Read Kambera MATIU 8 Bible Online

MATIU 8 - Kambera bible

MATIU 8

¹Ba napuru-ka i Yehu welingu la tandula, dangu tau makiku-nya.

²Ka tàka-nanyaka na haàtu na tau na mahidu manula pa-mayitangu.[6] Hi na patika la hanggana i Yehu, hi napanii, “Miri, jàka umbuhangu, peku-mana dumu bau pamàlaru-ka,” wànanya.

³I Yehu naràma-ya nuna na tau ba dàngu paniina, “Ku-mbuhangu, màlaru-wa,” hi wànanya. Ndedi mbàdiku-na munangu-madua-nanyaka na hiduna.

⁴Hàla panii-nanyaka i Yehu, “Namuya! Àmbu panii-duya ka lai nggamu-yakadu. Na nyuna luawa la ratu, kau karaiya ma-màndungu ba tuba màlaru-muka. Hàla nu kau ngàndi kameti maraku na hupu liina i Muha, tandana la tau dangu ba màlaru langatàka-munyaka,” wànanya.

⁵Ba natama-ka i Yehu la Kapinaumu, na haàtu na parawira Roma namai tomaya nyuna, hi nakarai-ya pa-ndulangu.

⁶“Miri, hidu-nanya na tau ma-hadangu la uma. Na-katuda-padua ba kaliparu-nanya, lalu mbana mayila-ya,” wàna.

⁷Napaya i Yehu, “Napa kulua papamàlaruya,” wànanya.

⁸Nahema na parawira, “Jàmangu-ka duna Miri. Nda ràka-anggu duku Miri bau tamangga umanggu. Wuangu bia pareta. Napa na-màlaru-ma duku na atanggu.

⁹Nadu nyungga ba ku-patundungu-mai duku la mangia ditangga. Dàngu la wawanggu nyungga ninja da panjuri da ma-patundu-nya na pareta-nggu. Jàka ku-paràha-nya na haàtu na panjuri, ‘Lua!’ jàka wànggunya, lua-mana-nyaka duna. Tàka na haàtu, ‘Mai yiahu-kau!’ jàka wànggunya, nàmu-manyaka duna; dàngu jàka ku-paràha-nya na atanggu, ‘Ràmaya yiana!’ jàka wànggunya, ràma-mana-nyaka duna,” wàna.

¹⁰Nu i Yehu ba narongu-yaka na paniina na parawira, na-maratangu-nya. Hi napanii-nja da tau da matundu-nya, “Kanjupu-duya na tau yiana. La honga tau Ihirailu ndedimbu ku-hunggungu mabokulu pawai tuna yia!” wànanja.

¹¹“Langatàka! Nadangu napa na tau welingu la pahunga dàngu la patama lodu mamai pa-hawola dànja i Ambarahàmu, i Ihàku dàngu i Yakupu la Pinu Tana Bidina i Ala.

¹²Tàka pàku na tau na manjadi banjaru-na i Ala làti pa-wàrungu-ha napa hu lua la kapàtangu la hambeli. Lai nu napa hii-danyaka, mayila-danyaka,” wànanja.

¹³Hàla i Yehu hi napanii-nya na parawira, “Beliwa dumu, jàka jia-yaka na pakarai-mu wàngu pawaimu napa na-padeningu-ma,” wànanya. Tàka jia-ma-aya la rehi nuna ba na-màlaru na atana.

¹⁴I Yehu nalua la umana i Peturu. Lai nu naita-ya na ina yerana i Peturu ba pariti-nanya la ngia pa-katuda.

¹⁵I Yehu nadàma-ya na limana, hi munangu-ma-ananya na pariti-na. Ka hadangu-nanyaka hi nainga-ya i Yehu.

¹⁶Ba na-malingu-ka nadangu na tau pa-huruku wàndi akatu da pangàndi tau lai Yehu. Nawàngu papanii handa - ndàkangu-a i Yehu ba nawàngga-ha da wàndi akatu dàngu na-pahàmu-mbuha da tau mahidu mbuu ndàbada.

