Read Kambera MATIU 27 Bible Online

MATIU 27 - Kambera bible

MATIU 27

¹La mba - mbaru mbuu ndàbada da ratu kapala dàngu da ama bokulu Yahundi mbàda bota-mada-nyaka la pa-pameti-ya i Yehu.

²Datunya nggili bàhi, hi dakaria-nya, ba da-pakata-nya lai Pilatu, na nggumbunuru ma-pareta Roma.

³I Yundahu na ma-kaleka, ba naita-yaka i Yehu ba mbàda rata-danyaka hukungu, peka-nanyaka halaera. Hi na-pabeli-nja da tailu kambulu àmahu bara la ngara ratu Kapala dàngu ama bokulu Yahundi.

⁴Napanii, “Njala-manggu-nyaka ba kaleka-nya na tau nda ningu njalangu, hi lupa huku pameti-ya!” wànaka. Tàka dahema nyuda, “Nda ma-wàrihu-ayapa duma. Ehinggau dumu!” wàdanya.

⁵I Yundahu na-kawuka-nja nuda da àmahu hu daa la Umana i Miri, hàla laku hi na-kandila wikina.

⁶Da ratu kapala putu-danjaka nuda da àmahu hi dapanii, “Da àmahu yiada àmahu riaha. Tundunya na uku anggama, da àmahu tungu nu nda uku pa-patama-nja la pàti pangia tanda maraku la Umana i Miri,” wàda.

⁷Hàlaka nu ba da-pahamangu-ka, paki-dahaka nuda da àmahu pakei wàngu tana na Tana Mapipi Wurungu ba wàdanya ka tuya reti tau weli nàmungu.

⁸Nuna-duyaka na pakiri-na Tana Ria hi wàdanya lundu nàhu nuna na tana.

⁹Ba tuna nu, pa-tutungu-nanyaka na paniina na Wunangu Yerimia, “Nyuda dakei tailu kambulu àmahu bara, nu na wili na pa-pahama-na na banjaru Ihirailu na bila wilina Nyuna.

¹⁰Tàka da àmahu nuda dakei wànya Tana Mapipi Wurungu, hama tuna na pareta na pawua-nangga nyungga i Miri,” wàna.

¹¹Ba na-hurungu-ka i Yehu lai Pilatu, na nggumbunuru la tana lai nu, paàra-nanyaka, “Màla hanganji tau Yahundi-kau dumu?” wànanya. “Hama tuna ba wàmu,” hi wàna i Yehu.

¹²Tàka da ratu kapala dàngu da ama bokulu Yahundi ba da-jakaru-njaka da pakàla wàda-nya i Yehu ba hau danguda, nda nawàngu pahema ndokuha.

¹³Jia-duyaka i Pilatu hi napeka-nya, “Màla ka ndau rongu-aha nu mbuu ndàbada da pakàla wàdanggau?” wànanya.

¹⁴Tàka i Yehu nda nawàngu pahema-ma hakudu, hi lupa na-hangàtaru na nggumbunuru.

¹⁵La handàka - handàka Pamangu Paha, na nggumbunuru nakàli pahàla haàtu tau pa-tahangu tundunya na papindi-na na tau dangu.

¹⁶La rehi nu ninya na haàtu na tau pa-hukungu na mawuwa la pa-akatu. Na tamuna: Yehu Mbaramba-ya.

¹⁷Jia-duyaka, ba na-pauhi ndàbaka na tau dangu, i Pilatu hi na-paàra-nja, “Nggamuya wàmi na pambuha-mi ka ku-pahàla-nggainya? I Yehu Mbaramba jàka ndia i Yehu na Karitu ba wàdanya?” wàna.

¹⁸Hi napanii tuna nu i Pilatu ba napi-dunya da tau Yahundi da ma-pangaru hi da-pakata-nya i Yehu lai nyuna kiringu ba karaü-danya eti.

¹⁹Ba talànga mandapu-naka i Pilatu la kanjàka timbangu-na, pangàndi-nanyaka kareuku paraïna papaha-na, “Àmbu tikadu patama-nya na palakara-na nana na tau, ba tau nda njalaya, nadu ba rukuna Nyuna kamodu ku-manggadipangu ma-pa-mangginggitungu,” wàna.

²⁰Tàka da ratu kapala dàngu da ama bokulu Yahundi, nutakungu-madanya paru-ndaya na tau dangu la pakarai-ya i Pilatu ka na-pahàla-ya i Mbaramba tàka i Yehu ka nahuku pameti-ya, wàda.

²¹Hàla na nggumbunuru nahili paàra-nja nyuda, “Welingu nuda da tau madua, nggamuya wàmi ka ku-pahàla-nggainya?” wàna. “I Mbaramba,” hi wàda ba dahema.

