i Yundahu na ma-kaleka napanii, “Ndiadu nyungga nu palàmu Umbu Ngguru?” wàna. Nahema i Yehu, “Hama tuna ba wàmu!” hi wànanya.

²⁶Ba jia-yaka na nganguda, i Yehu napiti-ya na roti, hàla hi na-hamayangu ba na-pamalangungu. Tunaka nu hi nakawita - witaya na roti wàngu limana hi nawua-nja da ma-kikungu, hi napanii-nja, “Pitiwa, nganguwa, yiana jiaya na taunggu,” wàna.

²⁷Hàlaka nu hi napiti hau kaba wai angguru, hi na-pamalangu-nya i Ala. Tunaka nu hi nawua-nja nu na kaba wai la ma-kikunya hi napanii, “Unungu hàlawa nyimi!

²⁸Nadu yiana jiaya na wai ria-nggu na ma-kawuku-ya na pa-ràndingu-na i Ala — na wai ria pabungu ndumana na tau dangu nduma pa-jàmangu wàngu njalada.

²⁹Langatàka ka kupeka-nggai: Nyungga napa nda kuhili unu-anyapa na wai angguru yiana lupa tomaya na rehi ba kuunu dànggai nyimi la Pinu Tana Bidina na Amanggu,” wàna.

³⁰Tunaka nu wunda-danyaka hau ludu wotungu. Hàlaka patuna nu laku-danyaka la Tandula Haitungu.

³¹Hàla i Yehu hi napanii-nja da makiku-nya, “La rudungu nàhu-maka nyimi mbuu ndàbami bai palai wàrungga Nyungga; nadu daa la Huratu Matua ni-manyaka na pa-tulihu: Napanii i Ala, ‘Nyungga napa ku-pameti-ya na ma-pawangu, tàka da kabàba mbimbina hi dapai - ihangu,’ wàna.

³²Na nyuna jàka pahada beli-nggaka, napa kulaku mangilu-nggai la Nggalilia,” wàna.

³³Ka panii-nanyaka i Peturu lai Yehu, “Jiapa mbuu ndàbada yiada hawiangu ka dalaku wàrunggau Nyumu, nyungga ndiama duku!” wàna.

³⁴Napaya i Yehu, “Namuya,” wànanya, “La rudungu nàhuma, ba ndedi da-hakuku da manu mbàda pa-ndailungu-muka pa-pahini-ngga,” wànanya.

³⁵Nahema i Peturu, “Jiapa ka kumeti karia-nggau kadu, nyungga nda ku-pahini-anggau la patanda-kau!” wàna. Tàka mbuu ndàbada da ma-kikungu hawiangu, jia-mayai duda ba dapanii tuda nu.

³⁶Hàlaka nu laku-nanyaka i Yehu dàngu da makiku-nya la hau pangia la Nggehimani ba wàdanya. Lai nu hi napanii-nja nyuda, “Mandapu kàdi yiahu nyimi, Nyungga luanggu pa-hamayangu,” wànanja.

³⁷Hàla hi nawànda-ya i Peturu dàngu da madua da anana i Hambandiu palaku karia-nya Nyuna. Ka pa-kiringu-nanyaka pa-hawina dàngu panda ngudu na etina.

³⁸Hi napanii-nja da makiku-nya, “Lalu handuka-ya na etinggu, kutika pameti-ka-amangu. Ndàdiku-wa nyimi lai yiahu, dàngu màta kai màra pawàla dàngga,” wànanja.

³⁹Tunaku nu laku marau-nanyaka i Yehu hawutu, hi na-maràbaku la tana ba na-hamayangu, “Dou Ama,” wàna, “jàka pekuna pamarau àruya yiana na ma-handuka na pa-hambeta-nggu. Na nyuna àmbu jiaya na pambuha-nggu Nyungga, tàka na pambuhamu Nyumuka dumu Ama,” wàna.

⁴⁰Hàlaka nu beli-nanyaka i Yehu la ma-kikungu da madua haàtu-da, tàka ba natà-kanja katuda-da padua. Hi napanii-nya i Peturu, “Ana hau njàmua nyimi tau madua haàtu nda peku pawàla dà-mbumingga?