¹⁷Nawunda-ha nuda mbuu ndàbada paraïna i Yehu, nu ba tuna nu hàrangu-nanyaka na papanii-na i wunangu Yahaya, “Nyuna na matanggu-nja da mayilanda dàngu hi na-pamàlaru-ha da mahidu-nda,” ba wàna.

¹⁸Dira danguya na tau la winggiru-na i Yehu. Ba naita-haka nyuda mbuu ndàbada, i Yehu na-paràha-nja da tau makiku-nya papala la hapapa tàma.

¹⁹Hàlaka na haàtu na ngguru anggama namai tomaya hi napanii, “Umbu Ngguru, ka kutundu-nya Nyuna wànggunggau jiapa nda nggi mu-hanggangu ningu,” wànanya.

²⁰Nahema i Yehu, “Da ahu rumba ningu kubu liangu-da, dàngu da ma-hawurungu-mbu ningu hibuda, tàka na Ana Tau nda ningua ngia pa-tanggilingu-na,” wànanya.

²¹Hàla na haàtu na makiku-nya napanii, “Umbu Ngguru, puli pàkungga làti ka kubeli patani-nya na amanggu,” wànanya.

²²Tàka nahema i Yehu, “Tundungga, màtanya na tau meti ka natani wikinya na anguna na mameti,” hi wànanya!

²³I Yehu nahei la tena dàngu da makiku-nya karia-mada.

²⁴Hi jia tungu biana na ngilu mbangatu manda najaru na ma-làndahu-nya na tàma hi na-nàhaku-ya ngalingu na tena. La rehi nu i Yehu mahuru-nanya.

²⁵Ka lua-danyaka da makiku-nya i Yehu hi dabengi-nya, “Umbu! Pa-ndulangu! Hanggàmaru-ndanyaka!” wàdanya.

²⁶“Ka nggikina hi mi-mangàdatu? Ka ndai waimaka Nyungga?” wànanja. Tunaka nu hadangu-nanyaka i Yehu hi nakayàmbakunya na ngilu dàngu na tàma. Ka mandangu hàmu-nanyaka na tàma.

²⁷Hangàtaru-danyaka da makiku-nya. “Nggàra tau-yaka yiana yia, jiapa na ngilu dàngu na ngalingu datundu-mbunya na pareta-na!” wàda.

²⁸Ka tàka-nanyaka i Yehu la hapapa tàma la ngaba Nggandara. Lai nu ninja tau madua-ha da pa-huruku wàndi akatu da ma-ndàharungu lai Nyuna. Nuda da tau madua lalu mbana kabularu-ha, hi lupa nda haàtu matoru mbeni pali ningu lai nu.

²⁹Nyuda daluhu welingu la kubu reti ba dàngu warada, “Ou! Ana Ala! Nggikina wàmu-nggamaka nu? Ka pa-mayila-ha wàmuka nu dàngu ndedi jiaya na rehina?” wàda.

³⁰Nda nggi tuna marauna welingu lai nu, ninja da wei da madira danguha da mahimbu pangangu lai nu.

³¹Da wàndi akatu dakarai lai Yehu, “Paràha-nja paluhu jàka wàmu-nggama, pahia-nggama làti ka matama la wei kabàba nida,” wàdanya.

³²“Luawa,” hi wàna i Yehu. Ka luhu-danyaka da wàndi akatu welingu la tau madua nuda hi datama la wei kabàba. Nuda da wei palai-danyaka hi da-libungu wikida la ngambangu la karaha tàma, ka mumuhu-danyaka.

³³Da tau ma-pawangu wei palai-danyaka la paraingu, hi dapanii hàlaya nuna na matumbu, dàngumbu rukuda da tau madua da pa-huruku wàndi akatu.

³⁴Ka lua ndàba-danyaka da tau la paraingu nuna pa-tàbuku-ya i Yehu. Ba daita-yaka i Yehu, karai pa-mbanangu-danyaka ka na-dunjaku-nya na ngaba tanada nyuda.