Read Kambera MATIU 3 Bible Online

MATIU 3 - Kambera bible

MATIU 3

¹La rehi nu tàka-nanyaka i Yuhani Pa-runungu, la maràda telangu la Yundia hi na-pakiringu pa-pabobarungu,

²“Kapata beliya na lurimi, nadu i Ala ba lu nàmunya-ka pa-pareta ba Hanganji-ya!” wàna.

³Yiana i Yuhani jia-yaka na palana i Wunangu Yahaya la paniina, “Ninya na tau mawa - wara la maràda wara, ‘Rima-nyawa àndana i Miri; pa-linjaku-nya ngia palina Nyuna!’ ” ba wàna.

⁴I Yuhani napaki wulu ota. Na boruna manulangu, tàka pangana kabala dàngu manggaluangu omangu.

⁵Dangu tau welingu la Yeruhali, dàngu welingu la nggubulu tana Yundia dàngu welingu la ngaba winggiru Luku Yorundangu damai lai Yuhani.

⁶Dapeka-ha da njalada, tàka i Yuhani hi na-parunu-nja la Luku Yorundangu.

⁷Dangumbu tau Parihi dàngu Handuki mamai lai Yuhani ka parunu-nja. Tàka ba naita-haka ba damai, panii dàna-njaka, “Nyimi tau akatu-kai! Nggamu mapeka-nggai nyimi ba peku marami welingu la hukungu-na i Ala na manàmu-nya?

⁸Pa-itangu bàdi wàngu pawunda-mi nyimi ba dunjaku-minjaka da njalami.

⁹Àmbi kaka-duya nyimi ba peku luhumi welingu la hukungu bai panii nyuma boku la mangilu-manya i Ambarahàmu ba wàmi. Kanandi-nya, jiapa ka yiada-kadu da watu, i Ala peku-mbuna ba natuha umbuku-na i Ambarahàmu!

¹⁰Na kataka ninya-padua-ka la papunggu-ya na pingina na ai lundu la amu - amuna. Da pingi ai - pingi ai da manda tu wuada napa papunggu-ha hi ndauha-ha la epi.

¹¹Nyungga ku-parunu wànggai wai tandana nyimi ba dunjaku-minjaka da njalami; tàka napa na manàmu-nya ba taliu-nggu nyungga, nyuna duna na ma-parunu wànggai Ngahuna i Ala dàngu epi. Nyuna nabokulu-mapa duna welingu lai nyungga. La payiutu-nya halapa-ana nyungga yia nda ràka-mbuna.

¹²La limana ninya na tàpi hi natàpi hàlaya na uhu nggàndumu hi lundu na-yarahu. Na uhu nggàndumu na-pauhi-nya hi natuya la dàndaku, tàka na kalàmba-na mbuu ndàbana natunu-ya la epi panda peku pàda.”

¹³La rehi nu i Yehu lua-nanyaka la Luku Yorundangu welingu la Nggalilia. Lai nu mai-nanyaka lai Yuhani hi nakarai pa-runungu.

¹⁴Na-kamangu làti i Yuhani patipa-ya na pakarai-na. Napanii i Yuhani, “Nyungga bàdi ràka pa-parunu-mu. Tàka ni nyumui mamai lai nyungga,” wànanya.

¹⁵Tàka napaya i Yehu, “Màla bia duna la rehi nàhu. Ba tunda nu padeni ndàba-ndanya na pambuha-na i Ala,” wàna. Jia i Yuhani hi na-parunu-nya i Yehu.

¹⁶Hàla parunu, i Yehu hi nadita pa-renggangu welingu la wai luku nuna. Hi jia tabunggahu biana na awangu, tàka i Yehu hi naita-ya na Ngahuna i Ala ba napuru hama tuna kulundiha-ya la tiduna.

¹⁷Tunaka nu rongu-nanyaka na liina i Ala, “Yiana jia-yaka na Ana pambuha-nggu. Nyuna na mali hàmuya na etinggu,” na mawàna.