Read Kambera MÀRUKU 1 Bible Online

MÀRUKU 1 - Kambera bible

MÀRUKU 1

¹Yiana jia-yaka na Lii Mànangu rukuna i Yehu Karitu, na Anana i Ala.[1]

²Nuna na Lii Mànangu na pakiri-na hama tuna na pa-tulihu-na i Wunangu Yahaya, “ ‘Yiana jia-yaka na papalewa-nggu,’ wàna i Ala; ‘Ku-palewa-ya pa-mangilu-nggau Nyumu, ka nalota-nggau ànda,’ ba wàna.

³Ningu tau mawara la maràda wara, ‘Payema-nya ànda i Miri; pa-linjaku-hawa da ànda ngia palina,’ ” wàna.

⁴Hama tuna na pa-tulihu, tuna nuduka ba na-mumuku i Yuhani la maràda telangu. Na-parunungu tau dàngu na-bobaru-ya na lii welingu lai Ala,[2] “Panjilu-nya bàdi na lurimi welingu la njala ka lupangu parunu-nggai, ka najàma-nja i Ala da njalami,” wàna i Yuhani.

⁵Ka lua ndàba-nanyaka na tau na ma-pawelingu la nggubulu Yundia hamanai na ihina la Yeruhali, parongu-ya i Yuhani. Dapeka-ha da njalada, hi na-parunu-nja paraïna i Yuhani la Luku Yorundangu.

⁶I Yuhani napaki wulu ihi ota. Na boru bànggina manulangu-ya, kabala dàngu manggalua omangu pangana.

⁷Hi na-pakada-nya yiana na pa-bobaru, “Jàka ku-talurungu nyungga nàmu-nyapa na marihi bokulu welingu lai nyungga. Nyungga wiki nda ràka jia-mbuka ma-karuduku pangguli-ha da halapa-na.

⁸Nyungga duku ku-parunu-nggai la wai, tàka Nyuna duna na-parunu-nggai la Ngahuna i Ala,” wàna.

⁹La rehi nu tàka-nanyaka i Yehu welingu la Naharitu tana Nggalilia, hi na-parunu-nya paraïna i Yuhani la Luku Yorundangu.

¹⁰Nadita-kika la mara welingu la wai, ita-nanyaka ba na-tawangga na awangu, tàka na Ngahuna i Ala ba hama kulundiha-ya na puruna lai Nyuna.

¹¹Tunaka nu hi ronguya na liina i Ala, “Nyumu jiakau Ana pambuha-nggu. Nyumu uliya na etinggu,” wàna.

¹²Hàlaka nu ailulu iru ngàndi-nanyaka Ngahuna i Ala i Yehu la maràda telangu.

¹³Patu kambulu loduna mandaina lai nu, ba nakama-nya paraïna i Kambàliku. Ningumbu banda bohu la lihina Nyuna lai nu, tàka da papalewa hi dalumu-nya Nyuna.

¹⁴Ba puhi-yaka i Yuhani la uma kapàtangu, lua-nanyaka i Yehu la Nggalilia, hi na-bobaru-ya lai nu na Lii Mànangu welingu lai Ala.

¹⁵“Lu pareta-ama-nanyaka i Ala. Panjilu-nya na lurimi welingu la njalami, dàngu kai waiya na Lii Mànangu welingu lai Ala,” wàna.

¹⁶Ba nàhunya la hingi Tàma Nggalilia i Yehu, naita-ha da tau madua mini jala, nu i Himungu dàngu i Andaria na erina. Jala-danya iyangu lai nu la tàma.

¹⁷Tàka i Yehu napanii-nja, “Kikungga Nyungga. Napa ku-papeka-nggai pajala tau,” hi wànanja.

¹⁸Ailulu dunjaku-madanja da jalada hi dakiku-nya i Yehu.

¹⁹Nalaku pa-ngalangu i Yehu hi naita-ha da tau madua da ma-paeri ayangu-mbu, nu i Yakombu dàngu i Yuhani, da anana i Hambandiu. Pa-hulungu-danya jalada la tena.

²⁰Ailulu paau-nanjaka paraïna i Yehu. Ka màta-danyaka la tena na amada dàngu da tau pawua-na wunda, hi dalua pakiku-nya i Yehu.

²¹Tàka-danyaka la Kapinaumu i Yehu dàngu da makiku-nya. La lodu Hangahu na ma-pandàkingu, tama-nanyaka la uma bungguru i Yehu, hi na-papekangu tau,

²²Da-hangàtaru-nya na huri pa-pekangu-na paraï da tau da marongu-ya. Nadu, ba wàngu pa-mahumbaru-nya jàka na pa-pekangu tau. Nda hama tuna-a da ngguru anggama.

²³La rehi nu tama-nanyaka la uma bungguru na haàtu tau pa-huruku wàndi akatu, hi na-kaladaku.