⁴¹Imàra pawàla-wa dàngu kai hamayangu ka àmbii hunggu ma-pakamangu. Làti na ngahumi ka kuliya na ma-deningu wàna-maka duna, tàka nyimi ndai màkangu wikimi, nadu na hada tau ba na-malijangu,” wànanja.

⁴²Hili lua-nanyai handàkangu i Yehu pa-hamayangu, “Dou Ama, na mayila yiana jàka lupa ku-hambeta-maya bàdi, ba nda peku payila-nya, màlawa na pambuha-mu Nyumu bia na ma-padeningu,” wàna.

⁴³Hàlaka nu i Yehu hi nabeli tomaha da makiku-nya, tàka ba natoma-nja katuda-mada-nyapa, nadu ba lalu tàtiku-da.

⁴⁴Handàkangu-ki hili dunjaku-mananjai nyuda paraïna i Yehu tàka la padailungu wàna ba na-hamayangu, hi napeka hama tuna na pawunda-na kawai.

⁴⁵Hàlaka nu hili beli-nanyaka la makiku-nya hi napanii-nja, “Katuda-mami-nyapa nu bai hangahu? Tàngaru, jia-yaka na rehina na Ana Tau ba pakata-nya la limada da tau njala.

⁴⁶Hadanguwa ka talaku. Tàngaru! Na tau na ma-kaleka-ngga nàmu-nyaka!” wànanja.

⁴⁷Ba talànga panii-i-napa nu i Yehu, nàmu-nyaka i Yundahu, na haàtu welingu la tau hakambulu madua ma-kikunya. Da mamai karia-nya nyuna, nadangu-mbu na tau mangàndi hapanda dàngu kadipu ai. Nyuda pa-paràha-da da ratu kapala dàngu da ama bokulu Yahundi-ha.

⁴⁸Na ma-kaleka mbàda panii hàla-mana-njaka na tanda yiana, “Na tau na pa-puduku-nggu, jia-mayaka Nyuna. Yàpaya Nyuna!” wànanja.

⁴⁹Ba natàka-ka lai nu i Yundahu, pangalangu lua toma-madua-nanyaka i Yehu hi napanii, “Peku hàmuwa, Umbu Ngguru!” wàna. Ka puduku-nanyaka i Yehu.

⁵⁰Nahema i Yehu, “Ha ànda, nggàra maimu lai yiahu?”[24] hi wàna. Tunaka nu ndàharungu-nanyaka na tau, tàka hi dayàpa-ya i Yehu.

⁵¹Na haàtu na ma-kikunya na maninya lai nu dàngu i Yehu, na-butuhu-ya na hapanda-na hi na-làndahu-nya na haàtu na atana na ratu bokulu, nahàpu na kahilu-na.

⁵²I Yehu napanii-nya na ma-kikungu, “Patiku belinya na hapanda-mu la tikuna, nadu mbuu ndàbana na tau na mawàngu hapanda-na napa na-pameti-ya hapanda.

⁵³Bau rekiya nda kumàka pakarai pa-ndulangu la Amanggu, ka na-paràha parenggangu hakambulu dua pa-jurungu rihi tanatara papalewa?

⁵⁴Tàka jàka tuna nu, nggiki hama pa-tutungu-naka na pambàda nyura daa la Huratu Matua, ba jiangu-maka bàdi duna ba na-deningu hama tuna nàhu ni?” wàna.

⁵⁵Hàla i Yehu hi napanii-nya na tau dangu, “Nggikina, Nyungga yia ka tau akatu-ka, hi mihada ngàndingga hapanda dàngu kadipu ai la payàpa-ka Nyungga? Hau lodu - hau lodu ningga ba ku-papekangu la Umana i Ala, tàka nyimi ndai yàpaka.

⁵⁶Na nyuna tuna numaka bàdi duna na madedi hama tuna na pa-tulihu-da da wunangu la Huratu Matua,” wàna. Hàlaka nu, mbuu ndàbada da makiku-nya palai dunjaku-danyaka i Yehu.

⁵⁷Da tau da mayàpa-ya i Yehu dangàndi-ya la umana na Ratu Bokulu Kayapàhu. Lai nu pauhi-mada-nyaka da ngguru anggama dàngu da ama bokulu Yahundi.