²²“Jàka tuna nu nggikina wànggu-nyaka i Yehu na Karitu ba wàdanya?” hi wàna i Pilatu ba na-paàra-nja. Dahema, “Harika-nya!” hi wàda.

²³“Ka nggàra-maka duna pa-akatu-na?” hi wàna i Pilatu. Ka manaü wara pa-kodungu-madua-danyaka, “Harika-nya!” wàda-madua-ka.

²⁴La malamiri pi-nanyaka i Pilatu ba nda hili nggikina wàna-apa, dàngu peku-mbuna napa na tau dangu la pa-patula ngganggangu. Jia hi napiti wai, hi nabaha limana la hangga tau dangu hi napanii, “Nyungga nda kutanggu hema-ayapa na rukuna na metina na tau yiana! Nuna patanggu-mi nyimi-mayaka dimi!” wàna.

²⁵Mbuu ndàbana na tau dangu, handàka pa-rànjangu-madua-naka pahema, “Màla nyuna, nyuma duma dàngu da anama matanggu-nya na hukungu kiri pameti wàna!” wàda.

²⁶Hàla i Pilatu hi na-pahàla-nja i Mbaramba, dàngu hi na-paràhangu pa-paràmbahu-nya i Yehu; hi na-pakata-nja la pa-harika-nya.

²⁷Tunaka nu da panjuri-na i Pilatu dangàndi-ya i Yehu patama la umana na nggumbunuru, dàngu mbuu ndàbada da pamba panjuri pauhi-madanya ba da-winggiru-nya i Yehu.

²⁸Daàli-nja da pakina i Yehu, hi da-panggàna-nya kalembi bokulu mbaü atu.

²⁹Da-pandoi-nya tubuku karàngga rii madàka, hi da pa-tàmbaku-nya la katiku-na i Yehu. Tunaka nu hi da-pakata-nya tokungu la lima kawana-na, hi da-patika la hanggana ba da-payudi-ya, “Oha-amuka Hanganji Yahundi!” wàdanya.

³⁰Da-pangànji-ya dàngu hi dawàhi-ya na tokungu-na hi dapalu wànya na katiku-na.

³¹Ba dahàlaka pa-pajulu wànya, da-bunggahu-ya na kalembi bokulu mbaü atuna hàla hi da-panggàna belinja da paki wikina. Tunaka nu hi dangàndi-ya la hambeli la pa-harika-nya.

³²La padua ànda tàbuku-danyaka na haàtu na tau welingu la Kireni, na ma-tamungu Himungu. Da-pambana-ya na tau nuna paduku-ya na harika-na i Yehu.

³³Tunaka nu tàka-danyaka la hau pa-ngiangu na ma-tamungu, Nggolunggota, Pangia Kaba Kota wàna-duka nu.

³⁴Lai nu wua-danyaka i Yehu pa-unungu angguru pa-pakorungu mapaita. Tàka i Yehu ba na-tupuku-yaka na angguru nuna, nda nabihu-a paunu-nya.

³⁵Tunaka nu ka harika-danyaka, hi dapabe - berinja da pakina ba dawàngu undi.

³⁶Hàlaka nu mandapu-danyaka ba dadaiya Nyuna lai nu.

³⁷Dita la tuba pinu katiku-na datuya na pa-tulihu na pa-panjala wàdanya, “Yiana i Yehu, Hanganji Tau Yahundi,” wàna.

³⁸Nimbunja da pa-harika angunya ba tau madua-ha da makàli rambangu, haàtu la kawana hi haàtu la kalaina.

³⁹Da tauka da malaku li lai nu dapi - pimbilungu katiku-da[27] ba da-paaka-nya i Yehu.

⁴⁰Dapanii, “Nyumu ku-nyànggaru-ya na Uma Ala, hi ku-pahada belinya la tailu mbua lodu ba wàmu. Màlapa jàka Ana Ala-dukau, puruwa nu welingu la harikangu, kau pamara wikimu,” wàdanya.

⁴¹Màlamai duda da ratu kapala, da ngguru anggama dàngu da ama bokulu Yahundi ba da-payudi-ya i Yehu. Ba dapanii,

⁴²“Nyuna na-pamara-ya na tau hawiangu, tàka na wikina Nyuna nda namàka pa-pamara-ya! Nyuna jàka hanganji Ihirailu-duya, napuru-wa nu welingu la ai harikangu, hina nyuna hi mawaiya.

⁴³Nyuna nawaiya i Ala, dàngu Ana Alaka ba wàna. Màlapa nu, ka taita-aya jàka na-pamara-duya paraïna i Ala nàhu?” wàda.

