Read Kambera MATIU 6 Bible Online

MATIU 6 - Kambera bible

MATIU 6

¹“Manggangu, ka àmbi palaku-ya na wai ngerami la anggama la hangga tau ka naita-kama ba wàmi. Jàka timika nu, nda ningu-apa wundami pawua-na na Amami la awangu.

²Jia, jàka iwuangu hunggu la tau mila, àmbi bobaru-duya na rukuna nuna hama tuna na pakàli wàda da ma-kapelu. Nyuda dalaku-nya nuna la uma bungguru jàka ndia la mata ànda, ka nawotu-nggama tau ba wàda. Namuya, nyuda mbàda ngalangu-daka nu wundada.

³Tàka nyimi, jàkai wuangu hunggu, wua kangunduhungu bia hi nda ningu mapinya.

⁴Màtawa nu na pawunda-mi ka àmbu jia ningudu mapinya, hinggilu-na na Amami la awangu. Nyuna nu napi-manya duna na pawunda-mi na ma-kawiningu, tàka hi nawua-nggainya napa na wundami.”

⁵“Nyimi hamayangu jàka wàmi, àmbu hama tuduna da tau kapelu. Nyuda da-mbuhangu pa-hamayangu la uma bungguru dàngu la kanjanga ànda, ka naita-kama tau ba wàda. Namuya, nuna jia-madua-yaka na wunda na pambada ngalada.

⁶Tàka nyimi hamayangu jàka wàmi, tama la kurungu dàngu bitanya na pindu, hàla hamayangu-wa la Amami na panda ngita. Na Amami na maita ndàbaya na paruku-mi na ma-kawiningu, napa nawua-nggai wundami.

⁷Jàka mi-hamayangu àmbi pamalai - laiduya hama tuna na tau na manda tandaya i Miri. Ba dakaka-ya napa na pakarai-da na-patingi-nja, ka ba namalai-du na hamayanguda.

⁸Àmbi timi nudu nyimi. Na Amami la awangu mbàda pi-mana-nyaka duna na pa-kalana-mi ba ndedi mikarai-ya.

⁹Jia màta kai hamayangu timi yia, ‘Amama la awangu: Nyumu Ala Kamehangu-kau. Màla àruki ka marubuku-nggau dàngu ka tembikau.

¹⁰Jiakau Nyumuma Hanganji-ma. Màla àruki kau pareta la pinu tana dàngu na pambuha-mu ka nunjuya hama tuna la awangu.

¹¹Wua àru-nggama la lodu nàhu uhu tuda ngama wai ràka ngunuma.[4]

¹²Jàma àrunja da njalama, hama tuna nyuma ba mbàda jàma-manyaka na tau na manjala lai nyuma.

¹³Àmbu puli-nggama la pamàli na pawaima jàka era ningu makama-nggama tàka pahàla-kama welingu la limana i Ma-akatu. [Ba Nyumudu Hanganji ma-kuaha dàngu ma-mangarangu lundu nu - nu. Amingu!]’ wàmi.

¹⁴Nadu nyimi jàka mijàma-nya na tau na manjala lai nyimi, napa na Amami la awangu najàma-manggai dimi.

¹⁵Tàka jàka ndai jàmanya na njalana na tau hawiangu, na Amami la awangu nda jia jàma-ananja da njalami nyimi,” wànanja.

¹⁶“Nyimi puaha jàka wàmi àmbi bitidu hama tuna na tau kapelu. Ba hili hau-daha na hadada da matada ka peku pinanja tau ba puaha-danya. Namuya, ba tuda nu ngala-danyaka na wundada.

¹⁷Tàka nyimi jàka mi-puaha, bahawa matami, haiwa lunggimi,

¹⁸ka àmbu ningu mapi-nggai ba puaha-minya, hinggilu-na na Ama-ami na panda ngita. Nyuna na maita-ya jàka nggàra ulamu la ma-kawiningu tàka napa hi nawua-nggau wundamu.”

¹⁹“Àmbi pa-uhingu-du banda nduma wikimi la pinu tana, na pangia manganii dàngu patai rara da ma-paruha-ha dàngu tau manganga na mamai pa-manganga-ha.

²⁰Nahàmupa, ka pa-uhingu banda la awangu, na manda ningu manganiingu dàngu patai rarangu ma-paruha-ha, dàngu ma-manganga nda dalua pa-manganga-ha.

²¹Nadu jàka nggiha da bandami, lai numbuha da etimi!” wàna.

²²“Da wua mata jiaha da palita-da da taumi. Jàka da-maninggiru da wua matami, daharii ndàba da taumi.

²³Tàka jàka da-kambura da wua matami, kapàtangu ndàba-danyaka da taumi. Jia jàka dambàda-kaka da palita la wikimi, nggiki biana-ka ihu na kapàta mitingu-na!” wàna.

²⁴“Nda ningua tau mapeku la pa-kaduangu mirina la paràma. Nadu napa narihi mbuha-nyapa na haàtu welingu la haàtu. Jàka ndia napa narihi tuturu-nyapa na haàtu welingu la haàtu. Tumbuna nyimi. Nda peku-ana nyimi la pa-paloku-nya ndumana i Ala dàngu ndumana na pawulu wàngumbu.

²⁵Jia-duya nu, namuya; àmbi kadiku-nya na lurimi, nggàraka pangami pangunu-mi, jàka ndia nggàraka papaki-mi. Màla na lurimi nda narihi welingu la pangangu, dàngu da taumi nda darihi welingu la paki?

²⁶Tàngaru-ha da ma-hawurungu la awangu. Nda datondungu, nda damuti, dàngu nda da-pauhingu-mbu pangangu la dàndaku. Jiapa ka tuna nu na Amami la awangu narada-manja nyuda! Màla nyimi ndai rihi pa-wilingu welingu la ma-hawurungu?

²⁷Nggamu lai nyimi ba ruku kadikungu-na hi na-ngalangu bia pa-kabutuhu-kiya na lurina ana hawutu?[5]

²⁸Nggikina nyimi hi mi-kadikungu pakimi? Tàngaru-ha da wàla mangàta da matumbu la maràda. Nuda da wàla ai nda daràma nda da-tinungu-mbu;

²⁹tàka na Hanganji Halomu na matika pawulu-mbu, nda napaki-a paki hama manandangu-da nuda da wàla ai!

³⁰Nu na rumba la maràda natumbu la lodu nàhu tàka haromu patunu palàpu-maaya. Ba tuna i Ala nawotu-nya ngaüna hi natika pa-manandangu. Ka rihi-aipa dimi nyimi! Tàka nyimi najapu na pawaimi!

³¹Àmbi kadiku-du, ‘Nggàra-aka panganda,’ jàka ndia ‘nggàra-aka pangunu-nda,’ jàka ndia ‘nggàra-aka papaki-nda?’ ba wàmi.

³²Mbuu ndàbada nuda jia-mahaka da pakeha-da da tau da manda tandaya i Ala. Làti duna na Amami la awangu pi-nanya-padua nuda ba jiaha da pa-kalana-mi.

³³Jia ba tuna, pamukarungu pàku ka mbulungu i Ala-a na ma-pareta-ya na lurimu dàngu kau patutu-manya na pambuha-na. Nuda hawiangu mbuu ndàbada ka, napa nawua-mbunggaunja duna paraïna i Ala.

³⁴Jia ba tuna nu, àmbi kadiku-dunya na lodu haromu. Nadu haromu hilu ningumai duna kadiku mehana. Toma-mana-nyaka na handukana la lodu nàhu, àmbi hili bonja-nyaipa,” wàna.