⁵⁸I Peturu kiku-mananya i Yehu welingu la mamarau lundu la talora umana na ratu bokulu. Hàla hi natama daa la talora, hi na-mandapu dànja da tau manggangu. Na-rinjungu papinya jàka nggiki-naka napa na hupu njàpuna mbuu ndàbana.

⁵⁹Da ratu kapala dàngu mbuu ndàbana na Bata Bokulu Anggama dahada ngàndingu pahimbu hakahii kabàli ka peku puhanya hukungu meti i Yehu ba wàda.

⁶⁰Tàka nda dahunggu ndokumbu hau lata, jiapa ka dadangu da ma-hurungu la pa-hakahii kambàliku. La malamiri ninja ba tau maduaha da ma-ndàharungu la hangga.

⁶¹Dapanii, “Na tau yiana napanii, ‘Nyungga kumàka pa-nyànggaru-ya na Uma Ala, tàka la dalu tailu mbua lodu kumàka pa-pahada belinya,’ wàna,” wàda.

⁶²Hàla na ratu bokulu na-hadangu hi napanii lai Yehu, “Màla ka ndau hema-aha nu na pakàla wàdanggau Nyumu?” wàna-nya.

⁶³Tàka i Yehu pàdi wànama-a. Hili handàkangu panii-nanyai na ratu bokulu, “Parongu-na i Ala na maluri,” wàna, “peka-nggama jia-kauka nu Nyumu Hanganji Ma-pamànangu?” wàna.

⁶⁴Nahema i Yehu, “Jia-maduya hama tuna ba wàmu. Tàka langatàka ka kupaka-nggai: Pa-kiringu welingu nàhu, napa nyimi ita-minyaka na Ana Tau ba na-mandapu la kawana-na[25] i Ala Mahupu mbiha, dàngu namai la pinu karumangu la awangu!” wàna.

⁶⁵Ka bàriku-madua-nanjaka da pakina[26] na ratu bokulu, “Lapi-nanyaka i Ala! Nggàra ihi wànguipa hakahii! Nyimi rongu wikimami-nyaka mbuu ndàbami ba napanii lapiya i Ala.

⁶⁶Nàhu nggikina wànaka na pa-kanandi-mi nyimi?” wàna. Dahema nyuda, “Njala-nanya, nameti-ma bàdi,” wàda.

⁶⁷Hàla hi da-pangànji-ya na matana i Yehu, dàngu hi dapalu-ya. Ningumbu matàba-ya,

⁶⁸da mapanii, “Kamangu pa-manyura kau panii-nggama, ha Hanganji Pa-mànangu!” Nggamu na matàba-kau?” wàdanya.

⁶⁹I Peturu mandapu-na padua lua la hambeli, la talora. Na haàtu na papalewa kawini namai hi napanii-nya i Peturu, “Ka nda jia-mbukau dumu nyumu anguna i Yehu tau Nggalilia?” wànanya.

⁷⁰Tàka i Peturu na-pahiningu la hanggada nyuda mbuu ndàbada, “Nda kupi-anya jàka nggàra wàmu,” wàna i Peturu ba nahema,

⁷¹hàla hi nalaku la pindu talora. Na haàtu na papalewa kawini haàtu naita-ya i Peturu, hi napanii-nja da tau da maninja lai nu, “Na tau yiana karia-mada dàngu i Yehu welingu la Naharitu,” wàna.

⁷²Hàla hili pa-hiningu-nanyai i Peturu ba na-harangu. “Langatàka nda kutanda-aya duku na tau nuna,” wàna.

⁷³Ndedi nggi mandai, da tau da ma-ndolaku lai nu mai-danyaka lai Peturu, “Langatàka, nyumu-maka na haàtu welingu la anguda nyuda. Tatanda welinya na hilumu,” wàdanya.

⁷⁴Hàla pa-kiringu-nanyaka pahara pati - tiri, “Nda kutanda-aya duku na tau nuna!” wàna. Na mbàdiku-na nuna hakuku-danyaka da manu.

⁷⁵Ka namu-nanyaka i Peturu ba mbàda panii-mana-nyaka paraïna i Yehu, “Ba ndedi da-hakuku da manu mbàda pa-dailungu-muka nyumu pa-pahini-ngga,” ba wànanya. Hàla luhu-nanyaka i Peturu, ba dàngu ngi - ngibana pahii.