⁴⁴Da tau rambangu da pa-harika angunya, màla-madui duda ba da-paaka tudanya nu.

⁴⁵La tidu lodu, tailu mbua njàmuna, ba na-kapàtangu nggubulu-na na tana lai nu.

⁴⁶La njàmu tailu, wara pa-kodungu-nanyaka i Yehu, “Eli, Eli lama sabakhtani?” wàna. La hilunda nyuta, “Dou Alanggu, dou Alanggu, nggikina Nyumu hiu dunjaku bia-ngga?” wàna.

⁴⁷Da tau ba mapira-ha lai nu darongu-ya na kamaliku-na hi dapanii, “Paau-nanya i Elia,” wàda.

⁴⁸Na haàtu na anguda, napiti pa-renggangu lumutu, hi nahàbu-ya na lumutu la wai angguru mayilu. Tunaka nu hi natuya la hupu ai hapungu, hi na-pajola-nya la tàda ngaruna i Yehu.

⁴⁹Tàka na tau hawiangu dapanii, “Patiangu, napa hi nàmu bianya i Elia la pa-pamara-ya nyuna!” wàda.

⁵⁰Tunaka nu i Yehu hili wara pakodungu-nanyaka, hi na-pahàla-nya na kayekuna.

⁵¹Na tera dimbaku daa la Umana i Miri kahira padua-nanyaka weli ditangu lupa hu wawa. Na tana na-kanggauhaku dàngu da palindi watu da-tawanggahu.

⁵²Da reti da-tabunggahu, dàngu nadangu la angu banjaru-na i Ala da mambàda meti da pa-paluri beli.

⁵³Nyuda daluhu welingu la reti la hambeli hadangu-na i Yehu welingu la meti, hi datama la Yeruhali. Lai nu dangu tau maita-ha nyuda.

⁵⁴Na kapala pamba hamanai da panjuri anguna padaiya i Yehu mangàdatu nda ukuha ba daita-ya na upungu, dàngu mbuu ndàba-naka na matumbu nu. Ka panii-danyaka, “Langatàka, Nyuna yiana Ana Alaya,” wàda.

⁵⁵Lai nu dadangu-mbu da kawini da maninja ba dàngu tàngaru marau-danya. Nyuda-maka da makiku-nya i Yehu da mandula-ya piti welingu la Nggalilia.

⁵⁶La anguda nyuda jia-duhaka i Maria Mandalena, i Maria inana i Yakombu dàngu i Yuhupu, dàngu na inada da anana i Hambandiu.

⁵⁷Nu la rudungu mai-nanyaka na haàtu na tau wulu welingu la Arimatia, na ma-tamungu Yuhupu. Nyuna ma-kikungu lai Yehu-mbuya.

⁵⁸Nyuna nalua lai Pilatu, hi nakarai-ya na metina i Yehu. Tàka i Pilatu hi na-wuangu pareta ka wuanya nyuna na metina i Yehu.

⁵⁹Ka piti-nanyaka i Yuhupu na mameti, hi na-payubuhu-nya yubuhu tera linangu bidi.

⁶⁰Hàla hi na-bàjalu-ya na metina i Yehu daa la reti mangu wikina, na pa-pandoi daa la hau tandula watu. Hàlaka nu hi nakilu-nya hau na watu bokulu hi na-pandàbi-nya na ngaru reti, ka laku-nanyaka.

⁶¹I Maria Mandalena dàngu i Maria haàtu da-ndàdiku-pa lai nu ba da-mandapu hangga-nya na reti.

⁶²Hadangu harii, la lodu Hangahu, da ratu kapala dàngu da tau Parihi lua kariangu-danyaka pa-hurungu lai Pilatu,

⁶³hi dapanii, “Umbu, manamu-ya nàhu na ma-palapingu ba naluri-pa napanii, ‘Pa-làngangu tailu mbua lodu napa ku-hadangu beli,’ ba wàna.

⁶⁴Jia ba tuna, paràhangu àru madai pahàmu-nya nuna na reti lundu lodu patailu wàna, ka àmbu napeku da makiku-nya la pa-manganga-ya na metina, hàla napa panii-danyaka la tau, nahada belingu-ka welingu la meti, napa wàdadu. Na pa-lapingu yiana na ma-malamiri manaü nda hàmu-napa welingu la wungana,” wàda.

⁶⁵Napaya i Pilatu, “Ka ba ningu-madu tanatara manggangu-mi, luawa nu kai dai pa-jàritu-manya nuna na reti,” wànanja.

⁶⁶Ka lua-danyaka la reti, hi da-henggilu-ya na watu ndàbina dàngu hi da-bànjalu tau madaiya la hanggana, ka àmbu ningu ma-kumilu-ya ba wàda.