²⁴“Ha Yehu tau Naharitu, nggikumu-nggamaka nyuma? Maimunya pa-patàlaru kama? Kupinggau jàka nggamukau: Jia-makauka naa na papalewa ma-matua welingu lai Ala,” wàna.

²⁵“Kandii!” wàna i Yehu ba na-kayàmbaku-nya na wàndi. “Luhukau welingu la tau yiana,” wànanya.

²⁶Tàka na wàndi hi naa - àjiru-nya nuna na tau, hàlaka hi naluhu-ya welingu la tau nuna ba dàngu kaladaku-na.

²⁷Dira hangàtaru hàlaya na tau hi dapanii dàngga anguda, “Ai ha, ka nggàra-yaka ihu ni? Lii pa-pekangu mabidi-ya! Ba wàngu pa-mahumbaru-nya ba nawàngu kawaha-na pa-paràha-nja paluhu da wàndi akatu, tàka da-karadaku-manya,” wàda.

²⁸Ka rengga kada ndàba-nanyaka tau na rukuna i Yehu la nggubulu tana Nggalilia.

²⁹Ka laku-danyaka welingu la uma bungguru nuna i Yehu dàngu da makiku-nya, hi dalua la umada i Himungu dàngu i Andaria. I Yakombu dàngu i Yuhani dalua karia-mbunja nyuda.

³⁰Mbana ihi-nanya na ina yerana i Himungu la ngia pa-katuda. Ba datama-nyaka na uma i Yehu dàngu da makiku-nya ka panii-danyaka na rukuna nuna.

³¹Ka lua-nanyaka i Yehu la ina yerana i Himungu, hi nayàpa-ya na limana pa-pahada-nya. Pànjangu-nanyaka na mbana ihina, hi nalumu-nja.

³²La malingu ba natama-ka na lodu,[3] ngàndi ndàba-dahaka lai Yehu da tau mahidu dàngu da pa-huruku wàndi akatu.

³³Mbuu ndàbana na ihi paraingu da-langgungguru la hangga uma nuna.

³⁴Dira danguya na mahidu hangia - hangia pa-pahàmu-na i Yehu, dàngu dadangu-mbu da wàndi akatu pawàngga-na. Nda na-pahia-anja pa-kareuku nuda da wàndi, maa ba dapi-dunya jàka nggamuya Nyuna.

³⁵La mbaru hada rudungu, la lodu haromu-na, naluhu-ya welingu la uma i Yehu. Nalaku-ya la ma-malinggitu la hambeli paraingu hi na-hamayangu ningu lai nu.

³⁶Tàka hi dalua i Himungu dàngu da anguna pahimbu-ya Nyuna.

³⁷Ba dahunggu-yaka “Himbu ndàba-nanggau tau Umbu,” wàdanya.

³⁸Tàka nahema i Yehu, “Màla ka talaku pangalangu la parai - paraingu la winggiru-na lai yiahu. Lupangu ku-pabobarungu-mbu bàdi lai nu, maa ba jiaya nunadu hi kuluhu-ka nàmu,” wàna.

³⁹Tuna nuduka hi nalaku la nggi - nggini i Yehu la nggubulu tana Nggalilia, hi na pa-bobarungu la uma bunggu - uma bungguru dàngu nawàngga-ha da wàndi akatu.

⁴⁰Na haàtu na tau panggàna panyaki manula pa-mayitangu,[4] namai lai Yehu. Na-patika hi napanii, “Jiaya jàka wàmu Umbu, ungalangu-ma pa-pahàmu-ka,” wàna.

⁴¹I Yehu namila-nya eti.[5] Tàka hi naràma-ya ba dàngu paniina, “Jiaya wànggu, uhàmuwa,” hi wànanya.

⁴²La rehi nunama ba na-yilangu na panyaki-na hi nahàmu.

⁴³Ka paràha-nanyaka palaku paraïna i Yehu ba dàngu ràndi-nanya,

⁴⁴“Rimangu-ma, àmbu ningudu ngia papanii-mu, na nyuna luawa la ratu, karaiya ka na-pakawàndi-ya ba mbàda hàmu langatàka-munyaka. Hàla wotuwa maraku rukuna ba pahàmu-kau nunjuya na hupu liina i Muha, ka hau tandaya la tauka ba mbàda hàmu langatàka-muka,” wànanya.

⁴⁵Na nyuna laku-nanyaka nuna na tau hi na-nutakungu papeka-ya la nggi - nggini nuna na manjadi, hi nda peku tama pa-wuwangu-na i Yehu la paraingu. Enga-bia-naka la hambeli paraingu la ma-hinggilu. Ba tuna mai mànu bia-nanya na tau welingu la nggi - nggini lai Nyuna.